"މި ސަރުކާރުގައި ފުލުހުންގެ ތެރެއަށް ސިޔާސީ ނުފޫޒު އެއްވެސް ވަރަކަށް ނުވަދޭ"
ފުލުހުންގެ ޚިދުމަތް ރާއްޖޭގެ 104 ރަށެއްގައި އަންނަނީ ދެމުން
ޑެޕިއުޓީ ކޮމިޝަނަރ އޮފް ޕޮލިސް އަބްދުލް މަންނާން ޔޫސުފް
މި ސަރުކާރުގައި ފުލުހުންގެ ތެރެއަށް ސިޔާސީ ނުފޫޒު އެއްވެސް ވަރަކަށް ނުވަންނަކަމަށް ޑެޕިއުޓީ ކޮމިޝަނަރ އޮފް ޕޮލިސް އަބްދުލް މަންނާން ޔޫސުފް ވިދާޅުވެއްޖެއެވެ.
ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން، ޑެޕިއުޓީ ކޮމިޝަނަރ އޮފް ޕޮލިސް އަބްދުލް މަންނާން ޔޫސުފް ވަނީ ދިވެހި ފުލުހުންގެ ޚިދުމަތުގައި ރައްޔިތުންގެ ތަޞައްވަރު ހުރިގޮތާ ގުޅޭގޮތުން ތަފްސީލީގޮތެއްގައި ވާހަކަދައްކަވާފައެވެ. އެގޮތުން ފުލުހުންގެ ޚިދުމަތަށް 88 އަހަރު ފުރި އަދި ސިފައިންނާ ވަކިން މަސައްކަތްކުރާތާ 17 އަހަރު ފުރިފައިވާއިރު، މި ޚިދުމަތް ދިނުމުގައި އަބަދުވެސް އަމާޒު ހިފާފައިވަނީ ރައްޔިތުންނަށް ޚިދުމަތްކުރުމާއި، ރައްޔިތުންގެ ހައްޤުތައް ހިމާޔަތްކުރުމަށް މަސައްކަތްކުރުން ކަމަށެވެ. އެހެންނަމަވެސް، އެކި ސަބަބުތަކާ ހުރެ ފުލުހުންގެ ޚުދުމަތާ ގުޅޭގޮތުން ރައްޔިތުންގެ ނަޒަރިއްޔާތު ކިލަނބުވެފައިވާކަން ޑެޕިއުޓީ ކޮމިޝަނަރ އޮފް ޕޮލިސް އަބްދުލް މަންނާން ޔޫސުފް ފާހަގަކުރެއްވިއެވެ.
މިފަދަ ކަންކަމުގެ ފަހަތުގައި ދިވެހި ފުލުހުންގެ ޔުނީފޯމް އެޅި ބައެއް ފުލުހުންގެ އަމަލުތައް ހުންނަ ގޮތުން ފުލުހުންގެ ޚިދުމަތަށް ކިލަނބުކަން އަންނަ އިރު، ފުލުހުންގެ ސަބަބުން މުޖުތަމަޢުއަށް އަންނަ ހެޔޮ ބަދަލުގެ ވާހަކަ ނުދެއްކޭކަން މަންނާން ފާހަގަކުރެއްވިއެވެ. މިހާތަނަށް އައި އިރު ފުލުހުންގެ ޚިދުމަތް ރާއްޖޭގެ 104 ރަށެއްގައި ދެމުން އަންނަ އިރު، އެ ރަށްރަށުގައި ހިނގާ ގިނަ ކުށްތަކެއް ކާމިޔާބުކަމާއެކު ހުއްޓުވާފައިވާއިރު، ބައެއް ކުށްތައް އެއްކޮށް މުޖުތަމައުތަކުން ފޮހެލާފައިވާކަން ޑެޕިއުޓީ ކޮމިޝަނަރ އޮފް ޕޮލިސް ފާހަގަކުރެއްވިއެވެ. މީގެ އިތުރުން ފުލުހުންގެ އިންޓެލިޖެންސްއަށް ލިބޭ މަޢުލޫމާތުގެ މައްޗަށް ބިނާކޮށް ވެސް ގިނަ ކުށްތަކެއް ހުއްޓުވިފައިވާކަން މަންނާން ފާހަގަކުރެއްވިއެވެ.
މީގެ ކުރީގެ ސަރުކާރުތަކުން ކަންކަން ކުރިގޮތުން ފުލުހުންގެ ޚިދުމަތަށް ސިޔާސީ ނުފޫޒު ފޯރާފައިވާކަން ޑެޕިއުޓީ ކޮމިޝަނަރ އޮފް ޕޮލިސް ފާހަގަކުރެއްވިއެވެ. އެހެންނަމަވެސް، މި ސަރުކާރު ވެރިކަމަށް އައިސް ކޮމިޝަނަރ އޮފް ޕޮލިސް މުހައްމަދު ހަމީދުގެ ސިޔާސަތުގެ ސަބަބުން މިފަދަ ކަމަކަށް ފުރުސަތު ނުދޭކަން ޑެޕިއުޓީ ކޮމިޝަނަރ އޮފް ޕޮލިސް ފާހަގަކުރެއްވިއެވެ. މަންނާން ވަނީ މިވަގުތު ވެސް، ކުރީ ސަރުކާރުންތަކުން ފުލުހުންގެ ޚިދުމަތަށް ނުފޫޒު ފޯރުވާފައިވުމުން އެކަންކަން ތަޙުޤީޤްކުރަމުންދާކަން ހާމަކުރައްވާފައެވެ.
