ހޮޓާ، ރެސްޓޯރެންޓު ހިންގާ ފަރާތްތަކަށް ކުރިމަތިވަމުންދާ ދަތިކަން ހައްލު ކޮށްދިނުމަށް އެދި ހުށަހެޅި މައްސަލަ މަޖިލީހުން ބަލައިގެންފި
މި މައްސަލަ ބަލައިގަނެ ބަހުސް ކުރުމަށް ފާސް ކޮށްފައިވަނީ މައްސަލަ މަޖިލީހަށް ބަލައިގަތުމަށް ފެނޭތޯ ނެގުނު ވޯޓުގައި ބައިވެރިވި 24 މެންބަރުންގެ އިއްތިފާގުން
ހޯރަފުށީ ދާއިރާގެ މެންބަރު އަހްމަދް ސަލީމް
ހޮޓާ، ކެފެޓީރިއާ އަދި ރެސްޓޯރެންޓު ހިންގާ ފަރާތްތަކަށް ކުރިމަތިވަމުންދާ ދަތިކަން ހައްލު ކޮށްދިނުމަށް ސަރުކާރަށް ގޮވާލައި ހޯރަފުށީ ދާއިރާގެ މެންބަރު އަހުމަދު ސަލީމް ހުށަހެޅުއްވި މައްސަލަ ރައްޔިތުންގެ މަޖިލީހުން ބަލައިގެންފިއެވެ.
ހޯމަ ދުވަހުގެ ރައްޔިތުންގެ މަޖިލީހުގައި މި މައްސަލަ ބަލައިގަނެ ބަހުސް ކުރުމަށް ފާސް ކޮށްފައިވަނީ މައްސަލަ މަޖިލީހަށް ބަލައިގަތުމަށް ފެނޭތޯ ނެގުނު ވޯޓުގައި ބައިވެރިވި 24 މެންބަރުންގެ އިއްތިފާގުންނެވެ.
މި މައްސަލަ ހުށަހަޅުއްވަމުން މެންބަރު ސަލީމް ވިދާޅުވީ ކޮވިޑްގެ ބަލިމަޑުކަމުގެ ތެރޭގައި ހެލްތް ޕްރޮޓެކްޝަން އޭޖެންސީ (އެޗްޕީއޭ)ން އިއުލާނު ކޮށްފައިވާ އަދި މުއްދަތު އިތުރު ކުރަމުންދާ ސިއްހީ ކުއްލި ނުރައްކަލުގެ ހާލަތުގައި ރާއްޖޭގެ އެކި ކަންކޮޅުތަކުގައި ހިންގާ ހޮޓާ، ކެފޭ އަދި ރެސްޓޯރެންޓް ފަދަ ތަންތަނަށް މާލީ ގޮތުން ލިބެމުންދާ ބޮޑެތި ގެއްލުންތަކުގެ ސަބަބުން އެ ވިޔަފާރިތައް މުޅިން ބަނގުރޫޓުވަމުން ދާކަމަށެވެ.
އަދި މި މައްސަލައަކީ ވިޔަފާރިތައް އަލުން ނަގާ ކޮޅަށް ޖެހުމުގެ އުއްމީދު ކުޑަވަމުން ދާކަމަށާއި އެ ވިޔަފާރިތަކުގައި އުޅޭ ފަރާތްތަކުން ހުއްޓުމެއް ނެތި އެކަމުގެ ކަންބޮޑުވުން ފާޅުކުރަމުން ގެންދާތީ މި ޚިދުމަތްތައް ދެމުން ގެންދާ ފަރާތްތަކަށް ކުރިމަތިވެފައިވާ ތަކުލީފުތަކަށް ލުޔެއް ހޯދައިދިނުމަށް ސަރުކާރަށް ގޮވާލުމުގެ ގޮތުން ހުށަހަޅާ މައްސަލައެއް ކަމަށެވެ.
މީގެ އިތުރުން މެންބަރު ވިދާޅުވީ މިފަދަ ގިނަ ވިޔަފާރިވެރިންނަކީ ކުދި ވިޔަފާރިވެރިން ކަމަށާއި ބޮޑު ކުއްޔަށް ތަންތަން ނަގައިގެން، ފާއިތުވި އަހަރެއްހާ ދުވަހުގެ ތެރޭގައި މި ވިޔަފާރިއަށް އެރި ލޮޅުންތަކުގެ ސަބަބުން ގިނަ ތަންތަން މުޅިން އިނދަޖެހިއްޖެ ކަމަށެވެ. އަދި ކަރަންޓު ބިލާއި ފެންބިލު ފަސްކޮށްދިން މުއްދަތުގެ ތެރޭގައި ވެސް ނުދެއްކި، އެ ޚިދުމަތް ކަނޑާލާފައިވާ ތަންތަން އެބަހުރި ކަމަށް މެންބަރު ވިދާޅުވިއެވެ. މުވައްޒަފުންނަށް ހަމަ މުސާރައެއް ނުދެވި ތަނުގެ ކުލި ބަރާބަރަށް ދައްކަން ޖެހޭ ކަމަށް ވެސް މެންބަރު ފާހަގަކުރެއްވިއެވެ.
