ތިން މީހުންނާއެކު ދަތުރުކުރަމުން ދިޔަ ކޮޅުވެއްޓިއެއް ބަންޑުން ޖަހާލައިފިއެވެ.
އެމްއެންޑީއެފް އިން ބުނި ގޮތުގައި ބަންޑުންޖަހާލި އުޅަނދަކީ މާލެއިން ފުރައިގެން ތ. އަތޮޅު ގުރައިދޫއަށް ދަތުރުކުރަމުންދިޔަ "ޝަފުރާޒް" ނަމަކަށް ކިޔާ އުޅަނދެކެވެ.
ހާދިސާގެ ރިޕޯޓު އެމްއެންޑީއެފަށް ލިބިފައިވަނީ ބުރާސްފަތި ދުވަހު 13:13 ހާއިރު ކަމަށް އެމްއެންޑީއެފުން މައުލޫމާތުދެއެވެ.
އޭގައި ތިބި ތިން މީހުންނަށް ފަރުވާ ދިނުމަށްޓަކައި އޭރު އެ ސަރަހައްދުން ދަތުރުކުރަމުންދިޔަ ދޯންޏެއްގައި އެމީހުން ވަނީ ތ.ދިޔަމިގިއްޔަށް ގެންގޮސްފަ އެވެ. އަދި އެރަށު ސިއްހީ މަރުކަޒުގައި އެމީހުންނަށް ފަރުވާދެމުން ދާކަމަށް އެމްއެންޑީއެފުން ބުނެއެވެ.
ބަންޑުން ޖަހާލި ކޮޅުވެއްޓީގައި ބަރުކޮށްފައި ހުރީ ފެނަކަ ކޯޕަރޭޝަނުގެ އިމާރާތެއް ކުރުމަށް ބޭނުންކުރާ ސާމާނުކަމަށް އެމްއެންޑީއެފުން މައުލޫމާތުދެއެވެ. އެމްއެންޑީއެފުން ބުނީ މި ހާދިސާގެ ސަބަބުން އެ ސަރަހައްދުގައި އޮޔާދާ އެއްވެސް އެއްޗެއް ނެތް ކަމަށެވެ.
މި ހާދިސާއާއި ގުޅިގެން އެމްއެންޑީއެފުގެ ސެންޓްރަލް އޭރިއާ ކޯސްޓްގާޑު ސްކަޑްރަން އިން ދަނީ ހަރަކާތްތެރިވަމުންނެވެ. ކޮޅުވެއްޓި ކަފު ޖަހައިގެން ތ. ގުރައިދޫއަށް ގެންދިއުމުގެ މަސައްކަތް ކުރަމުންދާކަމަށް ވެސް އެމްއެންޑީއެފުން މައުލޫމާތުދެއެެވެ.
