ޔުއެފާ ޗެމްޕިއަންސް ލީގުގެ ކުއާޓާ ފައިނަލުގެ ފުރަތަމަ ލެގުގައި ރެއާލް މެޑްރިޑާއި ލިވަޕޫލް ބައްދަލުކުރާ މެޗު، ރެއާލުގެ އަމިއްލަ ދަނޑުގައި ކުޅެވޭ ގޮތްވެއްޖެއެވެ.

ކުއާޓާގެ ފުރަތަމަ ލެގުގައި ރެއާލާއި ލިވަޕޫލް ބައްދަލުކުރާ މެޗު ސްޕެއިނުގައި ކުޅެން ތާވަލުކޮށްފައި އޮތީ އަންނަ އޭޕްރީލް މަހުގެ ހަވަނަ ދުވަހުއެވެ. އަދި ކުއާޓާގެ ދެވަނަ ލެގު ކުޅޭނީ އޭޕްރީލް މަހުގެ 14 ވަނަ ދުވަހު އިންގްލެންޑުގައެވެ.

ސްޕެއިން ސަރުކާރުން މީގެ ކުރިން ކަނޑައަޅާފައިވާ އުސޫލުގެ ސަބަބުން އިންގްލެންޑުން އަންނަ މީހުންނަށް ޒަރޫރީ ބޭނުމެއްގައި ނޫން ގޮތަކަށް ސްޕެއިނަށް އެތެރެވުން މަނަލެވެ. އެހެންކަމުން ޗެމްޕިއަންސް ލީގުގެ ދެވަނަ ބުރުގައި ޗެލްސީއާ ދެކޮޅަށް ސްޕެއިނުގެ އެތުލެޓިކޯ މެޑްރިޑް ނުކުތް މެޗު ކުޅެފައިވަނީ ރުމޭނިއާގެ ބުކަރެސްޓުގައެވެ.

އެކަމަކު ދާދި ފަހުން ސްޕެއިނުން ވަނީކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތަކަށް ލުއިދީފައެވެ. އެގޮތުން މި މަހުގެ 30 ވަނަ ދުވަހުން ފެށިގެން އިންގްލެންޑް މީހުންނަށް ނެގެޓިވް ޕީސީއާރް ޓެސްޓް ނަތީޖާއަކާއެކު، ކަރަންޓީނެއް ނެތި ސްޕެއިނަށް އެތެރެވެވޭނެއެވެ. އެހެންކަމުން އަންނަ މަހު ރެއާލް ދަނޑުގައި ލިވަޕޫލާ ދެކޮޅަށް ކުޅޭ މެޗު މެޑްރިޑުގައި ކުޅެވޭނެކަން މިހާރު ވަނީ ޔަގީންވެފައެވެ. ރެއާލުގެ ރަސްމީ ދަނޑު ސަންޓީއާގޯ ބާނަބައު ތަރައްޤީކުރުމުގެ މަސައްކަތް ކުރިއަށްދާތީ މި ވަގުތު އެ ޓީމުން ބޭނުންކުރަމުން އަންނަނީ ތަމްރީނުކުރަން ބޭނުންކުރާ އަލްފްރެޑޯ ޑި ސްޓެފާނޯ ސްޓޭޑިއަމެވެ.

މި ފަހަރުގެ ޗެމްޕިއަންސް ލީގުގައި ރެއާލާއި ލިވަޕޫލް ބައްދަލުކުރާއިރު، މި ދެ ޓީމު އެންމެ ފަހުން ބައްދަލުކޮށްފައިވަނީ 2017-2018 ވަނަ އަހަރުގެ ސީޒަނުގެ ޗެމްޕިއަންސް ލީގުގެ ފައިނަލުގައެވެ. އެ ފަހަރު ރެއާލުން ވަނީ 3-1 ގެ ނަތީޖާއަކުން ލިވަޕޫލް ބަލިކޮށް ޗެމްޕިއަންކަން ހޯދާފައެވެ. އަދި ޗެމްޕިއަންސް ލީގުގެ ތާރީޚުގައި ރެއާލާއި ލިވަޕޫލް ވަނީ ޖުމްލަ ހަ ފަހަރު ބައްދަލުކޮށްފައެވެ. އެގޮތުން މި ކުރިމަތިލުންތަކުގައި ކޮންމެ ޓީމެއް ވަނީ ތިން މެޗުން މޮޅުވެފައެވެ.