އަތޮޅުތެރޭގެ ރަށްތަކުގައި ކޭސްތައް އިތުރުވަނީ، 13 ރަށެއް މިހާރު ވެސް މޮނިޓަރިންގެ ހާލަތުގައި!
ކޭސްތައް އިތުރުވުމަކީ ވަރަށް ބޮޑު ކަންބޮޑުވުމެއް
އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެޗްޕީއޭގެ ޑިރެކްޓަރ އަހްމަދު ނާސިރު ވާހަކަދައްކަވަނީ
އަތޮޅުތެރޭގެ ރަށްތަކުގައި ކޮވިޑް-19ގެ ކޭސްތައް އިތުރުވަމުންދާއިރު އިތުރަށް ސަމާލުވާން ޖެހޭ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން ބުނެފިއެވެ.
އެޗްއީއޯސީން އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެޗްޕީއޭގެ ޑިރެކްޓަރ އަހްމަދު ނާސިރު ވިދާޅުވީ އަތޮޅުތެރޭގެ ރަށްތަކުގައި ޕޮޒިޓިވް ކޭސްތައް އިތުރުވަމުންދާކަން ފާހަގަކުރެވިފައިވާ ކަމަށެވެ. ކޭސްތައް އިތުރުވުމަކީ ވަރަށް ބޮޑު ކަންބޮޑުވުމެއްކަން ފާހަގަކުރައްވައި ނާސިރު ވިދާޅުވީ އަތޮޅުތެރޭގެ ރަށްތަކުން ކޭސްތައް ފެނި، އިތުރުވެގެންދިއުމަކީ އިތުރަށް ވިސްނަން ޖެހޭ ކަމެއް ކަމަށެވެ.
އެހެންކަމުން ބަލި ކޮންޓްރޯލް ކުރުމަށް އަޅާފައިވާ ފިޔަވަޅުތަކަށް ފަރުވާ ކުޑަ ނުކުރުމަށް ވަނީ އިލްތިމާސްކޮށްފައެވެ. އަދި ރަށްތަކުގައި ގާއިމްކޮށްފައިވާ ހެލްތް ޓާސްކްފޯސްއަށް އެއްބާރުލުންދީގެން މަސައްކަތްތައް ކުރިއަށް ގެންދިއުމަށް ނާސިރު އެދިފައިވެއެވެ.
މީގެ އިތުރުން ރަށްރަށުގައި ކޮވިޑް-19އަށް ޕޮޒިޓިވްވާ މީހުންގެ އެންމެ ފަހުގެ ތަފާސްހިސާބުތަކާއި ކްލަސްޓާތަކުގެ މައުލޫމާތު ވަނީ ހާމަކޮށްފައެވެ.
ދ. ކުޑަހުވަދޫގައި ފުރަތަމަ ކޭސް ޕޮޒިޓިވްވީ މަރޗް މަހުގެ 17 ވަނަ ދުވަހެވެ. ކްލިނިކަލް ކޭސްއެއްގެ ގޮތުގައި އައިޑެންޓިފައި ކުރެވިފައިވާއިރު، ޑައިރެކްޓް ކޮންޓެކްޓްގެ ގޮތުގައި 224 މީހަކު ފާހަގަކުރެވިފައިވެއެވެ. އަދި މިހާތަނަށް ކުޑަހުވަދޫއިން ޖުމްލަ 24 މީހަކު ޕޮޒިޓިވްވެފައިވެއެވެ.
ރ. އުނގޫފާރުގެ ކްލަސްޓަރއަށް ބަލާއިރު އެންމެ ފުރަތަމަ ޕޮޒިޓިވް ކޭސްއެއް އައިޑެންޓިފައި ކުރެވުނީ މަރޗް 20 ގައެވެ. އެކްލަސްޓަރއާ ގުޅިގެން 523 ސާމްޕަލް ނެގިފައިވާއިރު، އޭގެ ތެރެއިން 13 މީހަކު ޕޮޒިޓިވްވެފައިވެއެވެ.
ކ. ހުރާއިން އެންމެ ފުރަތަމަ ކޭސްއެއް ފެނިފައިވަނީ މަރޗް މަހުގެ 22 ގައެވެ. އެކޭސްއާ ގުޅިގެން 159 ކޮންޓެކްޓުން ފާހަގަކުރެވިފައިވެއެވެ. އަދި ޖުމްލަ 52 މީހުން މިހާތަނަށް ޕޮޒިޓިވްވެފައިވެއެވެ.
ކ. ދިއްފުށީން ޕޮޒިޓިވް 2 ކޭސް ފެނިފައިވަނީ މަރޗް މަހުގެ 23 ވަނަ ދުވަހެވެ. ކޮންޓެކްޓުންގެ ގޮތުގައި 115 މީހަކު ފާހަގަކުރެވިފައިވާއިރު، މިހާތަނަށް ދިއްފުށިން 19 މީހަކު ޕޮޒިޓިވްވެފައިވެއެވެ.
ޅ. ފެލިވަރުގައި އެންމެ ފުރަތަމަ ޕޮޒިޓިވް ކޭސް ފެނިފައިވަނީ މަރޗް މަހުގެ 24 ގައެވެ. އަދި 25 މަރޗްގައި 4 މީހުން އަދި 26 މަރޗްގައި 66 މީހަކު ޕޮޒިޓިވްވެފައިވެއެވެ. އޭގެއިތުރުން 27 މަރޗްގައި 4 މީހުން ޕޮޒިޓިވްވެފައިވާއިރު، މިހާތަނަށް މުޅިޖުމުލަ 75 މީހުން ޅ. ފެލިވަރުން ޕޮޒިޓިވްވެފައިވެއެވެ.
މީގެ އިތުރުން ގދ. ތިނަދޫއިން މަރޗް މަހުގެ 27 ވަނަ ދުވަހު ބަލީގެ އަލާމަތްތައް ހުރެގެން ޑޮކްޓަރަށް ދައްކައި، ނެގި ސާމްޕަލް ޕޮޒިޓިވްވެފައިވާ ކަމަށެވެ. އެގޮތުން މިހާތަނަށް އެރަށުން ތިން މީހަކު ޕޮޒިޓިވްވެފައިވެއެވެ.
އަތޮޅުތެރޭގެ ގިނަ ރަށްތަކުން ކޭސްތައް ފެނިފައިވާއިރު، ދ. ކުޑަހުވަދޫ، ރ. އުނގޫފާރު، ދ. މީދޫ، ކ. ހުރާ، ކ. ދިއްފުށި، ޅ. ނައިފަރު، ރ. މަޑުއްވަރި، ރ. ހުޅުދުއްފާރު، ޅ. ފެލިވަރު، ޅ. ހިންނަވަރު، ރ. އަލިފުށި، ގދ. ތިނަދޫ، އަދި ޅ. އޮޅުވެލިފުށި އޮތީ މޮނިޓަރިންގެ ހާލަތުގައެވެ.
