އައު އިސްލާހާއެކު، ލައިސެންސް ދޫކުރާނީ ގަވައިދަށް އުޅުމަށް އެއްބަސްވުމެއް އެކުލަވާލާފައި
ކޮމިއުނިޓީ ސަރވިސްގެ ގަޑި ފުރިހަމަކޮށްގެން ޖޫރިމަނާއިން ކެނޑޭނެ
ކޮވިޑް19 - ރޭގަނޑު މާލޭގެ މަގުމަތި
ލައިސެންސް ގަވައިދަށް އިސްލާހު ގެންނައިރު، ލައިސެންސް އަނބުރާ ދޫކުރާނީ ގަވައިދަށް ހުރުމަތްތެރިކޮށް ހިތާނެކަމަށް އެއްބަސްވެ އެގްރީމެންޓެއް ހަދާ ކޮމިއުނިޓީ ސަރވިސް ފުރިހަމަކުރާގޮތަށް ކަމަށް ޓްރާންސްޕޯޓް މިނިސްޓްރީން ބުނެފިއެވެ.
މިކަން ޓްރާންސްޕޯޓް މިނިސްޓްރީން ހާމަކޮށްފައިވަނީ، ރައްޔިތުންގެ މަޖިލީހުގެ ގަވައިދު ކޮމިޓީގައި ކަމާގުޅޭ ވުޒާރާއާއި މުއައްސަސާތައް ހާޒިރުކޮށްގެން ކުރިއަށްގެންދިޔަ ކޮމިޓީ ބައްދަލުވުމެއްގައެވެ.
މި ބައްދަލުވުމުގައި ޓްރާސްޕޯޓް މިނިސްޓްރީން ވަނީ 18 އަހަރުން ދަށުގެ ކުދިންގެ ޖޫރިމަނާގެ ކަންކަން ހައްލުކުރުމަށް އެކުދިން މުޖުތަމައަށް ފައިދާހުރި ކަމެއްކޮށްގެން ނުވަތަ ކޮމިއުނިޓީ ސަރވިސްގެ ގަޑިއިރު ފުރިހަމަކޮށްގެން ޖޫރިމަނާއިން ކެނޑޭގޮތަށް ގަވައިދަށް އިސްލާހު ގެނެސް އަންނަ ހަފުތާގައި އޮޑިޓަރ ޖެނެރަލްއަށް ހުށަހަޅާނެކަމަށް ބުނެފައެވެ. އަދި މި އިސްލާހަށް އަމަލީ ސިފަ ގެނެސް އަންނަ މަސް ފެށެންވާއިރަށް ގެޒެޓްކުރުމަށް މަސައްކަތް ކުރަމުންދާކަމަށް މިނިސްޓްރީން ބުނެއެވެ. މިހާރު ގަވައިދުތައް ހުރިގޮތުން ބައެއް ޒަރޫރީ ޚިދުމަތްތައް ލިބިގަތުމުގައިވެސް ލައިސަންސް ހިފަހައްޓާފައިވުމުން ހުރަސް އެޅޭކަން ފާހަގަކުރަމުން، ޓްރާންސްޕޯޓް މިނިސްޓްރީން ވަނީ އައު ގަވައިދުގައި މިކަމަށް ހައްލު ލިބިގެންދާނެކަމަށް ބުނެފައެވެ.
ލައިސަންސް ގަވައިދަށް އިސްލާހު ގެންނައިރު، ލައިސެންސް އަނބުރާ ދޫކުރާނީ ގަވައިދަށް ހުރުމަތްތެރިކޮށް ހިތާނެކަމަށް އެއްބަސްވެ އެގްރީމެންޓެއް ހަދާ ކޮމިއުނިޓީ ސަރވިސް ފުރިހަމަކުރާގޮތަށް ކަމަށް އެ މިނިސްޓްރީން ހާމަކުރިއެވެ. އެގޮތުން ކޮމިއުނިޓީ ސަރވިސް ފުރިހަމަކުރުމަށް ސަރުކާރު ހިއްސާވާ ކުންފުނިތަކާއި ވާހަކަދައްކަމުންދާކަން ހާމަކުރިއެވެ. މި ބައްދަލުވުމުގައި ވާހަކަދައްކަވަމުން، ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވަނީ ވެމްކޯއާއި އެމްޕީއެލްއިން މިކަމަށް އެއްބަވަސްފައިވާކަމަށް ވިދާޅުވެފައެވެ. މީގެ އިތުރުން އެމްޓީސީސީއާއި އެމްޑަބްލިއުއެސްސީ ފަދަ ކުންފުނިތަކުގައިވެސް މި ފުރުސަތު ލިބޭނެކަމަށް ވިދާޅުވިއެވެ.
