ގެއްލިގެން ހޯދަމުންދިޔަ ސިފައިންގެ މީހާގެ ހަށިގަނޑު ކަނޑުގެ އަޑިން ފެނިއްޖެ
30 މާރިޗު 2021 | އަންގާރަ 16:38ނިޔާވީ ލާންސް ކޯޕަރަލް ހުސައިން ފާރިޝް
ގެއްލިގެން ހޯދަމުން ދަނިކޮށް ކަނޑު އަޑީގައި އޮއްވާ ފެނުނު ހުސައިން ފާރިޝް
ލ. ކައްދޫގެ އިތުރުމަތީ ފަރާތު މޫދަށް ފޭބި 4 ސިފައިންގެ ތެރެއިން އޮޔާ ދަމައިގަތުމުގެ ސަބަބުން ހޯދަމުން ދިޔަ ސިފައިންގެ މީހާގެ ހަށިގަނޑު ކަނޑުގެ އަޑީގައި އޮއްވާ ފެނިއްޖެއެވެ.
އެމްއެންޑީއެފުން ބުނީ އަންގާރަ ދުވަހުގެ ހަވިރު 5:40 ހާއިރު، ލ. ކައްދޫ އިރުމަތީ ފަރާތު މޫދަށް ފޭބި 4 ސިފައިންގެ ތެރެއިން ލާންސް ކޯޕަރަލް ހުސައިން ފާރިޝް ގެއްލިގެން އޭނާ ހޯދުމުގެ މަސައްކަތް އެމްއެންޑީއެފް ސެންޓްރަލް އޭރިއާ ކޯސްޓް ގާޑު ސްކޮޑްރަންގެ ޑްރައިވަރުން ފެށި ކަމަށެވެ. އަދި އޭނާގެ ހަށިގަނޑު ކަނޑުގެ އަޑީގައި އޮއްވާ ފެނިފައިވާ ކަމަށް އެމްއެންޑީއެފުން ބުނެއެވެ.
އަދި މި 4 މީހުންގެ ތެރެއިން އިތުރު ސިފައިންގެ މީހެއް ގެނބިގެން ހޮސްޕިޓަލަށް ގެނެސް ފަރުވާދޭން ފަށާފައިވާ ކަމަށާއި، އޭނާ ގެނބުނީ ގެއްލުނު ސިފައިންގެ މީހާ އޮއިގަނޑެއްގައި ޖެހި އަޑިއަށް ދާތީ ސަލާމަތް ކުރުމަށް މަސައްކަތް ކުރުމުގެ ތެރޭގައި ކަމަށެވެ. އަދި ހޮސްޕިޓަލަށް ގެންދެވުނު ސިފައިންގެ މީހާގެ ހާލު ރަނގަޅުވަމުން އަންނަ ކަމަށް ވެސް އެމްއެންޑީއެފުން ބުނެއެވެ.
އެމްއެންޑީއެފުން ބުނީ ގެއްލުނު ސިފައިންގެ މީހާ ހޯދާފައިވަނީ އެ ސަރަހައްދުގައި މަސައްކަތް ކުރަމުންދާ ކޯސްޓްގާޑުގެ ޑައިވަރުންގެ ޓީމުން ކަމަށެވެ.
ސިފައިންގެ 4 މީހުން މޫދަށް ދިޔައީ އޮފް ޑިއުޓީގައި ކަމަށް ވެސް އެމްއެންޑީއެފުން ބުނެއެވެ.
