ވަގުތީ ލިޔުމެއްގައި ނޫނީ ދަތުރުކުރުމަށް ހުއްދަ ނުދެވޭނޭ ގޮތަށް އުސޫލު ބަދަލުކުރަން ހުށައަޅައިފި
30 މާރިޗު 2021 | އަންގާރަ 12:59ވީ އެންމެ އަވަހަކަށް އިސްލާހުތައް އެކުލަވާލައްވައި، ރައްޔިތުންގެ މަޖިލީހަށް ހުށަހެޅުއްވުމަށް އެޓާނީ ޖެނެރަލަށް ދެންނެވުމަށް ނިންމާފައިވޭ
ޖުޑިޝަރީ ކޮމެޓީގެ ބައްދަލުވުމުގެ ތެރެއިން
ޖިނާއީ ބޮޑު ކުށެއްގެ ދައުވާ އުފުލިފައިވާ މީހެއްނަމަ، ނުވަތަ އެފަދަ ކުށެއްގެ ތަހުގީގެއް ހިނގަމުންދާ މީހެއްނަމަ، އެމީހެއްގެ ޕާސްޕޯޓު ހިފަހައްޓާ ހާލަތުގައި، ދަތުރުކުރުމުގެ ވަގުތީ ލިޔުމެއްގައި ނޫނީ ދަތުރު ބޭރަށް ނުކުރެވޭނެ ގޮތަށް އުސޫލު ބަދަލުކުރުމަށް ޖުޑީޝަރީ ކޮމިޓީން ހުށައަޅައިފިއެވެ.
ކުރީގެ މިނިސްޓަރ އޮފް ޓޫރިޒަމް އަލީ ވަހީދުގެ މައްޗަށް ކްރިމިނަލް ކޯޓުން ނެރުނު ފުރުން މަނާކުރުމުގެ އަމުރު ބާތިލުކޮށްފައިވާ މައްސަލައާ ގުޅިގެން ރައްޔިތުންގެ މަޖިލީހުގެ 4 މެންބަރުން ސޮއިކުރައްވައި ހުށަހަޅުއްވާފައިވާ މައްސަލަ ޖުޑީޝަރީ ކޮމިޓީން ދިރާސާކޮށް ނިންމިގޮތުގެ ރިޕޯޓުގައި ބުނަނީ ޖިނާއީ ބޮޑު ކުށެއްގެ ދައުވާއެއް އުފުލިފައިވާ މީހެއްނަމަ ނުވަތަ އެފަދަ ކުށެއްގެ ތަހުގީގުއް ހިނގަމުންދާ މީހެއްނަމަ، އެމީހެއްގެ ޕާސްޕޯޓު ހިފަހައްޓާ ހާލަތުގައި، ރާއްޖެއިން ބޭރަށް ފުރުމަށް ހުއްދަދޭންޖެހޭ ސަބަބުގެ އިތުރަށް، މައްސަލައިގެ ބާވަތަށާއި އަދި މައްސަލައިގެ ވަށައިގެންވާ އެންމެހައި ކަންކަމަށް އެންމެ ފުޅާމިނެއްގައި ރިއާޔަތްކުރުމަށް ހުށައަޅާ ކަމަށެވެ.
އަދި ޝަރީއަތުގެ އަޑުއެހުންތަކަށް ދަތުރުތަކުގެ ސަބަބުން ހުރަސްނޭޅޭނެ ގޮތަށް ކޯޓުގެ ނިޒާމު ފުރިހަމަ ކުރުމާއި ޕާސްޕޯޓު ހިފެހެއްޓުންފަދަ، ކުށުގެ ތުހުމަތުކުރެވޭ ނުވަތަ ދައުވާލިބޭ ފަރާތުގެ ހައްގުތައް ހިފަހައްޓާ މައްސަލަތަކުގެ ތަހުގީގު އަވަސްކުރުމާއި ތަހުގީގު އިދާރާތަކުން އަވަސްކޮށްދެއްވުމަށް ބާރުއެޅުއްވުމަށާއި، ނުވަތަ ކޯޓުން މައްސަލަތައް ނިންމުން އަވަސްކޮށްގެން، ކުށް ސާބިތުނުވާ ފަރާތްތަކުގެ ޕާސްޕޯޓު އަވަހަށް ވީއްލައި އެ ފަރާތްތަކުގެ ދަތުރުފަތުރު ކުރުމުގެ ހައްގަށް އެއްވެސް މިންވަރަކަށް ހުރަސް ނޭޅޭނެ ގޮތަށް އިސްލާހު ކުރުމަށް ވެސް މި ރިޕޯޓުގައި ބާރުއަޅާފައިވެއެވެ.
މީގެ އިތުރުން މި ހުށަހެޅުންތަކަށް ފަހިވާނޭގޮތަށް ގާނޫނުތަކަށް ގެންނަންޖެހޭ އިސްލާހުތަކެއް ވާނަމަ، އެ އިސްލާހުތައް ފާހަގަކުރައްވައި، ވީ އެންމެ އަވަހަކަށް އެ އިސްލާހުތައް އެކުލަވާލައްވައި، ރައްޔިތުންގެ މަޖިލީހަށް ހުށަހެޅުއްވުމަށް އެޓާނީ ޖެނެރަލަށް ދެންނެވުމަށް ނިންމާފައިވެއެވެ. ކޮމިޓީ ރިޕޯޓުގައި އިތުރަށް ބުނީ މި މައްސަލައިގައި ފާހަގަކުރެވިފައިވާ މައިގަނޑު ކަންބޮޑުވުމަކީ ކްރިމިނަލް ކޯޓުން އަލީ ވަހީދު ފުރުމަށް ހުއްދަ ދީ އޭނާގެ ޕާސްޕޯޓު ދޫކުރި ދޫކުރުން ކަމަށެވެ.
