އީސީގެ ޑޭޓާ ބޭހަށް ވަނުމުގެ ފުރުސަތު ބޭރުގެ އެއްވެސް މީހަކަށް ނޯންނާނެ - ފުއާދު
ކޮންމެ އިންތިޚާބަކާ ދިމާކޮށް އިލެކްޝަންގެ ވެބްސައިޓަށް ހަމަލާތައް އާދޭ
އިލެކްޝަންސް ކޮމިޝަންގެ މެންބަރުން، ކައުންސިލް އިންތިހާބު ބޭއްވުމަށް ހަމަޖެހިފައި ވަނީ އޭޕްރީލް މަހުގެ 10 ވަނަ ދުވަހު
އިލެކްޝަންސް ކޮމިޝަނުގެ ޑޭޓާ ބޭހަށް ވަނުމުގެ ފުރުސަތު ބޭރުގެ އެއްވެސް މީހަކަށް ނޯންނާނެ ކަމަށް އިލެކްޝަންސް ކޮމިޝަނުގެ މެމްބަރު ފުއާދު ތައުފީގު ވިދާޅުވެއްޖެއެވެ.
ފުއާދު ވިދާޅުވީ، އިލެކްޝަން ކޮމިޝަނުގެ ޑޭޓާބޭހަށް ބޭރުގެ ފަރާތްތަކުން ވަދެ ނަތީޖާ ބަދަލުކުރާ ވާހަކައަކީ ކޮންމެ އިންތިޚާބަކާ ދިމާކޮށް އިވޭ ވާހަކަތަކެއް ކަމަށާއި، އެހެންނަމަވެސް އެއްވެސް އިރެއްގައި އެކަން އެގޮތަށް ހިނގާފައިނުވާ ކަމަށެވެ. ފުއާދު ވިދާޅުވީ، ކޮންމެ އިންތިޚާބަކާ ދިމާކޮށް އިލެކްޝަންގެ ވެބްސައިޓަށް ހަމަލާތައް އަންނަ ކަމަށެވެ. ވެބްސައިޓްގެ ސެކިއުރިޓީ ވަރަށް ވަރުގަދަ ވާނެ ކަމުގެ ޔަގީންކަން ފުއާދު ދެއްވިއެވެ.
ފުއާުދު ވިދާޅުވީ، ބޭރުގެ ފަންނީ މާހިރުންގެ ލަފާ އަބަދުވެސް ކަންކަން ރަނގަޅު ކުރުމުގައި ހޯދާ ކަމަށާއި، އެމީހުންނަށްވެސް އީސީގެ އެއްވެސް ޑޭޓާ އަކަށް ވަނުމުގެ ހުއްދަ ނުދޭ ކަމަށެވެ.
މި ވަހާކަތަކަކީ އާންމު ގޮތެއްގައި އިންތިޚާބު ތަކުން ނާކާމިޔާބުވުމުން އެ ކަނޑިޑޭޓުން ތުހުމަތުކުރާ ކަންތައްކަމަށް ފުއާދު ވިދާޅުވިއެވެ.
މީގެިއިތުރުން ފުއާދު ވިދާޅުވީ، ކުރިއަށް އޮތް އިންތިޚާބު އޮބްޒާރވް ކުރުމަށް ބޭނުންވާ ބޭރުގެ ޖަމާއަތްތަކަށް އެ ފުރުސަތު އޮތް ކަމަށެވެ. މި އިންތިޚާބުގައި ވޯޓު ދިނުމުގެ ހައްގު 273،128 ( ދެލައްކަ ހަތްދިހަ ތިންހާސް އެއްސަތޭކަ އަށާވީސް) މީހުންނަށް ލިބެއެވެ.
