މިހިނގާ އޭޕްރީލް މަހުގެ 8 ވާ ބުރާސްފަތި ދުވަހު ރަމަޟާން މަހުގެ އިނާޔަތުގެ ފައިސާ ދިނުމަށް ހަމަޖެހިފައިވާކަމަށް މިނިސްޓްރީ އޮފް ފިނޭންސުން އިއުލާނުކޮށްފިއެވެ.

ފިނޭންސް މިނިސްޓަރ އިބްރާޙިމް އަމީރު ސޮއި ކުރައްވައި ނެރުއްވި އިއުލާނެއްގައި ވަނީ، ގާނޫނު ނަންބަރު 2/2008 (ވަޒީފާއާ ބެހޭ ގާނޫނު)އަށް ގެނެވުނު އިސްލާހާއެކު ވަޒީފާ އަދާކުރާ ކޮންމެ މުސްލިމު މުވައްޒަފަކަށްވެސް ރަމަޟާން މަހުގެ އިނާޔަތުގެ ގޮތުގައި 3000 ރުފިޔާ ދޭންޖެހޭނެ ކަމަށެވެ. އަދި މުސާރަ ލިބޭ އެއް އޮފީހަށްވުރެ ގިނަ އޮފީހުގައި މަސައްކަތް ކުރާނަމަ އިނާޔަތް ދޭނީ ހަމައެކަނި އެ މުވައްޒަފަކު އަސާސީ ވަޒީފާ އަދާކުރާ އޮފީހަކުން ކަމަށްވެސް ފިނޭންސް މިނިސްޓްރީން ވަނީ ބުނެފައެވެ.

އިނާޔަތުގެ ފައިސާ ދީފައިވާ މުވައްޒަފަކު ރަމަޟާން މަހުގެ ތިންބައިކުޅަ އެއްބައި ފާއިތު ނުވަނީސް ވަޒީފާއިން ވަކިވެއްޖެނަމަ ވަކިވި ދުވަހާއި ހަމައަށްވާ ފައިސާ ފިޔަވައި އިތުރުވާ ފައިސާ އެ މުވައްޒަފެއްގެ އަތުން ހޯދައި އަނބުރާ ޖަމާކުރަންވާނެ ކަމަށްވެސް މިނިސްޓްރީން ކުރި އިއުލާނުގައި ބުނެފައިވެއެވެ. އެގޮތުން ރަމަޟާން މަހުގެ ތެރޭގައި ވަޒީފާއިން ވަކިވުމަށް ހަމަޖެހިފައިވާ މުވައްޒަފުންނަށްވެސް އިނާޔަތުގެ ފައިސާ ދޭނީ ހަމައެކަނި އެ މުވައްޒަފަކު ވަޒީފާ އަދާކުރި ދުވަހަކަށް ކަމަށް މިނިސްޓްރީން މައުލޫމާތު ދެއެވެ.

މިނިސްޓްރީން ވަނީ އޭޕްރީލް މަހުގެ 1 ވަނަ ދުވަހުން ފެށިގެން ރަމަޟާން މަހުގެ އިނާޔަތުގެ ފައިސާގެ ތަފްސީލު ތައްޔާރުކޮށް، އިނާޔަތުގެ ފައިސާ ހޯދުމަށް މިނިސްޓްރީއަށް ހުށައެޅުމަށް އިދާރާތަކަށް އަންގާފައެވެ.