ކޮވިޑް-19ށް ޕޮޒިޓިވްވެ ފަރުވާ ހޯދަމުންދާ މީހުންގެ ތެރެއިން މާލެ ސަރަހައްދުގައި 91 މީހަކު އެޑްމިޓް ކޮށްގެން ފަރުވާ ދެމުންދާ ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.

އެޗްއީއޯސީން އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެޗްޕީއޭގެ ޑިރެކްޓަރ އަހްމަދު ނާސިރު ވިދާޅުވީ ބަލީގެ ނުރައްކާ ކުޑަ ނުވާ ކަމަށާއި، ބަލިން ރައްކާތެރިވުމަށް ކުރަންޖެހޭ އެންމެހައި މަސައްކަތްތައް ކުރަން ޖެހޭ ކަމަށެވެ.

ނާސިރު ވިދާޅުވީ މިހާރު ވެސް މާލެ ސަރަހައްދުގައި އެޑްމިޓްކޮށްގެން 91 މީހަކަށް ފަރުވާ ދެމުންދާ ކަމަށެވެ. އެގޮތުން ޑީއެޗް-16 ގައި ހަތަރު މީހުން، ވެންޓިލޭޓަރުގައި އެކަކަށް ފަރުވާދެމުންދާ ކަމަށެވެ. އަދި ހުޅުމާލޭ މެޑިކަލް ފެސިލިޓީގެ ވޯޑުގައި 86 ބަލި މީހުންނަށް ފަރުވާ ދެމުންގެންދާ ކަމަށް އޭނާ ވިދާޅުވިއެވެ.

މީގެ އިތުރުން ނާސިރު ވިދާޅުވީ އަތޮޅުތެރޭގެ ރަށްތަކަށް ބަލާއިރު، ށ. އަތޮޅު ކޮވިޑް ފެސިލިޓީގައި ދެމީހަކު އެޑިމިޓްކޮށްގެން ފަރުވާ ދެމުންދާ ކަމަށެވެ.

ރާއްޖެއަށް ކުރިމަތިވި ކޮވިޑް-19ގެ ތިންވަނަ ރާޅާއެކު ކޭސްތައް ވަރަށް ބޮޑަށް އިތުރުވެ، އެޑްމިޓްކުރަން ޖެހުނު މީހުންގެ އަދަދުތައް މަތިވެގެންދިޔައެވެ. އަދި ބެޑް ކެޕޭސިޓީ ފުލް ވެދާނެކަމުގެ އިންޒާރު ވެސް އޭރު އެޗްއީއޯސީން ދީފައިވެއެވެ. ކޭސްތައް ދަށް ކުރުމަށް އެޅި ފިޔަވަޅުތަކާއެކު މިހާރު ބަލި ފެތުރޭ މިންވަރު ވަކި މިންވަރެއްގައި ހިފެހެއްޓިފައިވާ ކަމަށް އެޗްއީއޯސީން ބުނެއެވެ.