ތާރީޚު ދިރާސާކުރުމަކީ މަތީ ތަޢުލީމު ހާސިލުކުރާ ދަރިވަރުންގެ ކޮނޑުގައި އެޅިފައިވާ ވަރަށް މުހިންމު ޤައުމީ މަސައްކަތެއް: ރައީސް
މި ފޮތް ދިވެހިބަހަށް ތަރުޖަމާކޮށް ނެރުމުގައި، ކުރީގެ ދިވެހިބަހާއި ތާރީޚަށް ޚިދުމަތް ކުރާ ޤައުމީ މަރުކަޒުން ކުރި ބުރަ މަސައްކަތަށް ރައީސް ޝުކުރު ދެންނެވި
ތާރީޚް އިސްލާމި ދީބާ މަޙަލް ނެރުމުގެ ރަސްމިއްޔަތުގެ ތެރެއިން
ރާއްޖޭގެ ދިގު އަދި މުއްސަނދި ތާރީޚު ދިރާސާކޮށް، ލިޔެ، ރައްކާކުރުމަކީ، ޔުނިވަރސިޓީތަކާއި ކޮލެޖްތަކުގައި މަތީ ތަޢުލީމު ހާސިލުކުރަމުންދާ ދަރިވަރުންގެ ކޮނޑުގައި އެޅިފައިވާ ޤައުމީ މަސައްކަތެއް ކަމަށް ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އަލްޤާޟީ ޙަސަން ތާޖުއްދީން ލިޔުއްވާފައިވާ "ތާރީޚު އިސްލާމި ދީބާ މަޙަލް" ނެރުމުގެ ރަސްމިއްޔާތުގައި ވާހަކަފުޅު ދައްކަވަމުން، ރައީސް ވިދާޅުވީ، މިހާރުގެ ތާރީޚު ލިޔަމުން ގެންދިޔުމަކީ ވަރަށް މުހިންމު ކަމެއް ކަމަށާއި އެއީ ފަހުން އަންނަ ބަޔަކު ކުރުމަށް ދޫކޮށްލަންވީ ކަމެއް ނޫން ކަމަށެވެ. އަދި ތާރީޚް ލިޔުމަކީ ޢިލްމީ އުސޫލުތަކާ އެއްގޮތަށް ކުރަންޖެހޭ ކަމެއް ކަމަށް ރައީސް ވިދާޅުވިއެވެ.
ރައީސް ވިދާޅުވީ، މާފަހުން އަންނަ ބަޔަކު، ދޫދޫ މަތިން އަޑުއަހާ ވާހަކަތަކެއްގެ މައްޗަށް، އެ ޤައުމެއްގެ ތާރީޚު ބިނާކުރަންވެއްޖެނަމަ، ތާރީޚު އޮޅުންބޮޅުން ވެގެން ދިޔުމުގެ ފުރުޞަތު ވަރަށް ބޮޑުވާނެ ކަމަށެވެ. އެކަމަށް ފުރުޞަތު ނުދިނުމަށްޓަކައި، އެއިރެއްގެ ޙާލަތާ ބެހޭގޮތުން ޢިލްމީ ލިޔުންތައް ލިޔަމުން ދިޔުމަކީ ވަރަށް މުހިންމު ކަމެއް ކަމަށް ރައީސް ވިދާޅުވިއެވެ.
މީގެ އިތުރުން ރާއްޖޭގެ ޔުނިވަރސިޓީތަކާއި ކޮލެޖްތަކުގެ ކަމާގުޅޭ ފެކަލްޓީތަކުން، ރާއްޖޭގެ ތާރީޚާމެދު މިހާރަށްވުރެ ފުޅާ ދާއިރާއެއްގައި، ދިރާސާކުރަން ފަށާނެ ކަމަށް، އުންމީދު ކުރައްވާ ކަމަށް ވިދާޅުވިއެވެ.
ދިވެހިރާއްޖޭގެ ތާރީޚާ ބެހޭގޮތުން، ޙަސަން ތާޖުއްދީން ޢަރަބި ބަހުން ލިޔުއްވި، "ތާރީޚު އިސްލާމި ދީބާ މަޙަލް" އަކީ، ރާއްޖޭގެ ތާރީޚާ ބެހޭގޮތުން ދިވެއްސަކު އެންމެ ފުރަތަމަ ލިޔުއްވި ފޮތެވެ. އެހެން ކަމުން، ރައީސް، އެ ފޮތް ސިފަކުރެއްވީ ރާއްޖޭގެ ތާރީޚުގެ ވަރަށް އަގުހުރި ރަންމުތެއް ކަމުގައެވެ. އަދި ދިވެހިބަހަށް މި ފޮތް ތަރުޖަމާކޮށް ނެރުމަކީ، ރާއްޖޭގެ ކިޔަވާ ކުދިންނަށް ލިބުނު ވަރަށް އަގުހުރި ޢިލްމީ ހަދިޔާއެއް ކަމަށް ރައީސް ވިދާޅުވިއެވެ.
މީގެ އިތުރުން ރައީސްގެ ވާހަކަފުޅުގައި، މި ފޮތް ދިވެހިބަހަށް ތަރުޖަމާކޮށް ނެރުމުގައި، ކުރީގެ ދިވެހިބަހާއި ތާރީޚަށް ޚިދުމަތް ކުރާ ޤައުމީ މަރުކަޒުން ކުރި ބުރަ މަސައްކަތުގެ އަގު ވަޒަންކޮށް، މި މަސައްކަތުގައި ބައިވެރިވި ހުރިހާ ބޭފުޅުންނަށް ޝުކުރު އަދާކުރެއްވިއެވެ.
" ތާރީޚު އިސްލާމި ދީބާ މަޙަލް" ގެ ދިވެހި ތަރުޖަމާ ނެރުމުގެ ރަސްމިއްޔާތުގައި، މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫނާއި، ސްޓޭޓް މިނިސްޓަރ މުޙައްމަދު ޠާރިޤާއި، ދިވެހިބަހުގެ އެކެޑަމީގެ ރައީސް އަޝްރަފް ޢަލީގެ އިތުރުން މުޝީރު މުޙައްމަދު ވަޙީދު ބައިވެރިވެ ވަޑައިގެންނެވިއެވެ.
