ރަސްދޫ 'ނަވި2' ލޯންޗުގައި އަލިފާނުގެ ހާދިސާއެއް ހިނގައިފި
މި ހާދިސާގައި އެއްވެސް މީހަކަށް އަނިޔާއެއް ނުވޭ
އެމްއެންޑީއެފްގެ އުޅަނދެއް ކަނޑުމަތީގެ ހާދިސާއެއްގައި ހަރަކާތްތެރި ވަނިކޮށް
އއ. ރަސްދޫން މާލެ ދަތުރުކުރި 'ނަވި2' ނަމަކަށް ކިޔާ ލޯންޗެއްގައި އަލިފާނުގެ ހާދިސާއެއް ހިނގައި ކޯސްޓުގާޑުން ހަރަކާތްތެރިވާން ފަށައިފިއެވެ.
އެމްއެންޑީއެފުން ބުނީ މި ހާދިސާގެ ރިޕޯޓު ލިބިފައިވަނީ ހުކުރު ދުވަހުގެރޭ 18:45 ހާއިރު ކަމަށާއި، ލޯންޗުގެ ދެ އިންޖީނުގެ ތެރެއިން އެއް އިންޖީނުގައި ރޯވެފައިވާ ކަމަށެވެ. މި ހާދިސާ ހިނގިއިރު ލޯންޗު ދަތުރުކުރަމުން ދިޔައީ ރަސްދޫން މާލެއަށް ކަމަށާއި، ހާދިސާ ހިނގި ވަގުތު ލޯންޗުގައި 22 ފަތުރުވެރިންނާއި 3 ފަޅުވެރިން ތިބި ކަމަށް ވެސް ބުނެއެވެ. ލޯންޗުގައި ތިބި މީހުން އޭގެ ވެރިފަރާތުން ހަމަޖެއްސި 'ނަވި4' ލޯންޗުގައި ރަސްދޫއަށް މިހާރު ވަނީ ގެންގޮސްފައެވެ.
އެމްއެންޑީއެފުން އިތުރަށް ބުނީ މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ނުވާ ކަމަށެވެ.
