ރަޝިޔާގައި ވިޒިޓްމޯލްޑިވްސްގެ ރޯޑްޝޯ ފެށިގެން ކުރިއަށްދަނީ

ރަޝިޔާގައި ވިޒިޓް މޯލްޑިވްސްގެ ރޯޑްޝޯ ފަށައިފިއެވެ. ރޯޑްޝޯ ކުރިއަށްދަނީ ފަތުރުވެރިކަމުގެ ދާއިރާގައި ހަރަކާތްތެރިވާ 20 ކުންފުންޏަކާއެކުގައެވެ. މި މަހުގެ 19އިން 26ށް ކުރިއަށްދާ މި ރޯޑްޝޯ ރަޝިޔާގެ 4 ސިޓީއެއްގައި ކުރިއަށްދާނެއެވެ. އެއީ، މޮސްކޯ، ކަޒަން، އެކަޓެރިންބާގް އަދި ސެން ޕީޓާސްބާގެވެ.

ޕެންޑަމިކްގެ މިހާލަތުގައި ވެސް ރާއްޖޭގެ ފަތުރުވެރިކަން ކުރިއެރުވުމަށް މިފަދަ ހަރަކާތްތަކުގައި ބައިވެރިވުން މުހިއްމު ކަމަށް އެމްއެމޕީއާރްސީން ބުނެއެވެ. 12 ރިސޯޓް، 2 ގެސްޓްހައުސް އަދި 6 ޓްރެވެލް އެޖެންޓުންނާއެކު ޖުމްލަ 33 ބައިވެރިން އެ މީހުންގެ ޕްރޮޕަޓީތައް ދައްކާލާނެއެވެ. ރާއްޖެއާ ބެހޭ މައުލޫމާތުތަކާއި، ގުދުރަތީގޮތުން ރާއްޖެ އުފެދިފައި އޮންނަ ތަފާތު ގޮތާއި، ރާއްޖޭގައި ރައްކާތެރިކަމުގެ ގޮތުން އަޅާފައިވާ ފިޔަވާޅުތަކާބެހޭ މައުލޫމާތު ވެސް ހިއްސާކުރާނެ ކަމަށް އެމްއެމްޕީއާރްސީން ބުނެއެވެ.

ރޯޑްޝޯ ބާއްވާ ހަތަރު ސިޓީގައި ވެސް، ބައިވެރިންގެ މެދުގައި ނަސީބުވެރިއަކު ހޮވާ، އެ ފަރާތްތަކަށް ރާއްޖޭގައި ޗުއްޓީ ހޭދަކުރުމުގެ ފުރުސަތު ލިބޭނެއެވެ. މޮސްކޯގައި ހޮވާ ނަސީބުވެރި ފަރާތްތައް ސްޕިންސަރ ކޮށްފައިވަނީ ތާޖް އެގްޒޯޓިކާ، އަދާރަން އަދި ސަން އައިލެންޑް ރިސޯޓުންނެވެ. ކަޒާންގެ ނަސީބުވެރިންނަށް ޕެރެޑައިސް އައިލެންޑް ރިސޯޓުގައި ޗުއްޓީ ހޭދަކޮށްލުމުގެ ފުރުސަތު ލިބިގެންދާނެއެވެ. ސެން ޕީޓަސްބާރގްގެ ނަސީބުވެރިން ތާޖް ކޮރަލްރީފް ރިސޯޓާއި ސަން އައިލެންޑުން ސްޕޮންސަރ ކޮށްފައިވާއިރު އެކަޓެރިންބާރގްގެ ނަސީބުވެރިން ސްޕޮންސަރ ކޮށްފައިވަނީ ރޯޔަލް އައިލެންޑް ރިސޯޓުންނެވެ.

ރަޝިޔާއަކީ މިހާރު ރާއްޖެއަށް ފަތުރުވެރިން އެންމެ ގިނައިން އަންނަ އެއް ގައުމެވެ. މި އަހަރުގެ މިހާތަނަށް ރަޝިޔާގެ ސާޅީސް ހާހަށްވުރެ ގިނަ ފަތުރުވެރިން ރާއްޖެ ޒިޔާރަތްކޮށްފައިވާކަމަށް ތަފާސްހިސާބުތަކުން ދައްކައެވެ.