އާޓިފިޝަލް ބީޗުގައި ހާއްސަ އެހީއަށް ބޭނުންވާ މީހުންނަށް ރޭމްޕެއް
22 މާރިޗު 2021 | ހޯމަ 18:39މި ޕްރޮޖެކްޓު 40 ދުވަސް ތެރޭގައި ނިމޭނެކަމަށް އެމްޓީސީސީން ބުނޭ
އާޓިފިޝަލް ބީޗުގައި ޕްލޭންކް އެޅުން އިފްތިތާހުކުރުން
މާލެ އާޓިފިޝަލް ބީޗުގައި ޚާއްސަ އެހީއަށް ބޭނުންވާ މީހުންނަށް ރޭމްޕެއް ހެދުމުގެ މަސައްކަތް ފަށައިފިއެވެ.
އާޓިފިޝަލް ބީޗުގައި ހާއްސަ އެހީއަށް ބޭނުންވާ މީހުންނަށް ރޭމްޕް ހެދުމުގެ މަސައްކަތަކީ އެމްޓީސީސީ އާއި ޔޫތު އެންޑް ސްޕޯޓްސް މިނިސްޓްރީ އަދި ޕްލޭނިން މިނިސްޓްރީގެ އިތުރަށް މާލޭ ސިޓީ ކައުންސިލްގެ އިތުރުން މޯލްޑިވްސް އެސޯސިއޭޝަން ފޯ ޕާސަންސް ވިތު ޑިސެބިލިޓީ (އެމްއޭޕީޑީ) ބައިވެރިވެގެން ކުރިއަށް ގެންދާ ޕްރޮޖެކްޓެކެވެ.
އެމްޓީސީސީގެ އިޖުތިމާއީ ޒިންމާގެ ދަށުން ކުރިއަަށްގެންދާ މި ޕްރޮޖެކްޓްގެ މަސައްކަތް އިފްތިތާހުކޮށްދެއްވީ އެމްޓީސީސީގެ ސީއީއޯ އާދަމް އާޒިމާއި ޔޫތު މިނިސްޓަރު އަހުމަދު މަހުލޫފުއެވެ. އެކަމަށް ބޭއްވި ރަސްމިއްޔާތުގައި ވާހަކަދައްކަވަމުން އާޒިމް ވިދާޅުވީ މި ސަރުކާރަކީ ހަމައެކަނި ހާއްސަ އެހީއަށް ބޭނުންވާ މީހުންނަށް ކަންކަން ކޮށްދޭނެ ކަމަށް ބުނެ ވައުދުވެ، ހަމައެކަނި ބުނެލާ ބަހެއްގެ ގޮތުގައި އެކަން ދޫކޮށްލާނެ ސަރުކާރެއް ނޫން ކަމަށެވެ. އޭނާ ވިދާޅުވީ މި ސަރުކާރަކީ ރައްޔިތުންގެ ކަންކަން އަޑު އަހާ ސަރުކާރެއް ކަމަށާއި ޕްލޭންކްގެ މަސައްކަތް އެހާ ފަސޭހައިން ފެށޭ ސަބަބަކީ އެއީ ކަމަށެވެ.
އާޒިމް ވިދާޅުވީ އެފަދަ ޒަރޫރީ ކަމެއް މިހާ ދުވަހު ނުވެ އޮތުމަކީ ހިތާމަކުރައްވާ ކަމެއް ކަމަށެވެ. އެމްޓީސީސީއަކީ އަބަދުވެސް ހާއްސަ އެހީއަށް ބޭނުންވާ މީހުންނަށް އެހީތެރިކަން ފޯރުކޮށްދޭ ކުންފުންޏެކެވެ. މިފަދަ އިތުރު މަސައްކަތްތައް ކުރިމަގުގައި ކުރާނެ ކަމަށް އާޒިމް ވިދާޅުވި އެވެ.
މި ރަސްމިއްޔާތުގައި މިނިސްޓަރ މަހުލޫފް ވިދާޅުވީ އެހާ ދުވަސްވެގެން ދިޔައިރު ޒަރޫރީ ކަމެއް ނުވެ އޮތީ މީގެ ކުރިން އެފަދަ ކަންކަމަށް އެއްވެސް ސަމާލުކަމެއް ދެވިފައި ނުވާތީ ކަމަށެވެ. އަދި އެއީ ވަރަށް ލަދުވެތި ކަމެއް ކަމަށް ވިދާޅުވިއެވެ. އެކަމަކު މި ސަރުކާރުން އެފަދަ ހުރިހާ ކަމަކަށް ސަމާލުކަން ދޭނެ ކަމަށާއި، އެކަންކަން ވީ އެންމެ އަވަހަކަށް ކުރާނެ ކަމަށް ވެސް މިނިސްޓަރ ވިދާޅުވިއެވެ.
މިނިސްޓަރ ވަނީ އެ މަސައްކަތް ކުރުމަށް އެމްޓީސީސީން ވެސް ދިން އިސްކަން ފާހަގަކޮށް އެކަމަށް ޝުކުރުއަދާކުރައްވާފައެވެ
