ފެނަކައިގައި ކޮރަޕްޝަނަށް މަގުފަހިވާ ގޮތަށް އެއްވެސް ކަމެއް ކުރުމުގެ ޖާގައެއް ނުދޭނަން: ސައީދު
ފެނަކައަކީ 2018 ވަނަ އަހަރު ޑިސެންބަރު މަހާ ހަމައަށް ކޮރަޕްޝަނުގެ ހާއްޔެއް
ފެނަކައިގެ މެނޭޖިން ޑިރެކްޓަރ އަހުމަދު ސައީދު، ފެނަކައިގެ ހިންގުމަށް މިހާރު ވަނީ ބޮޑެތި ބަދަލުތަކެއް ގެނެސްފައި
ފެނަކަ ކޯޕަރޭޝަނުގައި ކޮރަޕްޝަނަށް މަގުފަހިވާ ގޮތަށް އެއްވެސް ކަމެއް ކުރުމުގެ ޖާގައެއް ނުދޭނެ ކަމަށް އެކޯޕަރޭޝަނުގެ މެނޭޖިން ޑިރެކްޓަރ އަހުމަދު ސައީދު ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން ސައީދު ވިދާޅުވީ ފެނަކައަކީ 2018 ވަނަ އަހަރު ޑިސެންބަރު މަހާ ހަމައަށް ކޮރަޕްޝަނުގެ ހާއްޔެއް ކަމަށެވެ. ނަމަވެސް މިހާރު ކުރެވުނު ބުރަ މަސައްކަތުން މުޅި ކޯޕްރޭޝަން ސާފުކުރެވިފައިވާ ކަމަށް ސައީދު ވިދާޅުވިއެވެ.
ސައީދު ވިދާޅުވީ ފެނަކައިގެ މާޒީއަށް ބަލާއިރު ސައްހަ އޮޑިޓް ރިޕޯޓެއް ނެތް ކަމަށާއި، 2018އާ ހަމައަށް ނެރުނު ހުރިހާ އޮޑިޓް ރިޕޯޓުތަކުގައި ހިސާބުތައް ދިމާނުވާ ކަމަށެވެ. ނަމަވެސް 2019 ވަނަ އަހަރު ނިމުނުއިރު ސައްހަ އޮޑިޓް ރިޕޯޓެއް ރައްޔިތުންނަށް ފެނިފައިވާ ކަމަށް ސައީދު ވިދާޅުވިއެވެ. އެއީ މުވައްޒަފުން ކޮރަޕްޝަނަށް މަގުފަހިނުވާ ގޮތަށް މަސައްކަތްކުރި ކަމުގެ ނަތީޖާ ކަމަށް ވެސް ސައީދު ވިދާޅުވިއެވެ.
ކޮރަޕްޝަނަށް މަގުފަހިވާ ގޮތަށް އެއްވެސް ކަމެއް ހިންގުމުގެ ކުޑަ ޖާގައެއް ވެސް ނުލިބޭނެކަން ފާހަގަކުރައްވައި ސައީދު ވިދާޅުވީ މިހާރު އެކަމުގެ ހެއްކާއި ދަލީލު ރާއްޖޭގެ އެކި ދިމަދިމާލުން ފެންނާނެ ކަމަށެވެ. އަދި ފެނަކައިގެ ތެރޭގައި އެވައްކަމާއި، އަނިޔާވެރިކަމާއި ފަސާދައިގެ ކަންތައްތައް އޮތް ނަމަ އެކިކަންކޮޅުތަކުގައި މިހިންގާ ތަރައްގީގެ މަޝްރޫއުތައް ނުހިންގޭނެ ކަމަށާއި، ރައްޔިތުންނަށް ބޭނުންވާ އަސާސީ ޚިދުމަތްތައް ނުދެވޭނެ ކަމަށް ސައީދު ވިދާޅުވިއެވެ.
ސައީދު ވިދާޅުވީ ފެނަކައިން ތަރައްގީގެ ގިނަ ޕްރޮޖެކްޓްތައް ކުރިއަށް ގެންދާ ކަމަށެވެ. އެގޮތުން މިހާރު ވެސް 148 ޕްރޮޖެކްޓް ކުރިއަށް ގެންދާކަން އޭނާ ފާހަގަކުރެއްވިއެވެ.
ފާޑުކިޔުންތައް ބަލައިގަންނާނެކަން ފާހަގަކުރައްވައި ސައީދު ވިދާޅުވީ ޝައްކުވާ ކަމެއް ހިނގާނަމަ އެ މައްސަލައެއް ކަމާ ބެހޭ ފަރާތަކަށް ހުށަހަޅަންޖެހޭ ކަމަށާއި، ފެނަކައިގެ އެފަދަ މައްސަލައެއް ހުށަހަޅައިގެން ކުރިއަށް ގެންދާނަމަ އެކަމަކަށް ވެސް އެއްބާރުލުން ދޭނެ ކަމަށެވެ.
ސައީދު ވިދާޅުވީ މިއަދު ފެނަކައަކީ ރައްޔިތުންނަށް ޚިދުމަތްދޭ ކުންފުންޏެއް ކަމަށާއި، މުވައްޒަފުންނަށް ވަޒީފާގެ ބިރުވެރިކަމެއް ނެތި ހަމަޖެހިގެން މަސައްކަތް ކުރެވޭނެ މާހައުލެއް ގާއިމްވެފައިވާ ކޯޕްރޭޝަނެއް ކަމަށެވެ. ގެއްލިފައިވާ އިތުބާރު ލިބެމުންދާކަން ވެސް ސައީދު ފާހަގަކުރެއްވިއެވެ.
