ސޭފް ސްކޫލް ޑެކްލަރޭޝަންގައި ބައިވެރިވުމަށް މަޖިލީހުން ފާސްކޮށްފި

ސޭފް ސްކޫލް ޑެކްލަރޭޝަންގައި ބައިވެރިވުމަށް ރައްޔިތުންގެ މަޖިލީހުން ފާސްކޮށްފިއެވެ.

އަންގާރަ ދުވަހު ރައްޔިތުންގެ މަޖިލީހުގައި މި ޑެކްލަރޭޝަންގައި ދިވެހިރާއްޖެއިން ބައިވެރިވުމަށް ފެންނަ ކަމަށް ނިންމާފައިވަނީ 33 މެންބަރުންގެ އިއްތިފާގުންނެވެ.

މަޖިލީހުން މިކަމާއިމެދު ގޮތެއް ނިންމެވުމަށް އެދި ރައީސުލްޖުމްހޫރިއްޔާ މަޖިލީހަށް ފޮނުއްވި ސިޓީގައި އަސްކަރީ ހަމަނުޖެހުންތަކުން ދަރިވަރުންނާއި މަދަރުސާތަކާއި ޔުނިވަރސިޓީތައް އަދި ޓީޗަރުން ރައްކާތެރިކުރުމަށް ސިޔާސީ ގޮތުން ލާޒިމްކުރާ ބައިނަލްއަގްވާމީ މުއާހަދާކަމުގައިވާ ސޭފް ސްކޫލް ޑެކްލަރޭޝަންގައި ބައިވެރިވުމަށް ވަޒީރުންގެ މަޖިލީހުން ނިންމަވާފައިވާކަމަށް ވިދާޅުވެފައިވެއެވެ. ޖެނުއަރީ މަހުގެ 12 ވަނަ ދުވަހު ބޭއްވި ވަޒީރުންގެ މަޖިލީހުގެ ބައްދަލުވުމުގައި މިޑެކްލަރޭޝަންގައި ބައިވެރިވުމަށް ނިންމަވާފައިވާތީ އެކަމާ ގުޅިގެން ރައްޔިތުންގެ މަޖިލީހުން ގޮތެއް ނިންމަވައިދެއްވުމަށް އެދިވަޑައިގަންނަވާ ކަމަށް ސިޓީގައިވެއެވެ.

މި ޑެކްލަރޭޝަން އެކުލަވައިލާފައި ވަނީ އަސްކަރީ ހަމަނުޖެހުންތަކުން ރައްކާތެރިވެ ތިބެ އުނގެނުމަށް ކޮންމެ ދަރިވަރަކަށް ލިބިގެންވާ ހައްގު ކަށަވަރު ކޮށްދިނުމަށާއި ރައްކާތެރި މާހައުލެއްގައި ގަދަރުވެރިކަމާއެކު އުނގަންނައި ދިނުމަށް ކޮންމެ މުދައްރިސަކަށް ލިބިގެންވާ ހައްގު ކަށަވަރު ކޮށްދިނުމަށެވެ. މީގެ އިތުރުން ހަނގުރާމައިގެ ހާލަތްތަކުގައި ވެސް މަދަރުސާތަކާއި ޔުނިވާސިޓީތަކަކީ ތައުލީމު ލިބިގަތުމަށާއި އިލްމީ ދިރާސާ ކުރުމަށް ރައްކާތެރި ތަންތަން ކަމުގައި ކަށަވަރު ކޮށްދިނުމަކީ ވެސް އެ ޑެކްލަރޭޝަންގެ މަގްސަދުތަކުގެ ތެރޭގައި ހިމެނޭ ކަމެކެވެ.

ރައީސުލްޖުމްހޫރިއްޔާ ފޮނުއްވާފައިވާ މި މައްސަލަ ޚާރިޖީ ގުޅުންތަކުގެ ކޮމިޓީން ދިރާސާކޮށް ނިންމިގޮތުގެ ރިޕޯޓުގައި ބުނީ މި ޑެކްލަރޭޝަނުން ލިބިދީފައިވާ އިންސާނީ ހައްގުތަކަކީ ދިވެހިރާއްޖޭގެ ގާނޫނު އަސާސީން ރައްޔިތުންނަށް ކަށަވަރު ކޮށްދީފައިވާ ހައްގުތަކެއް ކަމަށާއި މި ޑެކްލަރޭޝަން ބަލައިގަތުމުގެ ސަބަބުން ހައްގުތައް ކަށަވަރުކުރުމަށް އިތުރު ބާރަކަށް ވެގެންދާނެ ކަމަށެވެ.

ސޭފް ސްކޫލް ޑެކްލަރޭޝަނުގައި ގައުމުތަކުން ބައިވެރިވުމަށް ހުޅުވައިލާފައި ވަނީ 2015 މެއި 29 ވަނަ ދުވަހު ބޭއްވި "ދަ އޯސްލޯ ކޮންފަރެންސް އޮން ސޭފް ސްކޫލް" ގައެވެ.