ޖާބިރު ހުށައެޅުއްވި ކުއްލި މައްސަލަ މަޖިލީހުން ބޭރުކޮށްލައިފި

ކޮވިޑާ ގުޅިގެން އަޅާފައިވާ ފިޔަވަޅުތަކަށް ރޯދަމަހު ލުއި ދިނުމަށް ގޮވާލައި ކާށިދޫ ދާއިރާގެ މެންބަރު އަބްދުﷲ ޖާބިރު ހުށަހަޅުއްވި ކުއްލި މައްސަލަ ރައްޔިތުންގެ މަޖިލީހުން ބޭރު ކޮށްލައިފިއެވެ.

އަންގާރަ ދުވަހު ރައްޔިތުންގެ މަޖިލީހުގައި މި މައްސަލަ ބަލައިގަނެ ބަހުސް ކުރަން ފެނޭތޯ ނެގުނު ވޯޓުގައި ބައިވެރިވި 26 މެންބަރުންގެ ތެރެއިން ބަހުސް ކުރަން ނުފެންނަ ކަމަށް 23 މެންބަރުން ވޯޓު ދެއްވިއިރު 2 މެންބަރަކު ފެންނަ ކަމަށް ވޯޓު ދެއްވިއެވެ.

މި މައްސަލަ ހުށައަޅުއްވަމުން ޖާބިރު ވިދާޅުވީ ދުނިޔެއަށް ކުރިމަތިވެފައިވާ ކޮވިޑް-19ގެ ސަބަބުން ސިއްހީ ކުއްލި ނުރައްކަލުގެ ހާލަތުގައި ސަރުކާރުން އަޅުއްވާފައިވާ ފިޔަވަޅުތަކަށް 01 އަހަރު ފާއިތުވެގެން ދިޔައިރު ރާއްޖޭގެ ރައްޔިތުންގެ ތެރެއިން އެތައް ބައެއްގެ ވަޒީފާ ގެއްލި، މަސްވެރި ކަމުންނާއި، ދަނޑުވެރިކަމުން އާމްދަނީ ހޯދަމުން އައި އާއިލާތައް ބިކަވެގެން ހިނގައްޖެ ކަމަށެވެ. އަދި ރާއްޖޭގެ އިގްތިސާދުގައި ހިމެނޭ ސިނާއަތްތައް ކުރިއަށް ގެންދިއުމަށް އެ ސިނާއަތްތަކުގައި ހަރަކާތްތެރިވާ ފަރާތްތަކުން ނަގާފައިވާ ބޭންކް ލޯނުތައް ނުދެއްކި ބޭންކަށް ދަރާފައިވާ ކަމަށެވެ.

މެންބަރު ޖާބިރު ވިދާޅުވީ ދިރިއުޅުމުގެ އެންމެ އަސާސީ ދެކަންތައް ކަމުގައިވާ ކަރަންޓާއި ފެނުގެ ޚިދުމަތްތަކަށް ވެސް ފައިސާ ނުދެއްކި، ރައްޔިތުން ބޮޑުތަނުން ދަރަނިވެރި ވެފައިވާ ކަމަށާއި ރޯދަމަސް ފެށެން ކުޑަ ދުވަސް ކޮޅަކަށް ވެފައިވާތީ، ރައްޔިތުންނަށް ކުރިމަތިވެފައިވާ ދަތިތަކުގެ މައްޗަށް ރިއާޔަތްކޮށް ކޮވިޑް 19 ގައިޑްލައިނަށް ބޮޑުތަނުން ލުއި ދިނުމަކީ ވެސް މުހިއްމު ކަމެއް ކަމަށެވެ.