ކޮވިޑްގެ ސަބަބުން ގެއްލުން ލިބުނު ގައުމުތައް ދަރަނި އަދާކުރުމަށް ޚާއްސަ މެކޭނިޒަމެއް ގާއިމް ކުރަންޖެހޭ- މިނިސްޓަރ ޝާހިދު

ކޮވިޑް-19 ގެ ސަބަބުން ބޮޑެތި ގެއްލުން ލިބުނު ގައުމުތައް ދެމެހެއްޓެނިވިގޮތެއްގައި އިގްތިސާދީ ހީނަރުކަމުން، އަރައިގަތުމަށް، ދަރަނި އަދާކުރުމަށް ޚާއްސަ މެކޭނިޒަމެއް ގާއިމުކުރުމަށް މިނިސްޓަރ އޮފް ފޮރިން އެފެއާޒް ޢަބްދުﷲ ޝާހިދު ގޮވާލައްވައިފިއެވެ.

މިނިސްޓަރ މިކަމަށް ގޮވާލައްވާފައިވަނީ ދުނިޔޭގެ ވިޔަފާރި ޖަމިއްޔާ (ވޯލްޑް ޓްރޭޑް އޯގަނައިޒެޝަން) އިން ވިޔަފާރިއާއި ތިމާވެއްޓާއި ދެމެހެއްޓެނިވި ތަރައްގީއާއި ބެހޭގޮތުން ބޭއްވި މަޝްވަރާ ބައްދަލުވުމުގައި ވަރޗުއަލްކޮށް ބައިވެރިވެވަޑައިގެން ވާހަކަފުޅު ދައްކަވަމުންނެވެ.

މި ޕެނަލްގައި، ތަރައްގީވަމުން އަންނަ ކުދި ޖަޒީރާ ގައުމުތަކަށް ތިމާވެއްޓާއި އިގްތިސާދީ ގޮތުންނާއި ކޮވިޑް-19 ގެ ސަބަބުން ދިމާވާ ނާޒުކު ހާލަތްތަކަށް މިނިސްޓަރ ޝާހިދު އަލިއަޅުވާލެއްވިއެވެ. އަދި ކޮވިޑް-19 ގެ ސަބަބުން ގްލޯބަލް ސަޕްލައި ޗެއިން މެދުކެނޑުމުން ދިމާވި ދަތިތަކުން އަރަތިގަތުމަށް ދިވެހި ސަރުކާރުން އެޅި ފިޔަވަޅުތައް މިނިސްޓަރ ޝާހިދު ފާހަގަކުރެއްވިއެވެ. މިގޮތުން ކާބޯތަކެތީގެ ރައްކާތެރިކަން ޔަގީންކުރުމަށް ހެދިފައިހުރި ގަވާއިދުތައް ބަދަލުކުރުމާއި، ކޮންމެހެން ބޭނުންވާ ކާބޯތަކެތި އެއްވެސް ދަތިކަމެއްނެތި ފޯރުކޮށްދިނުން، ދެމެހެއްޓެވިކަން މިނިސްޓަރ ޝާހިދު ފާހަގަކުރެއްވިއެވެ.

މިނިސްޓަރ ޝާހިދުގެ ވާހަކަފުޅުގައި ދެމެހެއްޓެނެވި ތަރައްގީގައި ވިޔަފާރިއާއި ތިމާވެށި ހިމާޔަތްކުރުމުގެ ގުޅުން ވަރުގަދަކުރުމުގެ މުހިއްމުކަމުގެ މައްޗަށް އަލިއަޅުވާލެއްވިއެވެ. މިގޮތުން ގުދުރަތީ ކާރިސާތަކުން ސަލާމަތްވުމަށް ނުވަތަ އަރައިގަތުމަށާއި، އާމްދަނީއާއި ވަޒީފާއަށް ސާފު އަދި ދެމެހެއްޓެނިވި ތިމާވެއްޓެއް ގާއިމުކުރުމަށް ކުރިއަރަމުން އަންނަ ކުދި ޖަޒީރާ (ސިޑްސް) ގައުމުތަކުގައި އެކަށީގެންވާ ވަސީލަތްތައް ގާއިމުވެފައި ނެތްކަމަށް މިނިސްޓަރު ފާހަގަކުރެއްވިއެވެ.

މީގެ އިތުރުން ތަރައްގީގެ އޮނިގަނޑާއި، ދެމެހެއްޓެނިވި އަދި މޫސުމީ ފުދުންތެރި ތަރައްގީއަށް މަގުފަހިވާގޮތަށް ވިޔަފާރިއާއި އިންވެސްޓްމެންޓްގެ ސިޔާސަތުތައް ބަދަކުރުމަކީ މުޅި ދުނިޔެއަށް ކުރިމަތިވި ކޮވިޑް-19 ގެ ބަލިމަޑުކަމުން އަރައިގަތުމުގެ ފިޔަވަހީގައި ލިބޭ މުހިއްމު ފުރުސަތެއްކަމުގައި ފާހަގަކުރެއްވިއެވެ. ދެމެހެއްޓެނިވި ތަރައްގީގެ 2030 ގެ އެޖެންޑާ ކާމިޔާބުކޮށް ފުދުންތެރި އިގްތިސާދެއް ގާއިމުކުރުމަށް އެންމެން ގުޅިގެން މަސައްކަތްކުރުމަށް ވެސް މިނިސްޓަރ ޝާހިދު ގޮވާލެއްވިއެވެ.

މި ބައްދަލުވުމުގައި ދުނިޔޭގެ ވިޔަފާރި ޖަމިއްޔާގެ އައު ޑިރެކްޓަރ ޖެނެރަލް ޑރ. އެންގޯޒި އޮކޮންޖޯ-އިވޭލާ، އދ. ގެ ޑެޕިއުޓީ ސެކްރެޓަރީ ޖެނެރަލް އަމީނާ މުހައްމަދު، އަދި އިންޓަނޭޝަނަލް ޓްރޭޑް ސެންޓަރގެ އެގްޒެކެޓިވް ޑިރެކްޓަރ ޕަމެލާ ކޯކް-ހެމިލްޓަން ވެސް ވާހަކަފުޅު ދެއްކެވިއެވެ.

މި ބައްދަލުވުން އިންތިޒާމުކުރީ ޖެނިވާގައި އދ.އަށް ކަނޑައަޅާފައި ހުންނަ ދިވެހިރާއްޖެއާއި ބާބެޑޯސްގެ ޕާމަނެންޓް މިޝަންތަކުންނެވެ.