50 ޓަނުގެ ޑީސެލް ބަރުކޮށްގެން ދަތުރުކުރި ދޯންޏެއް ފަރަށް އަރައިފި
ދޯނިން ދަތުރުކޮށްފައިވަނީ، ދިވެއްސަކާއި ދެބިދޭސީން
ސްނޯ ދޯނި ފަރަށް އެރުން
50 ޓަނުގެ ޑީސެލް ބަރުކޮށްގެން، ދަތުރު ކުރަމުން ދިޔަ "ސްނޯ" ދޯނި ފަރަށް އަރައިފިއެވެ.
މި ދޯންޏަކީ މާލެއިން ފުރައިގެން ހއ. އަތޮޅަށް ދަތުރު ކުރަމުން ދިޔަ ދޯންޏެކެވެ. މި ދޯނި އަރާފައިވަނީ، ށ. އަތޮޅު ކީކިމިނި ކައިރީ އޮންނަ ބޮލިސްތަ ފަރަށް ކަމަށް އެމްއެންޑީއެފުން ބުނެއެވެ. އެމްއެންޑީއެފުން ބުނީ، ދޯނި ފަރަށް އެރި އިރު ދޯނިން ދަތުރުކޮށްފައިވަނީ، ދިވެއްސަކާއި ދެބިދޭސީން ކަމަށެވެ.
"ސްނޯ" ދޯނި ފަރަށް އަރައިގެން އުޅޭކަމުގެ މައުލޫމާތު އެމްއެންޑީއެފަށް ރިޕޯޓުކޮށްފައިވަނީ، 22 ވަނަ ދުވަހުގެ ރޭ މެންދަމު 3:09 ހާއިރު ކަމަށް އެމްއެންޑީއެފުން މައުލޫމާތު ދެއެވެ. މިދޯނި ފަރަށް އެރި ސަރަހައްދުގައި އެމްއެންޑީއެފްގެ ނޮދަރން އޭރިއާގެ ކޯސްޓު ގާޑް ސިފައިން މިހާރު ގެންދަނީ ހަރަކާތްތެރި ވަމުންނެވެ.
މި ހާދިސާގައި ލިބިފައިވާ ގެއްލުމުގެ މައުލޫމާތު އެމްއެންޑީއެފުން އަދި ހާމަކޮށްފައެއް ނުވެއެވެ.
