ކައުންސިލް އިންތިހާބުގައި ބައިވެރިވާ ފަރާތްތަކަށް ހަމަހަމަ ފުރުސަތު ލިބެމުން ނުދާކަމަށް ބުނެ ހުށަހެޅުއްވި ކުއްލި މައްސަލަ މަޖިލީހުން ބަލައިގެންފި

ލޯކަލް ކައުންސިލް އިންތިހާބުގައި ބައިވެރިވާ ފަރާތްތަކަށް އިންތިހާބުގައި ވާދަކުރުމުގައި ހަމަހަމަ ފުރުސަތު ލިބެމުން ނުދާކަމަށް ބުނެ މާވަށު ދާއިރާގެ މެންބަރު މުހައްމަދު ސައީދު ހުށަހެޅުއްވި ކުއްލި މައްސަލަ ރައްޔިތުންގެ މަޖިލީހުން ބަލައިގެންފިއެވެ.

އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި މި ކުއްލި މައްސަލައަށް ބަހުސް ކުރަން ފެނޭތޯ ނެގުނު ވޯޓުގައި ބައިވެރިވި 32 މެންބަރުން ގެ ތެރެއިން 30 މެންބަރުންގެ ވޯޓުން މި މައްސަލަ ބަލައިގެންފައިވާއިރު ދެ މެންބަރަކު ވަނީ ވަކި ގޮތަކަށް ވޯޓު ދޭން ބޭނުން ނުވާ ކަމަށް ބުނެފައެވެ.

މި މައްސަލަ ހުށަހަޅުއްވަމުން މެންބަރު ސައީދު ވިދާޅުވީ ޑިމޮކްރަސީގެ އެންމެ އަސާސީ ސިފައަކީ މިނިވަން މުސްތަގިއްލު އިންތިހާބެއް ބޭއްވުން ކަމަށެވެ. ނަމަވެސް ކުރިއަށް އޮތް ލޯކަލް ކައުންސިލް އިންތިހާބުގައި ވާދަކުރާ ފަރާތްތައް އެ ހައްގުން މަހުރޫމް ކޮށްފައިވާ ކަމަށެވެ.

މެންބަރު އިތުރަށް ވިދާޅުވީ ހެލްތް ޕްރޮޓެކްޝަން އޭޖެންސީ (އެޗްޕީއޭ)ގެ ގައިޑްލައިންތަކުގެ ސިޔާސީ މަންފާ އެންމެ ފުޅާ މިނުގައި ނަގައި ވަޒީރުންނާއި ސަރުކާރު ކުންފުނިތަކުގެ ވެރިންނާއި މަޖިލީހުގައި ސަރުކާރު ތަމްސީލުކުރާ މެންބަރުން އަތޮޅުތެރެއަށް ކަރަންޓީނު ވުމެއްނެތި ގޮސް ރައްޔިތުންނާއި ބައްދަލުކޮށް ސިޔާސީ ހަރަކާތްތައް ސިއްރާއި ފާޅުގައި ހިންގަމުން ދާކަމަށެވެ. އަދި އެފަދަ އެއްވެސް ފުރުސަތެއް އިދިކޮޅު ފަރާތްތަކަށް ފަހިކޮށްދެވިފައި ނެތުމަކީ ސަރުކާރުން ލޯކަލް ކައުންސިލް އިންތިހާބަށް ނުފޫޒު ފޯރުވުން ކަމަށް ދެކޭނެ ފުރުސަތު އޮތުމުން ރައްޔިތުންގެ މެދުގައި ނުތަނަވަސްކަން އުފެދެމުން ދާކަމަށެވެ.

މީގެ އިތުރުން ގާނޫނު އަސާސީން ލާޒިމުކުރާ ހަމަހަމަ ފުރުސަތު ފަހިކޮށްދީ އިންތިހާބުގައި ވާދަކުރާ ފަރާތްތަކާއި ހުރިހާ ފާޓީތަކަށް އިންސާފުވެރި ހަމަހަމަ ފުރުސަތު ދިނުމަށް އެދޭ ކަމަށް މެންބަރު ވިދާޅުވިއެވެ.