ކުރީގެ ރައީސް އަބްދުﷲ ޔާމީންގެ ސަރުކާރުގައި ވަޒީރުކަން ކުރެއްވި ބޭފުޅަކު ޑިމޮކްރަސީއާއި، ހަމަހަމަކަމާއި، އިންސާފުގެ ވާހަކަ ދެއްކެވުމަކީ ދިވެހިރާއްޖޭގެ މުސްތަގުބަލަށް އޮތް ހެޔޮފާލެއް ކަމުގައި، ރައްޔިތުންގެ މަޖިލީހުގެ ނާއިބުރައީސް އަދި ގަލޮޅު އުތުރު ދާއިރާގެ މެންބަރު އީވާ އަބްދުﷲ ވިދާޅުވެއްޖެއެވެ.

އީވާ މިހެން ވިދާޅުވީ، ލޯކަލް ކައުންސިލް އިންތިޚާބުގައި ބައިވެރިވާ ފަރާތްތަކަށް، ކެމްޕޭނު ކުރުމުގެ ހަމަހަމަ ފުރުސަތު ލިބިގެން ނުދާ ކަމަށްބުނެ، ކުރީ ސަރުކާރުގެ އިކޮނިމިކް މިނިސްޓަރު، އަދި މާވަށު ދާއިރާގެ މެންބަރު މުހައްމަދު ސައީދު، އަންގާރަދުވަހު މަޖިލީހަށް ހުށަހެޅުއްވި ކުއްލި މައްސަލައަކާއި ގުޅިގެންނެވެ.

އީވާ ވިދާޅުވީ، ވެރިކަމާއި ބާރު އޮތް ވަގުތުގައި ހަމަހަމަކަމާއި އިންސާފު ގާއިމުކުރެއްވުމަށް މަސައްކަތްޕުޅު ނުކުރެއްވި ނަމަވެސް، މިހާރުގެ ހާލަތާއި ގުޅިގެން އެކަން ދަސްވިކަމީ، ދިވެހިރާއްޖެއަށް އޮތް ހެޔޮފާލެއް ކަމަށެވެ.

ކެމްޕޭނުކުރުމާއި ގުޅޭ ގޮތުން އީވާ ވިދާޅުވީ، ދުނިޔޭގެ މިއަދުގެ ހާލަތު އެންމެންނަށްވެސް އެނގޭ ކަމަށާއި، ދުނިޔެ މިއޮތީ ބޮޑު ޕެންޑަމިކެއްގެ މެދުގައި ކަމަށެވެ. އަދި ސިޔާސީ ހަރަކާތްތައްވެސް ކޮންމެވެސް ވަރަކަށް ބަދަލުވާންޖެހިފައި ވާކަމަށާއި، އެމްޑީޕީ އަށްވުރެ، ރަށްރަށަށް ގޮސް ކެމްޕޭނު ނުކުރެވުމުން ދެރަވާނެ، ވަކި އެހެން ޕާޓީއެއް ނޯންނާނެ ކަމަށެވެ. އަދި އެކަން ނުކުރެއްވުމުން، މިއީ އިންތިޚާބެކޭ ވިދާޅުވާން ވެސް ދަތިކަމަށް އިވާ ވިދާޅުވިއެވެ.

އެހެން ނަމަވެސް ވޭތިވެ ދިޔަ މަސްދުވަހު ތެރޭ، އެމްޑީޕީން ޒޫމް މެދުވެރިކޮށް 800 އެއްހާ ކެންޑިޑޭޓުންނާއި ބައްދަލުކޮށްފައިވާކަމަށް އީވާ ވިދާޅުވިއެެވެ. އަދި އެމްޑީޕީން ދަސްކުރަނީ ހާލަތަށް ފިޓުވާން ކަމަށާއި، އެގޮތް ޕީޕީއެމުން ވެސް ދަސްކުރުމަށް އީވާ ގޮވާލެއްވިއެވެ.

މީގެއިތުރުން، ރައިސް ޔާމީންގެ ވެރިކަމުގައި، ބޭއްވި ލޯކަލް ކައުންސިލް އިންތިޚާބުގައި އެމްޑީޕީން ހޯދި ކާމިޔާބީއަށް އަލިއަޅުއްވާލައްވައި އީވާ ވިދާޅުވީ، ފިއްތުންތަކާއި އެކުގައި ވެސް އެމްޑީޕީން އޭރު ކެމްޕޭނުކުރީ ޝަކުވާގެ ބަދަލުގައި ރައްޔިތުންނަށް އުންމީދުތަކެއް ދައްކައިގެން ކަމަށެވެ. ހަމަ އެގޮތަށް ޕީޕީއެމުންވެސް ޝަކުވާގެ ބަދަލުގައި، ކޮންމެ ވެސް އޮއްޓަރު ހުރި ވާހަކައެއް ދެއްކުމަށް އީވާ އެދިވަޑައިގެންނެވިއެވެ.