ރޯމާގެ ކެޕްޓަން ފްރެންސިސްކޯ ޓޮޓީ، މި ސީޒަނަށް ފަހު ކުޅުން ހުއްޓާލަން ނިންމާފައިވާ އެކުލަބުން ހާމަކޮށްފިއެވެ.

ރޯމާގެ ޑިރެކްޓަރު މޮންޗީ ބުނީ ރޯމާގެ އިތުރުން އިޓަލީގެ ގައުމީޓީމުގައި ވެސް މުހިތްމު ދައުރެއް އަދާކޮށްފައިވާ ޓޮޓީ ކުޅުން ހުއްޓާލަމަށް ފަހު ފެނިގެންދާނީ ރޯމާގެ ޑައިރެކްޓަރެއްގެ މަގާމުން ކަމަށެވެ.

މިހާރު އުމުރުން 40 އަހަރުގެ ޓޮޓީގެ ކުޅޭ އެންމެ ފަހު މެޗަކަށް ވާނީ އިޓާލިއަން ލީގުގައި މި މަހުގެ 24 ވަނަ ދުވަހު ޖެނޯއާއާ ދެކޮޅަށް ރޯމާ ކުޅޭ މެޗެވެ. މިމެޗު ކުޅޭނީ ރޯމާގެ އަމިއްލަ ދަނޑުގައެވެ.

މީގެ 24 އަހަރު ކުރިން ރޯމާ އަށް ކުޅެން ފެށި ޓޮޓީ އޭނާގެ ސީނިއަރ ކެރިއަރުގައި ރޯމާ ނޫން އެހެން ކުލަބަކަށް ކުޅެފައެއް ނުވެއެވެ.

ޓޮޓީ ރޯމާއާ ގުޅިފައި ވަނީ އޭނާގެ އުމުރުން 12 އަހަރުގައެވެ. އަދި ރޯމާގެ ސީނިއަރ ޓީމާއި ޓޮޓީ ގުޅިފައި ވަނީ 1993 ވަނަ އަހަރުއެވެ.

ޓޮޓީ ވަނީ ރޯމާއަށް 783 މެޗުން 307 ގޯލް ޖަހައިދީފަ އެވެ. އަދި ރޯމާގެ އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑް އޮތީ ވެސް ޓޮޓީ އަތުގަ އެވެ.

ދެހާސް ހަ ވަނަ އަހަރު، އިޓަލީ ވޯލްޑް ކަޕް ޗެމްޕިއަންކަން ހޯދިއިރު، އެ ޓީމުގައި ވެސް މުހިންމު ދައުރެއް ޓޮޓީ އަދާކޮށްފައި ވެއެވެ.

ރޯމާއާއެކު ޓޮޓީ ވަނީ އިޓާލިއަން ލީގު އެއް ފަހަރު އަދި އިޓާލިއަން ކަޕް ދެ ފަހަރު ކާމިޔާބުކޮށްފަ އެވެ.