ޑޮކްޓަރުންނާއި ނަރުހުންގެ ތެރެއިން ފްލެޓް ލިބޭނެ ކަމަށް މިހާރު ކަނޑައެޅިފައިވާ މީހުންނާއި މަޝްވަރާ ކުރުމަށްފަހު ފްލެޓް ދޫކޮށްލުމަށް އެދޭ މީހުންނަށް އެހެން މަޝްރޫއުތަކުގެ ތެރެއިން އެ މީހުންނަށް ލިބޭ އާމްދަނީއާއި ދިރިއުޅުމުގެ ހާލަތަށް އެންމެ އެކަށޭނެ ގިންތިއަކުން ފްލެޓް ލިބޭނެ ކަމުގެ ޔަގީންކަން ސަރުކާރުން ދިނުމަށް ރައްޔިތުންގެ މަޖިލީހުން ފާސް ކޮށްފިއެވެ.

ސަރުކާރުގެ ބޯހިޔާވަހިކަމުގެ ސިޔާސަތާއި ހިޔާ މަޝްރޫއުގެ ފްލެޓްތައް ދިނުމާއި ގުޅޭގޮތުން ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީން ދިރާސާކޮށް ވަނީ ރިޕޯޓެއް އެކުލަވާލާފައެވެ. މިރިޕޯޓަށް ގަލޮޅު ދެކުނު ދާއިރާގެ މެމްބަރ މީކާއިލް ނަސީމް މިއިސްލާހު ހުށަހަޅުއްވަމުން ވިދާޅުވީ ހިޔާ މަޝްރޫއަކީ އިޖުތިމާއީ ބޯހިޔާ ވަހިކަމަށް އަމާޒުކުރެވިފައިވާ މަޝްރޫއަކަށް ވީހިނދު އެ މަޝްރޫއުގެ ދަށުން ފްލެޓް ލިބޭ މީހުންނަކީ އިޖްތިމާއީ ބޯހިޔާވަހިކަމަށް ބޭނުން ޖެހިފައިވާ ބައެއްކަން ކަށަވަރު ކުރުމަކީ މުހިއްމު ކަމެއް ކަމަށެވެ. މިއިސްލާހު ފާސްކުރުމަށް ނެގުނު ވޯޓުގައި ބައިވެރިވެވަޑައިގެންނެވި 33 މެމްބަރުން ވަނީ މިއިސްލާހު ފާސްކުރުމަށް ވޯޓު ދެއްވާފައެވެ. އިސްލާހާއެކު ގައުމީ ތަރައްޤީ އާއި ތަރިކައިގެ ކޮމިޓީ ރިޕޯޓް ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 33 މެމްބަރުންގެ އިއްތިފާގުންނެވެ.

މި މައްސަލަ ކޮމިޓީން ދިރާސާކޮށް ހުށައަޅާފައިވާ ބައެއް ކަންކަމުގެ ތެރޭގައި 2018 ވަނަ އަހަރު ދަފްތަރުގައި ގިނަ އަދަދަކަށް އެއްފަހަރާ މީހުން ޖެހިފައިވާ އުސޫލުތައް ސާފުވާން ނެތުމުން، މާލެ ސިޓީ ކައުންސިލުން އެކަން ހިނގާފައިވާގޮތް ރަނގަޅަށް ދިރާސާކޮށް ބެލުމަށް ވަނީ އަންގާފައެވެ. އަދި ދަފްތަރުގައި މިހާތަނަށް ޖެހި، ބޯހިޔާވަހިކަން ހަމަޖެހިފައި ނުވާ މީހުންނާއި، މާލޭގެ ރައްޔިތުންގެ ތެރެއިން ބޯހިޔާވަހިކަން ހަމަޖެހިފައި ނުވާ މީހުންނަށް ސަރުކާރުގެ ފަރާތުން އަވަސް ހައްލެއް ހޯދައިދިނުމަށާއި، ދަފްތަރާ ގުޅޭގޮތުން ހަރުދަނާ ސިޔާސަތުތަކެއް ސަރުކާރުން އެކުލަވާލުމަށް ވެސް އަންގާފައިވެއެވެ.

މި ރިޕޯޓު އެކުލަވާލުމުގައި ކޮމިޓީން ވަނީ ހިޔާ މަޝްރޫއުގެ ފްލެޓްތައް ދީފައިވާ ގޮތާއި ސަރުކާރުގެ ބޯހިޔާވަހިކަމުގެ ސިޔާސަތު ރާވާފައިވާ ގޮތުގެ އިތުރުން ބޯހިޔާވަހިކަމުގެ ސިޔާސަތުގެ ދަށުން، މާލޭގެ ދަފްތަރާ ގުޅޭގޮތުން ސަރުކާރުން ކަނޑައަޅާފައިވާ ސިޔާސަތުތައް ދިރާސާ ކޮށްފައެވެ.