ދިވެހި ރައްޔިތުކަން ދޫކޮށްލުމުގެ ގަވައިދުގައި ދީނީ ގޮތުން ކަންބޮޑުވާން ޖެހޭ ކަމެއް ނެތް ކަމަށް ކުރީގެ ރައީސް މައުމޫން އަބްދުލް ޤައްޔޫމް ވިދާޅުވެއްޖެއެވެ.

މައުމޫން ވިދާޅުވީ، އެ ގަވައިދު އެމަނިކުފާނު ވިދާޅުވި ކަމަށާއި އޭގައި، ދީނީ ގޮތުން ކަންބޮޑުވާންޖެހޭ ކަމެއް ނެތް ކަމަށެވެ.

ދިވެހި ރައްޔިތުކަން ދޫކޮށްލުމުން އެމީހަކަށް ދިވެހި ރައްޔިތަކަށް ވީތީ ލިބޭ އެންމެހައި ހައްގުތަކުން މަހުރޫމްވާނެއެވެ. އެހެންނަމަވެސް ގާނޫނީ ގޮތުން އުފުލަން ޖެހިފައިވާ އެއްވެސް އިލްތިޒާމަކުން ބަރީއައެއް ނުވާނެއެވެ. 25 ވަނަ ދުވަހު އަމަލުކުރަން ފެށި މި ގަވައިދުގެ ދަށުން 18 އަހަރުވެފައިވާ، އަދި ދިވެހި ރައްޔިތުކަން ދޫކޮށްލުމުގެ ނަތީޖާ އެނގޭ ކޮންމެ މީހަކަށްވެސް ދިވެހި ރައްޔިތުކަން ދޫކޮށްލުމަށް ހުށަހެޅިދާނެއެވެ. އަދި ހުށަހަޅާއިރު އެހެން ގައުމެއްގެ ރައްޔިތުންކަން ލިބިފައިވާ ނުވަތަ ލިބޭނެ ކަމުގެ ލިޔުން ހުށަހަޅަންވާނެއެވެ.

18 އަހަރުން ދަށުގެ ކުއްޖެއްގެ ރައްޔިތުކަން ދޫކޮށްލުމުގެ އުސޫލްވެސް ގަވައިދުގައި ވެއެވެ. އެގޮތުން 12 އަހަރު ދަށުގެ ކުއްޖެއް ނަމަ އެކުއްޖާގެ މައިންބަފައިންނަކީ ދިވެހިންނަށް ވެފައި ރައްޔިތުކަން ދޫކޮށްލުމަށް އެދެނީ އެކަކު ކަމުގައިވާ ނަމަ އަނެއް ބެލެނިވެރިޔާގެ ރުހުން އެކަމުގައި ބޭނުން ވެއެވެ.

12 އަހަރާއި 18 އަހަރާއި ދެމެދުގެ ކުއްޖެއްނަމަ ރައްޔިތުކަން ދުކޮށްލުމާމެދު ކުއްޖާގެ އިއުތިރާޒެއް ނެތް ކަމުގެ ލިޔުމެއް އޮންނަންވާނެއެވެ.

ދިވެހި ރައްޔިތުކަން ދޫކޮށްލުމުގެ އިގުރާރުގައި ސޮއިކުރާ ތާރީޚުން ފެށިގެން 6 މަސް ދުވަހުގެ ތެރޭގައި އެހެން ގައުމެއްގެ ރައްޔިތުކަން ނުލިބިއްޖެނަމަ، އެމީހަކީ ދިވެހި ރައްޔިތެއްގެ ގޮތުގައި ބަލައިގަންނާނެ ކަަމަށް ގަވައިދުގައި ވެއެވެ.