ވޯޓު ކަރުދާސްތައް އަންނަ ހަފުތާގައި ރަށްރަށަށް ފޮނުވަން ފަށާނެ- އީސީ
25 މާރިޗު 2021 | ބުރާސްފަތި 07:15ވޯޓުލުމަށް ބޭނުންވާ ވޯޓު ކަރުދާސްތައް ޗާޕްކޮށް ނިމިފައި
މަޖުލީހުގެ ތިން ކޮމެޓީ އަކުން އިލެކްޝަން ކޮމިޝަންގެ މެންބަރުންނާ ބައްދަލުކުރުން --- ފޮޓޯ : ޔޫސުފް ސޮފްވާން
ވޯޓު ކަރުދާސްތައް އަންނަ ހަފްތާގައި ރަށްރަށަށް ފޮނުވަން ފަށާނެ ކަމަށް އިލެކްޝަންސް ކޮމިޝަނުން ބުނެފިއެވެ.
ކޮމިޝަންގެ ރައީސް އަހްމަދު ޝަރީފް "ރާއްޖެ އެމްވީ"އަށް ވިދާޅުވީ، ކުރިއަށް އޮތް ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީ ތަކުގެ އިންތިޚާބުގައި ވޯޓުލުމަށް ބޭނުންވާ ވޯޓު ކަރުދާސްތައް ޗާޕްކޮށް ނިމިފައިވާ ކަމަށާއި އަންނަ ހަފުތާ ތެރޭގައި ރަށްރަށަށް ކަރުދާސްތައް ގެންދިޔުމުގެ މަސައްކަތް ފަށާނެ ކަމަށެވެ.
ތ ކަނޑޫދޫ ކައުސިލަށް ކުރިމަތިލާފައިވާ ހަސަން މޫސާގެ ކެންޑިޑެސީ ބާތިލް ކުރުމަށް ކޮމިޝަނުން ސުޕްރީމް ކޯޓަށް މައްސަލަ ހުށަހަޅަފައި އޮތް ނަމަވެސް އެ ދާއިރާގެ ވޯޓު ކަރުދާސްތައް ވެސް މިހާރު ޗާޕުކޮށް ނިމިފައިވާ ކަމަށެވެ. އަދި މައްސަލަ ކޮންމެ ގޮތަކަށް ނިމުނު ނަމަވެސް ދެން އިތުރަށް އެ ދާއިރާގެ ވޯޓު ކަރުދާސް ޗާޕެއް ނުކުރާނެ ކަމަށް ޝަރީފް ވިދާޅުވިއެވެ. ކޯޓުން އޭނާގެ ކެންޑިޑެސީ ބާތިލް ކުރުމަށް ހުކުމް ކޮށްފިނަމަ އެ ދާއިރާއަށް އެމްޑީޕީގެ ޓިކެޓްގައި ވާދަ ކުރާ ކެންޑިޑޭޓަށް ގޮނޑި ލިބޭނެއެވެ. އެހާލަތުގައި ވޯޓު ކަރުދާހުން އެ ދާއިރާ އުނިކުރެވޭނެ ކަމަށް ޝަރީފް ވިދާޅުވިއެވެ.
ތ ކަނޑޫދޫ ކައުންސިލްގެ ރައީސް ކަމަށް ވާދަކުރާ ހަސަން މޫސާގެ ކެންޑިޑެސީ އީސީން ބާތިލްކުރީ ރަނގަޅަށް ނޫން ކަމަށް ސުޕްރީމް ކޯޓުން ހުކުމް ކޮށްފައިވަނިކޮށް، އޭނާގެ ކެންޑިޑެސީ ބާތިލްކުރުމަށް އަނެއްކާ އީސީން ވަނީ ސުޕްރީމް ކޯޓަށް ހުށަހަޅާފައެވެ.
ޕީޕީއެމް ޓިކެޓުގައި ވާދަކުރާ ހަސަން މޫސާގެ ކެންޑިޑެސީ އީސީން ބާތިލް ކުރީ ރަނގަޅަށް ނޫން ކަމަށް ސުޕްރީމް ކޯޓުން ކަނޑައެޅީ، ކެންޑިޑޭޓެއް ކަމަށް ބަލައިގަތުމަށް އޮންނަ 48 ގަޑިއިރުގެ ތެރޭގައި އޭނާ އަކީ ކެންޑިޑޭޓެއްކަމަށް ބަލައިގަތުމަށްފަހު، އެއިގެ ފަހުން ލިބުނު މައުލޫމާތަކަށް ބިނާކޮށް ކެންޑިޑެސީ ބާތިލްކުރުމުން ކަމަށެވެ. އަދި 48 ގަޑިއިރު ފަހުން ކެންޑިޑެސީ ބާތިލްކުރެވޭނީ ސުޕްރީމް ކޯޓުގެ ހުކުމަކުން ކަމަށް ވެސް އެ ހުކުމުގައި ބުނެފައިވެއެވެ.
އީސީން ހަސަން މޫސާގެ ކެންޑިޑެސީ ބާތިލްކުރީ އޭނާގެ މައްޗަށް ސާބިތު ދަރަންޏެއް އޮވެ، އެ ހުކުމާ އެއްގޮތަށް ފައިސާ ދައްކަމުން ނުދާކަމަށް ޑީޖޭއޭއިން ދީފައިވާ މައުލޫމާތަށް ބިނާ ކޮށެވެ.
އީސީން އަންނަނީ އިންތިޚާބަށް ވާންޖެހޭ އެންމެ ފަހުގެ ތައްޔާރީތައް ވަމުންނެވެ. އެގޮތުން އޮފިޝަލުން ތަމްރީނު ކުރުމާއި، އިންތިޚާބާ ގުޅިގެން އާންމު ރައްޔިތުން ހޭލުންތެރި ކުރުމަށް ވެސް މަސައްކަތް ކުރެއެވެ. ކޮވިޑް-19އާ ގުޅިގެން އިންތިޚާބުގެ ކަންކަމަށް މިވަނީ ވަރަށް ބޮޑު ބަދަލެއް އައިސްފައެވެ.
