ކަނޑު އުޅަނދުފަހަރު ދުއްވުމާބެހޭ ގާނޫނަށް އިސްލާހު ގެނައުމުގެ ބިލުގެ ބަހުސް ފަށައިފި
މި އިސްލާހުގައި ވަނީ އެ ގާނޫނުގެ 6 ވަނަ މާއްދާގެ (ށ) ގެ (27) ވަނަ ނަންބަރުގެ ފަހަތަށް ތިން ނަންބަރެއް އިތުރު ކުރުމަށް
ރައްޔިތުންގެ މަޖިލިސް
ސަރުކާރުގެ ފަރާތުން، ހޮޅުދޫ ދާއިރާގެ މެންބަރު ޔޫނުސް އަލީ ހުށަހަޅުއްވާފައިވާ، ކަނޑުގައި އުޅަނދުތައް ދުއްވުމާބެހޭ ގާނޫނަށް އިސްލާހު ގެނައުމުގެ ބިލުގެ ބަހުސް ރައްޔިތުންގެ މަޖިލީހުން ފަށައިފިއެވެ.
މި އިސްލާހުގައި ވަނީ އެ ގާނޫނުގެ 6 ވަނަ މާއްދާގެ (ށ) ގެ (27) ވަނަ ނަންބަރުގެ ފަހަތަށް ތިން ނަންބަރެއް އިތުރު ކުރުމަށެވެ. އެގޮތުން ރާއްޖޭގެ ކަނޑުގެ ސަރަހައްދުގައި ހިންގާ ކަނޑާއި ވައިގެ ދަތުރުފަތުރުގެ ސަރޗް އެންޑް ރެސްކިއު އޮޕަރޭޝަންތައް ހަރުދަނާކުރުމަށް އެހީތެރިވުމާއި، އެކަންކަން ވިލަރެސްކުރުން އިތުރު ކުރުމަށް ހުށައަޅާފައިވެއެވެ. އަދި ކަނޑުގައި ދުއްވާ އުޅަނދުފަހަރަށް ދިމާވާ އެކިއެކި ހާދިސާތަކާއި އެކްސިޑެންޓްތައް ތަހުގީގުކުރުމާއި، އެފަދަ ކަންކަމާ ބެހޭގޮތުން ކަމާބެހޭ ފަރާތްތަކަށް ލަފާދިނުމާއި، ފިޔަވަޅުތައް އެޅުމަށް ވެސް މި އިސްލާހުގައި ވެއެވެ.
މީގެ އިތުރުން އެއްގަމާއި ދަތުރުފަތުރުގެ ދާއިރާގެ ހޯދުންތަކާއި، ދިރާސާތަކާއި، ތަހުގީގުތަކާއި، ތަފާސްހިސާބުތައް އެއްކުރުމާއި، މިކަންކަމާ ގުޅިގެން އެކުލަވާލަންޖެހޭ ރިޕޯޓްތައް އެކުލަވާލައި ޝާއިއު ކުރުމަށް މި އިސްލާހުގައި ވަނީ ބަޔާން ކޮށްފައެވެ. މި ބިލު ހުށައަޅުއްވަމުން މެންބަރު ޔޫނުސް ވިދާޅުވީ ބިލު ހުށަހެޅީ، ކަނޑުދަތުރުފަތުރުކުރުމާއި ދަތުރުފަތުރުކުރުމުގެ ކަންކަން ހިންގުން ހަރުދަނާކުރުމުގެ ގޮތުން، މޯލްޑިވްސް ޓްރާންސްޕޯޓް އޮތޯރިޓީގެ ގާނޫނު އުވާލައި، އެ ގާނޫނުގެ ދަށުން އުފައްދާފައިވާ މޯލްޑިވްސް ޓްރާންސްޕޯޓް އޮތޯރިޓީން ކުރަމުން ގެންދިޔަ މަސައްކަތްތައް، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނަށް ބަދަލުކުރުމަށް ސަރުކާރުން ނިންމާފައިވާތީ ކަމަށެވެ.
އަދި ޓްރާންސްޕޯޓް އޮތޯރިޓީގެ މަސްއޫލިޔަތުތަކުގެ ތެރޭގައި ހިމެނޭ ކަންކަމުގެ ތެރެއިން، ކަނޑުދަތުރުފަތުރާ ގުޅޭގޮތުން ގަވާއިދު ހެދުމުގެ ބާރު ގާނޫނަކުން ޓްރާންސްޕޯޓް މިނިސްޓްރީއަށް ލިބިދީފައިނުވާ ކަންކަމުގައި ގަވާއިދު ހެދުމުގެ ބާރު އެ މިނިސްޓްރީއަށް ލިބިދިނުމަށްޓަކައި ކަމަށެވެ.
