ވެންޓިލޭޓަރުގެ ވައްކަން ބަލައިދީ އެ ކަމުގައި ޝާމިލުވާ ފަރާތްތައް ޖަވާބުދާރީ ކުރުވުމަށް ބިލެތްދޫ ދާއިރާގެ މެންބަރު އަހުމަދު ހަލީމް ހުށަހެޅުއްވި މައްސަލަ ރައްޔިތުންގެ މަޖިލީހުން ބަލައިގެންފިއެވެ.

ހޯމަ ދުވަހުގެ ރައްޔިތުންގެ މަޖިލީހުގައި މިކަމަށްޓަކައި ނެގުނު ވޯޓުގައި ބައިވެރިވި 22 މެންބަރުންގެ އިއްތިފާގުން މި މައްސަލަ މަޖިލީހުން ވަނީ ބަލައިގެންފައެވެ.

މި މައްސަލަ ހުށަހަޅުއްވަމުން ބިލެތްދޫ ދާއިރާގެ މެންބަރު ވިދާޅުވީ ކޮވިޑް 19 އާ ގުޅިގެން 75 ވެންޓިލޭޓަރު ސަޕްލައި ކޮށްދިނުމަށް ދުބާއީގެ ކުންފުންޏެއް ކަމަށްވާ އެގްޒެކިއުޓާ ޖެނެރަލް ޓްރޭޑިންއާ ހަވާލު ކުރެވުނު ކަމަށާއި އެ ވެންޓިލޭޓަރުތައް ގަތުމަށް ގެރެންޓީއަކާ ނުލައި އެ ކުންފުންޏަށް އެޑްވާންސަށް 30.91 މިލިއަން ރުފިޔާ ދީފައިވާ ކަމަށެވެ. ނަމަވެސް މިއަދާ ހަމައަށް ވެސް ވެންޓިލޭޓަރުތައް ލިބިފައި ނުވާ ކަމަށް މެންބަރު ވިދާޅުވިއެވެ.

އަދި އެ ވެންޓިލޭޓަރުތައް ލިބޭނެ ކަމުގެ ޔަގީންކަމެއް ނެތްކަމަށާއި މި ވައްކަމާ ގުޅިގެން ކުރެވޭނެ ދައުވާއެއް ނެތް ކަމުގައި ޕްރޮސެކިއުޓަރ ޖެނެރަލް ނިންމާފައިވާތީ، މި މައްސަލައަކީ މިކަމުގައި އިތުރަން ބަލައި ޖަވާބު ދާރީ ކުރަން ޖެހޭ ކަމަށް ފެންނާތީ މި މައްސަލަ ހުށަހަޅާ ކަމަށެވެ.

ހަމަ މި ޖަލްސާގައި ވެންޓިލޭޓަރުތަކާބެހޭ ކޮރަޕްޝަންގެ މައްސަލައިގެ ފުރިހަމަ ތަހުގީގެއް ކޮށް، އެކަމުގައި ޝާމިލްވާ ފަރާތްތައް އިންސާފުގެ ކުރިމައްޗަށް ހާޒިރުކޮށް، އެފައިސާ ހޯދައިދިނުމަށް ސަރުކާރަށް ގޮވާލާ މަޑުއްވަރީ ދާއިރާގެ މެންބަރު އާދަމް ޝަރީފް ވެސް ވަނީ ކުއްލި މައްސަލައެއް ހުށަހަޅުއްވާފަައެވެ.

މި ކުއްލި މައްސަލަ ހުށަހަޅުއްވަމުން މެންބަރު ޝަރީފް ވިދާޅުވީ 2020 ވަނަ އަހަރު 75 ވެންޓިލޭޓަރު ގަތުމަށް އެގްޒެކިއުޓާރސް ޖެނެރަލް ޓްރޭޑިންގ ކުންފުންޏަށް ދައުލަތުގެ މާލިއްޔަތު ގަވާއިދާ ޚިލާފަށް 31 މިލިއަން ރުފިޔާ ދީފައިވާކަން، އޮޑިޓަރ ޖެނެރަލް އޮފީހުގެ ކޮމްޕްލައަންސް އޮޑިޓް ރިޕޯޓުން ހާމަވުމާއެކު އެންޓި ކޮރަޕްޝަން ކޮމިޝަނުން ކުރި ތަހުގީގުން ވެސް މި މައްސަލާގައި ސަރުކާރުން އަމަލުކޮށްފައިވަނީ މާލިއްޔަތު ގާނޫނާއި ގަވާއިދާ ޚިލާފަށް ކަން ސާބިތުވެފައިވާ ކަމަށެވެ.