ބަލި ވަކި ވަރެއްގައި ހިފެހެއްޓިފައި، މިވަގުތަށް އިތުރު ފިޔަވަޅުތައް އަޅައި ހަރުކަށި ކުރުމަށް ވިސްނާފައެއް ނުވޭ: ޓެގް

ކޮވިޑް-19 ކޮންޓްރޯލް ކުރުމަށް މިހާރު އަޅާފައިވާ ފިޔަވަޅުތަކުން ބަލި ވަކި ވަރެއްގައި ހިފެހެއްޓިފައިވާ ކަމަށާއި، މިވަގުތަށް އިތުރު ފިޔަވަޅުތައް އަޅައި ހަރުކަށި ކުރުމަށް ވިސްނާފައިނުވާ ކަމަށް ޓެކްނިކަލް އެޑްވައިޒަރީ ގްރޫޕް (ޓެގް)އިން ބުނެފިއެވެ.

ބުރާސްފަތި ދުވަހުގެ ރޭ ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ޓެގްގެ މެންބަރު ޑރ. އަހުމަދު ޝަހީދު ވިދާޅުވީ ކޮވިޑް-19 ކޮންޓްރޯލް ކުރުމަށް އަޅާފައިވާ ފިޔަވަޅުތަކުގެ ނަތީޖާ ފެންނަމުންދާނީ އާއްމު ރައްޔިތުން އެފިޔަވަޅުތަކަށް އަމަލުކުރާ ވަރަކަށް ކަމަށެވެ. އެފިޔަވަޅުތަކަށް ބޯނުލަބާނަމަ އެކަށީގެންވާ ނަތީޖާ ނުފެންނާނެ ކަމަށް ޑރ.ޝަހީދު ވިދާޅުވިއެވެ.

ކޮވިޑް-19ގެ ތިން ވަނަ ރާޅުގައި ފުރަބަންދަކަށް ނުގޮސް އެކިއެކި ފިޔަވަޅުތަކުގައި ބަލި ކޮންޓްރޯލް ކުރެވޭތޯ މަސައްކަތް ކުރަމުންދާކަން ފާހަގަކުރައްވައި ޑރ. ޝަހީދު ވިދާޅުވީ މިހާރު އަޅާފައިވާ ފިޔަވަޅުތަކުން ބަލި އިތުރަށް ގޯސްވިޔަ ނުދީ ވަކިވަރެއްގައި ހިފެހެއްޓިފައިވާ ކަމަށެވެ. ނަމަވެސް ފުލޫ ޕޮޒިޓިވިޓީ ރޭޓާއި އެކްޓިވް ސަވައިލެންސިންއިން ޕޮޒިޓިވްވާ މީހުންގެ އަދަދުތައް މަތިކަމަށާއި، މިއީ ކަންބޮޑުވުމެއް ކަމަށް ޑރ. ޝަހީދު ވިދާޅުވިއެވެ.

މީގެ އިތުރުން ޑރ. ޝަހީދު ވިދާޅުވީ މިހާރުގެ ހާލަތަށް ބެލުމަށްފަހު އިތުރަށް ފިޔަވަޅުތައް އަޅައި ހަރުކަށި ކުރުމަށް ޓެގްއިން ނިންމާފައިނުވާ ކަމަށެވެ. އަދި ކޮންމެ ހަފްތާއަކު ވެސް ކޭސްތައް ފެތުރޭ މިންވަރު ބަލައި ދިރާސާ ކުރާ ކަމަށާއި، ކޭސްތައް ދަށްވާނަމަ އަޅާފައިވާ ފިޔަވަޅުތަކަށް ލުއި ދިނުމަކީ ޓެގްގެ މަގުސަދުކަން ޑރ. ޝަހީދު ފާހަގަކުރެއްވިއެވެ.

ރާއްޖެއަށް ކޮވިޑް-19ގެ ތިންވަނަ ރާޅު ކުރިމަތިވީ ޖެނުއަރީ މަހުގެ ތެރޭގައެވެ. އެގޮތުން އެންމެ ގިނަ ކޭސްތައް ރިޕޯޓު ކުރެވުނީ ފެބްރުއަރީ މަހުގެ ފަހު ހަފްތާ ތެރޭގައެވެ. ހަފްތާއެއްގެ ތެރޭގައި 1000ށްވުރެ ގިނަ ކޭސްތައް ރިޕޯޓު ކުރުމާ ގުޅިގެން އިރުއޮއްސި 6:00ން ހެނދުނު 6:00ށް ވެހިކަލް ދުއްވުން މަނާ ކުރިއެވެ. އަދި ރޭގަނޑު 8:00ގެ ފަހުން ރެސްޓޯރެންޓް އަދި ކެފޭތަކުގައި ޑައިން ޚިދުމަތް ދިނުން މަނާކުރިއެވެ. މިފިޔަވަޅުތަކާއެކު މިހާރު ކޭސްތައް އެއްވަރެއްގައި ހިފެހެއްޓިފައިވާއިރު، ދަށަށްދާ ކަމުގެ ޓްރެންޑެއް ފެނިފައިވާކަމަށް ޑރ. ޝަހީދު ވިދާޅުވެފައިވެއެވެ.