1200ށް ވުރެ ގިނަ ޕީއެސްއައިޕީ މަޝްރޫއު ކުރިއަށް އެބަދޭ - މަބްރޫކް
31 މާރިޗު 2021 | ބުދަ 12:42މިހާތަނަށް އައި އެއްވެސް ސަރުކާރަކުން މި މުއްދަތުގައި ކުރިއަށްގެންދެވިފައިވާ މިންވަރެއް ނޫން
ރައީސުލްޖުމްހޫރިއްޔާގެ އޮފީހުގެ ސްޕޯކްސްޕަރސަން މުޙައްމަދު މަބްރޫކް ޢަޒީޒް
ރާއްޖޭގެ އެކިކަންކޮޅުތަކުގައި 1200 ވުރެ ގިނަ މަޝްރޫއެއް ކުރިއަށްދާކަމަށް ސަރުކާރުން ބުނެފިއެވެ.
ބުދަ ދުވަހު ނޫސްވެރިންނާ ބައްދަލު ކުރައްވާ ވާހަކަދައްކަވަުން ރައީސް އޮފީހުގެ ސްޕޯކްސްޕަރސަން މުޙައްމަދު މަބްރޫކް ޢަޒީޒް ވިދާޅުވީ، ސަރުކާރުގެ ޕީއެސްއައިޕީ ބަޖެޓްގެ ތެރެއިން 1200ށް ވުރެ ގިނަ މަޝްރޫއު ކުރިއަށްދާއިރު، މިއީ މިހާތަނަށް އައި އެއްވެސް ސަރުކާރަކުން މި މުއްދަތުގައި ކުރިއަށްގެންދެވިފައިވާ މިންވަރެއް ނޫން ކަމަށެވެ.
މިދިޔަ މަހުގެ ތެރޭގައިވެސް 9 މަޝްރޫއެއްގެ މަސައްކަތް ނިމިފައިވާ ކަމަށާއި، 7 މަޝްރޫއެއްގެ މަސައްކަތް އިތުރަށް ފަށާފައިވާކަން މަބްރޫކު ފާހަގަކުރެއްވިއެވެ، މީގެ ތެރޭގައި ހިމެނެނީ ހޮސްޕިޓަލްތައް މަރާމާތުރު ކުރުމާއި ރަށްރަށަށް އަރާ ފޭބުމަށް އޮތް ދަތިތައް ހައްލުކުރުމަށް ބަނދަރު ހެދުމުގެ މަސައްކަތް ހިމެނޭކަމަށް މަބްރޫކް ވިދާޅުވިއެވެ.
މިހާރު ސަރުކާރުން އެއްމެ އިސްކަންދޭ އެއް ކަންތަކުގެ ތެރޭގައި ރަށްރަށުގެ ކުނި ނައްތާލުމަށް ރަނގަޅު ހައްލެއް ހޯދައިދިނުމަށް ހިންގާ ޕްރޮޖެކްޓް ހިމެނޭ ކަމަށް ވިދާޅުވިއެވެ. މި މަޝްރޫއުގެ ދަށުން މިހާތަނަށް 8 ރަށެއްގައި އެތައް ޒަމާންތަކެއް ވަންދެން ޖަމާކޮށްފައިވާ ކުނި ނަގާ ސާފުކޮށްފައިވާ ކަމަށާއި މިހާރުވެސް 6 ރަށެއްގެ މަސައްކަތް ކުރިއަށްދާކަމަށް ވިދާޅުވިއެވެ. އިތުރު 6 ރަށެއްގެ މަސައްކަތް މިއަހަރު ފެށުމަށް ހަމަޖެހިފައިވާ ކަމަށް ވިދާޅުވިއެވެ.
އަހަރުގެ މާރޗް މަހުގެ 18 ވަނަ ދުވަހުގެ ނިޔަލަށް ޕަބްލިކް ސަރވިސް އިންވެސްޓްމެންޓް ޕްރޮގްރާމަށް 533.3 މިލިއަން ރުފިޔާ ޚަރަދުކޮށްފައިވާކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކަައެވެ. މިއަހަރުގެ ޕީއެސްއައިޕީ މަޝްރޫއުތަކަށް 8,441.5 މިލިއަން ރުފިޔާ އެޕްރޫވްކޮށްފައިވާއިރު، ފާއިތުވި އަހަރުގެ މި މުއްދަތުގައި ޕީއެސްއައިޕީ މަޝްރޫއުތަކަށް ސަރުކާރުން ޚަރަދުކޮށްފައި ވަނީ 1,237.2 މިލިއަން ރުފިޔާއެވެ.
ޚަރަދުތައް ކޮށްފައިވާ ދާއިރާތަކަށް ބަލާއިރު ދަތުރުފަތުރުގެ އެކި މަޝްރޫއުތަކަށް ސަރުކާރުންވަނީ 25 މިލިއަން ރުފިޔާ ޚަރަދުކޮށްފައެވެ. ބަނދަރުގެ އެކި މަޝްރޫއުތަކަށް ހޭދަކޮށްފައިވަނީ 125.1 މިލިއަން ރުފިޔާއެވެ. އަދި އެއަރޕޯޓްގެ އެކި މަޝްރޫއުތަކަށް އަހަރުގެ މިހާތަނަށް 18.6 ޚަރަދު ކޮށްފައިވާއިރު، ބްރިޖުގެ މަޝްރޫއުތަކަށް ސަރުކާރުންވަނީ 22.2 މިލިއަން ރުފިޔާ ޚަރަދުކޮށްފައެވެ. މީގެ އިތުރުން ތައުލީމީ އެކި މަޝްރޫއުތަކަށް ޕީއެސްއައިޕީ ބަޖެޓުން 8.1 މިލިއަން ރުފިޔާވަނީ ހޭދަކޮށްފައެވެ. އަދި ތިމާވެށި ހިމާޔަތްކުރުމުގެ އެކި މަޝްރޫއުތަކަށް 14.3 މިލިއަން ރުފިޔާ ޚަރަދުކޮށްފައިވާއިރު، ފެނާއި ނަރުދަމާގެ އެކި މަޝްރޫއުތަކަށް ހޭދަކޮށްފައިވަނީ 28.7 މިލިއަން ރުފިޔާއެވެ. ސިއްހީ އަދި އިޖުތިމާއީ އެކި މަޝްރޫއުތަކަށް 1.8 މިލިއަން ރުފިޔާ ޚަރަދުކޮށްފައިވާއިރު، ނެޝަނަލް ސެކިއުރިޓީ އެންޑް ޕަބްލިކް އޯޑަރުގެ އެކި މަޝްރޫއުތަކަށް ޚަރަދުކޮށްފައިވަނީ 3.5 މިލިއަން ރުފިޔާއެވެ.
އޮފީސް އިމާރާތްތަކަށާއި ކައުންސިލްތަކަށް 1.8 މިލިއަން ރުފިޔާ ހޭދަކޮށްފައިވާއިރު، އިމާރާތްކުރުމުގެ އެކި މަޝްރޫއުތަކަށް 36.9 މިލިއަން ރުފިޔާ ވަނީ ޚަރަދުކޮށްފައެވެ. އޭގެ އިތުރުން ބިން ހިއްކުމާއި މަގު ހެދުމަށް ޕީއެސްއައިޕީ ބަޖެޓުން 69.2 މިލިއަން ރުފިޔާ ހޭދަކޮށްފައިވާއިރު، މަސްވެރިކަމާއި ދަނޑުވެރިކަަމުގެ އެކި މަޝްރޫއުތަކަށް 1.7 މިލިއަން ރުފިޔާވަނީ ހޭދަކޮށްފައެވެ. ފިނޭންސްގެ ތަފާސްހިސާބުތައް ދައްކާގޮތުން މަރޗް 18ގެ ނިޔަލަށް ސަރުކާރުން ވަނީ 4,928 މިލިއަން ރުފިޔާ ޚަރަދުކޮށްފައެވެ. އެގޮތުން ރިކަރަންޓް އެކްސްޕެންޑިޗަރގެ ގޮތުގައި 3,640.2 މިލިއަން ރުފިޔާ ޚަރަދުކޮށްފައިވާއިރު، ކެޕިޓަލް އެކްސްޕެންޑިޗަރގެ ގޮތުގައި 1,287.8 މިލިއަން ރުފިޔާ ވަނީ ޚަރަދުކޮށްފައެވެ. އަދި ދައުލަތުގެ ލޯނުތައް ދެއްކުމަށް 223.5 މިލިއަން ރުފިޔާ ޚަރަދުކޮށްފައިވާއިރު، ސޮވެރިން ޑިވެލޮޕްމެންޓް ފަންޑަށް 62.2 މިލިއަން ރުފިޔާ ވަނީ ޓްރާންސްފަރ ކޮށްފައެވެ.
