ކޮވިޑް-19 ގެ ސަބަބުން މޮނިޓަރިންގ ގެ ޙާލަތުގައި އޮންނަ ރަށަކަށްވެސް ވޯޓުލާން ދެވިދާނެކަމަށް އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވެއްޖެއެވެ.
ޝަރީފް ވިދާޅުވީ، އަތޮޅު ތެރޭގައި ދިރިއުޅޭ ރައްޔިތުން އެއް ރަށުން އަނެއް ރަށަށް ވޯޓު ލުމަށް ދިއުމުގެ ހުއްދަ ދޭނެކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އަންގާފައިވާ ކަމަށެވެ. އަދި މޮނިޓަރިންގ ޙާލަތުގައި އޮންނަ ރަށަކަށްވެސް އެ ރަށެއްގެ ޓާސްކްފޯސްއާ ގުޅިގެން ހަމައެކަނި ވޯޓު ލުމަށް ހުއްދަ ލިބޭނެ ކަމަށެވެ.
އޭގެ އިތުރުން، އޭޕްރީލް މަހުގެ 10 ވަނަ ދުވަހު ބާއްވާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވޯޓުލާ ދުވަހު ކަރަންޓީނުގައި އަދި ކޮވިޑަށް ޕޮޒިޓިވްވެފައި ތިބޭ މީހުންނަށް ވޯޓުލެވޭނީ އެފޮއްޓަކަށް ވޯޓުލާން ގޮސްފައި ތިބި އެންމެން ވޯޓުލާ ނިމުމުންކަމަށް ޝަރީފް ވަނީ މީގެ ކުރިން ވިދާޅުވެފައެވެ. އިންތިޚާބާއި ގުޅިގެން އީސީން ވަމުން އަންނަ ތައްޔާރީތަކާއި ގުޅޭގޮތުން "ރާއްޖެ އެމްވީ" އަށް ދެއްވި ޚާއްސަ އިންޓަރވިއުއެއްގައި ޝަރީފް ވިދާޅުވީ ކަރަންޓީން އަދި ޕޮޒިޓިވްވެފައިިވާ މީހުންވެސް އަމަލު ކުރަން ޖެހޭނީ އެޗްޕީއޭއިން އާންމުކޮށްފައި އޮންނަ އުސޫލަށް ކަމަށެވެ. އެގޮތުން މާސްކު އެޅުމާއި ގައިދުރުކަން ގެންގުޅުންފަދަ ކަންކަމަށް ސަމާލުކަން ދިނުމަށް ޝަރީފް ވަނީ ހަނދާންކޮށްދެއްވާފައެވެ.
އީސީން އަންނަނީ އިންތިޚާބަށް ވާންޖެހޭ އެންމެ ފަހުގެ ތައްޔާރީތައް ވަމުންނެވެ. އެގޮތުން އޮފިޝަލުން ތަމްރީނު ކުރުމާއި، އިންތިޚާބާ ގުޅިގެން އާންމު ރައްޔިތުން ހޭލުންތެރި ކުރުމަށް ވެސް މަސައްކަތް ކުރެއެވެ. ކޮވިޑް-19އާ ގުޅިގެން އިންތިޚާބުގެ ކަންކަމަށް މިވަނީ ވަރަށް ބޮޑު ބަދަލުތަކެއްވެސް އައިސްފައެވެ.
