ވަރކް ޕަރމިޓަށް އެދޭއިރު އިނގިރޭސި ލިޔެކިއުން ހުށައެޅުމަށް އެދިއްޖެ
އިނގިރޭސި ބަސް ނޫން އެހެން ބަހަކުންއޮތް ލިޔެކިއުންތަކުގެ އިނގިރޭސި ތަރުޖަމާ، އަސްލާއެއްގޮތްކަމަށް ބަޔާންކޮށް ހުށައަޅަންޖެހޭ
ރާއްޖޭގައި ދިރިއުޅޭ ބިދޭސީ މަސައްކަތްތެރިން
ވަރކް ޕަރމިޓަށް އެދި ހުށައަޅާއިރު، މިނިސްޓްރީއަށް ހުށައަޅާ ހުރިހާ ލިޔެކިއުންތައް އިނގިރޭސިބަހުން ހުށައެޅުމަށް އިކޮނޮމިކް މިނިސްޓްރީން އެދިއްޖެއެވެ.
އިކޮނޮމިކް މިނިސްޓްރީން ނެރެފައިވާ ބަޔާނެއްގައި ބުނެފައި ވަނީ ވަރކް ޕަރމިޓް ހޯދުމަށް އެދި ހުށަހަޅާ ފޯމާއެކު ހުށަހަޅާ ލިޔެކިޔުންތަކުގެ ތެރޭގައި، އިނގިރޭސި ބަސް ނޫން އެހެން ބަހަކުންއޮތް ތައުލީމީ ނުވަތަ އެހެންވެސް ސެޓްފިކެޓެއް ނުވަތަ ލިޔުމެއް ނަމަ، އެ ފަދަ ސެޓްފިކެޓްތަކާއި ލިޔުންތައް، ބަލައިގަނެވޭނީ، އިނގިރޭސި ބަހުން ކަމަށް ބުނެފައެވެ. އަދި އެ ސެޓްފިކެޓެއް ނުވަތަ ލިޔުމެއް ދޫކޮށްފައިވާ މަރުކަޒަކުން އެ ސެޓްފިކެޓް ނުވަތަ ލިޔުމުގެ އިނގިރޭސި ތަރުޖަމާ، އަސްލާ އެއްގޮތްކަމަށް ބަޔާންކޮށް، ހުށަހެޅުމަށް ވަނީ ބުނެފައެވެ.
ފެބްރުއަރީ 15 ގައި ރާއްޖޭގައި ވަޒީފާ އަދާކުރާ ބިދޭސީންނަށް ވަރކް ޕަރމިޓް ދޫކުރަން ފަށާފައިވާއިރު، މިނިސްޓްރީން ވަނީ ބިދޭސީންގެ ވަރކް ޕާރމިޓް ހެއްދުމަށް, ނަގަންޖެހޭ "ވަރކް ޕަރމިޓް ހެލްތް ކަވަރ ނުވަތަ އިންޝޫރެންސް"، އިކޮނޮމިކް މިނިސްޓްރީން ބަލައި ގަންނާނީ، އެ މިނިސްޓްރީގައި ރަޖިސްޓްރީވެފައިވާ އިންޝޫރެންސް ޚިދުމަތް ފޯރުކޮށްދޭ ފަރާތްތަކުން ހޯދާފައިވާ "މިނިމަމް ރިކުއަރމެންޓް" ފުރިހަމަވާ "ވަރކް ޕަރމިޓް ހެލްތް ކަވަރ ޕެކޭޖްތައް ކަމަށް ބުނެފައެވެ.
މީގެ އިތުރުން އިކޮނޮމިކް މިނިސްޓްރީން ވަނީ ކޮވިޑްގެ ސަބަބުން ދަތުރުފަތުރު ކުރުމުގައި ކުރިމަތިވި ދަތިތަކާއި ގުޅިގެން ރާއްޖެއަށް ގެނެވޭ ބިދޭސީ މަސައްކަތްތެރިންނަށް ދޫކުރަމުން އައި ސްޕެޝަލް އެކްސްޓެންޝަންގެ ހިދުމަތް އޭޕްރިލް އެކަކުން ފެށިގެން ހުއްޓާލަން ނިންމާފައެވެ.
