16 އަހަރު ފުރުމުން ލައިސެންސް ދިނުމަށް މަޝްވަރާކުރަނީ
މިހާރު ލައިސެންސް ނެގޭ އެންމެ ހަނގު އުމުރަކީ 18 އަހަރު
އިރުއޮއްސެމުން ދިއަ ވަގުތު މާލެތޭރޭގެ މަންޒަރުތައް
ލައިސެންސް ނެގޭ އެންމެ ހަގު އުމުރަކީ 16 އަހަރުކަމުގައި ކަނޑައެޅުމަށް ލައިސަންސްގެ ޤަވައިދަށް ބަދަލުގެނައުމާއި ގުޅޭގޮތުން މަޝްވަރާކޮށްފިއެވެ.
މި މަޝްވަރާކޮށްފައިވަނީ، ރައްޔިތުންގެ މަޖިލީހުގެ ޤަވައިދު ކޮމިޓީގައި ކަމާގުޅޭ ވުޒާރާއާއި މުއައްސަސާތައް ހާޒިރުކޮށްގެން ކުރިއަށްގެންދިޔަ ކޮމިޓީ ބައްދަލުވުމެއްގައެވެ. މި ބައްދަލުވުމުގައި ރައްޔިތުންގެ މަޖިލީހުގެ ޤަވައިދު ކޮމިޓީގެ މެމްބަރުން ވަނީ ރާއްޖޭގެ ބައެއް އަވައްޓެރި ޤައުމުތަކުގައިވެސް 16 އަހަރުން ފެށިގެން ލައިސެންސް ނެގުމުގެ ހުއްދަދެމުންދާކަން ފާހަގަކުރައްވާފައެވެ. މިކަން ރާއްޖޭގައި ކުރާނަމަ މި އުމުރުގެ ކުދިންނަށް ލައިސެންސް ދޫކުރާނީ ބެލެނިވެރިންގެ ހުއްދައާއެކުކަމަށް ވިދާޅުވިއެވެ. މެމްބަރުންވަނީ މިކަމުގައި ޓްރާންސްޕޯޓް މިނިސްޓްރީއާއި، ދިވެހި ފުލުހުން މިކަމުގައި ދެކޭގޮތާއި ގުޅޭގޮތުން މަޝްވަރާއަށް އައްސަވާފައެވެ.
ކޮމިޓީ ބައްދަލުވުމުގައި ވާހަކަދައްކަވަމުން ފުލުހުން ވަނީ، 18 އަހަރުން ދަށުގެ ގިނަ އަދަދެއްގެ ކުޑަކުދިން މިހާރުވެސް ލައިސެންސްއާއި ނުލާ އެއްގަމު އުޅަނދު ދުއްވައިގެން ޖޫރިމަނާކޮށްފައިވާކަން ފާހަގަކޮށްފައެވެ. އެގޮތުން 2016 ވަނަ އަހަރުން ފެށިގެން މިހާތަނަށް އައިރު، މިފަދަ 336 ކުއްޖެއް ޖޫރިމަނާކޮށްފައިވާކަން ފުލުހުން ފާހަގަކުރެއްވިއެވެ. މިކުދިންގެ ތެރެއިން ބައެއް ކުދިން އެއް ލައްކައަށްވުރެ ގިނަ ރުފިޔާ ޖޫރިމަނާގެގޮތުގައި އަރާފައިވާކަން ފާހަގަކުރައްވާ ފުލުހުންވަނީ މިގޮތައް އެންމެ ގިނައިން ލަސެންސް ނެތި އެއްގަމު އުޅަނދު ދުއްވަނީ 17 އަހަރުގެ ކުދިންކަމަށް ތަފާސްހިސާބުތަކުން ހާމަވާކަމަށް ބުނެފައެވެ. މިފަދަ ކުދިން އާންމުގޮތެއްގައި ބޭނުންކުރަނީ މައިންބަފައިން ނުވަތަ އާއިލާގެ މީހެއްގެ އުޅަނދެއްކަން ފާހަގަކުރައްވާ ފުލުހުން ވަނީ 16 އަހަރުން ފެށިގެން ލައިސެންސް ނެގުމުގެ ހުއްދަދިނުމުގައި އިތުރައް ބަލާ ހަރުދަނާ ފިޔަވަޅުތަކެއް އެކަށައަޅަން ޖެހޭކަން ފާހަގަކުރައްވާފައެވެ. ފުލުހުން ވަނީ ލައިސެންސް ޤަވައިދަށް އެންމެ ފަހުން ގެނައި އިސްލާހުގެ ދަށުން މިހާރު ލައިސެންސް ނުލާ ދުއްވާ ފަރާތް އެއް ހާސް ރުފިޔާއިން، އުޅަނދުގެ ވެރިފަރާތް ދެ ހާސް ރުފިޔާއިން އަދި އުޅަނދު 15 ދުވަހަށް ޓޯކުރުމުން މިފަދަ މައްސަލަތައް މަދުވަމުން އަންނަކަން ފާހަގަކުރެވޭކަމަށް ވިދާޅުވެފައެވެ.
މި ބައްދަލުވުމުގައި ވާހަކަމުން ޓްރާސްޕޯޓް މިނިސްޓްރީއިން ވަނީ މިކަމުގައި މަޝްވަރާކޮށް ރައްޔިތުންނަށް އެންމެ ފައިދާ ހުރިގޮތެއް ހޯދުމަކީ މުހިންމުކަމެއްކަމުގައި ވިދާޅުވެފައެވެ. ޓްރާންސްޕޯޓް މިނިސްޓްރީއިން ވަނީ 18 އަހަރުން ދަށުގެ ކުދިންގެ ޖޫރިމަނާގެ ކަންކަން ހައްލުކުރުމަށް އެކުދިން މުޖުތަމަޢުއަށް ފައިދާހުރި ކަމެއްކޮށްގެން ނުވަތަ ކޮމިއުނިޓީ ސަރވިސްގެ ގަޑިއިރު ފުރިހަމަކޮށެގެން ޖޫރިމަނާއިން ކެނޑޭގޮތައް ޤަވައިދަށް އިސްލާހު ގެނެސް އަންނަ ހަފުތާގައި އޮޑިޓަރ ޖެނެރަލްއަށް ހުށަހަޅާނެކަމަށް ބުނެފައެވެ. އަދި މި އިސްލާހަށް އަމަލީ ސިފަ އަންނަ މަސްއަންނަންވާއިރަށް ގެނެސް ގެޒެޓްކުރުމަށް މަސައްކަތްކުރަމުންދާކަމަށް ޓްރާންސްޕޯޓް މިނިސްޓްރީއިން މި ބައްދަލުވުމުގައި ވަނީ ބުނެފައެވެ.
