ދިވެހި އަސްކަރިއްޔާގެ ގާބިލުކަން ދެމެހެއްޓުމަށް އެހީތެރިވެދިނުމުގައި ބަންގްލަދޭޝް އަސްކަރިއްޔާއިން ދެމިއޮންނާނެ
ބަންގްލަދޭޝް އަދި ދިވެހި އަސްކަރިއްޔާގެ ގުޅުމަކީ ދެ ގައުމަށް ހާއްސަ ގުޅުމެއް
ޗީފް އޮފް ޑިފެންސް ފޯރސްގެ ޝަރަފުގައި އެރުވުނު ގާރޑް އޮފް އޮނަރ އެއް އެމަނިކުފާނު ވަނީ އިންސްޕެކްޓް ކުރައްވަނިކޮށް
ދިވެހި އަސްކަރިއްޔާގެ އަސްކަރީ ގާބިލުކަން ދެމެހެއްޓުމަށް ބަންގްލަދޭޝް އަސްކަރިއްޔާއިން ދެމިއޮންނާނެ ކަމަށް އެގައުމުގެ އަސްކަރިއްޔާއިން ބުނެފިއެވެ.
ބަންގްލަދޭޝް އަސްކަރިއްޔާގެ އަރމީ ޗީފް އޮފް ސްޓާފް ޖެނެރަލް އަޒީޒް އަޙްމަދުގެ ދައުވަތަކަށް ދިވެހި އަސްކަރިއްޔާގެ ޗީފް އޮފް ޑިފެންސް ފޯރސް މޭޖަރ ޖެނެރަލް އަބްދުﷲ ޝަމާލް ބަންގްލަދޭޝްއަށް މިހާރު ކުރައްވަމުން ގެންދާ ރަސްމީ ދަތުރުފުޅުގައި ބުރާސްފަތި ދުވަހު ވަނީ އެގައުމުގެ އަސްކަރިއްޔާގެ ޝަހީދުންނަށް އިޙުތިރާމް އަދާ ކުރެއްވުމުގެ ގޮތުން މިކަމަށް ޚާއްސަކޮށް ބޭއްވުނު ރަސްމިއްޔާތެއްގައި ބައިވެރިވަޑައިގެންފައެވެ.
މީގެ އިތުރުން ޗީފް އޮފް ޑިފެންސް ފޯރސްގެ ޝަރަފުގައި އެރުވުނު ގާރޑް އޮފް އޮނަރ އެއް އެމަނިކުފާނު ވަނީ އިންސްޕެކްޓް ކޮށްދެއްވާފައެވެ. އަދި އެގައުމުގެ ޗީފް އޮފް އާރމީ ސްޓާފް ޖެނެރަލް އަޒީޒް އަޙުމަދާއިއެކު ޗީފް އޮފް ޑިފެންސް ފޯ ރސް ވަނީ ރަސްމީ ބައްދަލުވުން ބާއްވަވާފައެވެ.
މި ބައްދަލުވުމުގައި ޗީފް އޮފް ޑިފެންސް ފޯރސް ވަނީ ބަންގްލަދޭޝްގެ 50 ވަނަ މިނިވަން ދުވަހުގެ ތަހުނިޔާއާއި މުބާރަކްބާދީ، ބަންގްލަދޭޝްގެ އަސްކަރިއްޔާގެ އެންމެހާ ފަރާތްތަކަށް ރައީސުލުޖުމްހޫރިއްޔާއާ، ޑިފެންސް މިނިސްޓަރ އަދި ޗީފް އާއި އެންމެހާ ސިފައިންގެ ނަމުގައި އަދާކުރައްވާފައެވެ. އަދި ޒަމާނުއްސުރެ ދެގައުމުގެ ދެމެދުގައި އޮންނަ ގާތް ގުޅުންތަކާއި އަދި ބަންގްލަދޭޝްގެ އަސްކަރިއްޔާއިން ދިވެހިންނަށް ބޮޑެތި ދަތިތައް ދިމާވާ ކޮންމެ ފަހަރަކު ވެދެއްވާ ފުރިހަމަ އެހީތެރިކަމަށްޓަކައި ޝުކުރުއަދާ ކުރެއްވާފައެވެ. މީގެ އިތުރުން، ދިވެހި އަސްކަރިއްޔާ އިތުރަށް ހަރުދަނާ ކުރުމަށް ސަރުކާރުގެ ފަރާތުން ކުރައްވާ މަސައްކަތްޕުޅުގައި އިތުރު ތަމްރީން ފުރުސަތުތަކާއި އަދި އެހެނިހެން ފަންނީ އެހީތެރިކަން ހޯދުމުގެ މަޝްވަރާތައް ކުރެއްވިއެވެ.
ޖެނެރަލް އަޒީޒްގެ ވާހަކަފުޅުގައި، އެ ގައުމަކީ ދިވެހިރާއްޖެއާ ވަރަށް ޚާއްސަ ގުޅުމެއް އޮންނަ ގައުމެއްކަމާއި އަދި ދެގައުމުގެ އަސްކަރިއްޔާގެ ގުޅުން އިތުރަށް ވަރުގަދ ކުރުމަށްޓަކައި އެމްއެންޑީއެފް އަށް ބޭނުންވާ އަސްކަރީ އަދި ފަންނީ އެހީތެރިކަން ދެއްވުމުގައި ދެމިހުންނަވާނެކަން ވަނީ ފާހަގަ ކުރައްވާފައިވެއެވެ.
މީގެ އިތުރުން ޗީފް އޮފް ޑިފެންސް ފޯރސް، ބަންގްލަދޭޝްގެ ނޭވަލް ޗީފް އޮފް ސްޓާފް އެޑްމިރަލް އެމް. ޝަހިން އިގްބާލާ ވެސް ވަނީ ބައްދަލުކުރައްވާފައެވެ. އެގޮތުން މި ބައްދަލުވުމުގައި ޗީފް އޮފް ޑިފެންސް ފޯރސް ވަނީ ދެގައުމުގެ ޒަމާންވީ ގުޅުމަށް އަލި އަޅުއްވާލައްވާ ބަންގްލަދޭޝްގެ ނޭވީގެ ފަރާތުން ލިބޭ ތަމްރީން ފުރުސަތުތަކާއި އަދި ދިވެހިންނަށް ދިމާވާ ކާރިސާތަކުގައި ދެއްވާ އެހީތެރިކަމަށްޓަކައި ޝުކުރުއަދާ ކުރައްވާފައެވެ. އަދި ކުރިމަގުގައި ދިވެހިސިފައިންނަށް ބޭނުންވާ އިތުރު ތަމްރީން ހޯދުމާއި ބެހޭ ގޮތުން މަޝްވަރާ ކުރައްވާފައިވެއެވެ.
