ސަރުކާރުން ރަށްރަށުގައި ބަހައްޓާ ކޮންމެ ޖަނަރޭޓަރަކާއި، ހަދާ ކޮންމެ އިންޖީނު ގެއެއްގެ ރިބަން ކަނޑަން ވެއްޖެ ނަމަ ހެނދުނުން ފެށިގެން މެންދަމު ބާރައާ ހަމައަށް ވެސް ރިބަން ކަނޑާ ނުނިމޭ ވަރަށް، މަސައްކަތް ނިންމިފައި އެބަހުރި ކަމަށް، ފެނަކައިގެ މެނޭޖިންގ ޑިރެކްޓަރ އަހުމަދު ސައީދު ވިދާޅުވެއްޖެއެވެ.

ރާއްޖެ ޓީވީގެ 'ފާށާއިރު' ޕްރޮގުރާމްގައި ވާހަކަ ދައްކަވަމުން، ސައީދު ވިދާޅުވީ، މިހާތަނަށް މިވީ ދޮޅު އަހަރެއްހާ ދުވަސްތެރޭ، ފެނަކައިން 180 ރަށަކަށް ޖަނަރޭޓަރު ސެޓު ގެންގޮސްދީފައި ވާކަމަށެވެ.

ކުރީ ސަރުކާރުގައި ބައެއް ރަށްރަށަށް ޖަނަރޭޓަރު ގެންގޮސް އެކަން މާގަދައަށް ފާހަގަކުރާކަމަށް ވިދާޅުވެ، ސައީދު ވިދާޅުވީ، ކުރީ ސަރުކާރުން ގެނައި 75 ޖަނަރޭޓަރު ގެނައީ އިސްލާމިކް ބޭންކުން ލޯނެއް ނަގައިގެން ކަމަށެވެ. އަދި އެ ލޯނު ވެސް ދައްކަމުން ގެންދަނީ، މިހާރުގެ ސަރުކާރުން ކަމަށް ސައީދު ވިދާޅުވިއެވެ.

ސައީދު ވިދާޅުވީ، މިސަރުކާރުން މިވީ ދޮޅު އަހަރު ދުވަހުގެތެރޭ، ރަށްރަށަށް ގެންދިޔަ ޖަނަރޭޓަރު ގެ އަދަދު ގިނަ ކަމުގައި ވިޔަސް، ސަރުކާރުން އޭގެ މަތީ 'ސަނދުވާ' ދަމައިގެން، ކައިރީ ނަށާ ނުހަދާ ކަމަށެވެ. އަދި އެކަން އެގޮތަށް ނުކުރަނީ، ރައްޔިތުން އެ ޖަނަރޭޓަރު ސެޓު ބޭނުންވެގެން އުޅޭތާ އެތައް ދުވަހެއް ފަހުން، އެ ފޯރުކޮށްދެވުމުން، ސަރުކާރުން އުފާ ކުރަންޖެހޭ ސަބަބެއް ނެތުމުން ކަމަށާއި، އެ ގޮތަށް އެކަން ކުރުމުން ސިފަވަނީ ރައްޔިތުންނަށް ކުރެވޭ ޖެއްސުމެއްގެ ގޮތުގައި ކަމަށް ސައީދު ވިދާޅުވިއެވެ.

ސައީދު ވިދާޅުވީ، މި ސަރުކާރަކީ މޫސުމީ އުސޫލުން، އިންތިޚާބެއް ކައިރިވުމުން، ރައްޔިތުންނަށް ޚިދުމަތް ދޭންތިބި ސަރުކާރެއް ނޫންކަމަށެވެ. އަދި ރައީސް ބޭނުންފުޅުވާނަމަ ރިބަން ކަނޑާލެވޭނެ އެތައް ސަތޭކަ އިންޖީނުގެއެއް މިހާރު ވެސް ހުންނާނެކަމަށް ސައީދު ވިދާޅުވިއެވެ.