"ރަށު ފެރީ" ޕްރައިވެޓައިޒް ކުރަން އަހަރުތަކެއް ނަގާނެ- އަސްލަމް

ރަށު ފެރީ ނިޒާމުގެ މަޝްރޫޢުއަކީ އެއްރަށުން އަނެއް ރަށަށް ދަތުރުފަތުރު ކުރުމުގައި މިހާރު އުފުލަންޖެހޭ ތަކުލީފުތަކަށް ލުއި ލިބިގެންދާނެ މަޝްރޫޢުއެކެވެ. މުޅި މަޝްރޫޢުގެ މައިގަނޑު އަސާސަކީ ވެސް މިއީއެވެ. ސަރުކާރުން ސަބްސިޑައިޒްކޮށްގެން މި ނިޒާމް ނަގައި ކޮޅަށްޖެހުމަށް ވަނީ ނިންމާފައެވެ. މިނިސްޓަރ އޮފް ޕްލޭނިންގ، ހައުސިންގ އެންޑް އިންފްރަސްޓަރަކްޗަރ މުހައްމަދު އަސްލަމް ވިދާޅުވީ، މި މަޝްރޫއު، ޕްރައިވެޓައިޒްކުރާނީ އަމިއްލަ ޒާތުގައި އެ މަޝްރޫއު ކުރިއަށްގެންދާނެ ކަމުގެ ޔަޤީންކަން ލިބުމުން ކަމަށެވެ. 2008 ވަނަ އަހަރުން ފެށިގެން ސަރުކާރުންނާއި އަމިއްލަ ފަރާތްތަކުން އެކި ފަހަރުމަތިން މި މަޝްރޫއު ފަށާ ކުރިއަށް ނުގެންދެވިގެން ހުއްޓާލާފައިވަނީ ޚަރަދުތައް ދެކޮޅުނުޖެހިންގެން ކަމަށެވެ. އަސްލަމް ވިދާޅުވީ، މިހާތަނަށް ބެލިބެލުމުން އެނގޭ ގޮތުގައި ގާތްގަނޑަކަށް 7 އަހަރާއި، 10 އަހަރާ ދޭތެރޭގެ މުއްދަތަކަށް ސަރުކާރުން ސަބްސިޑައިޒް ކުރަންޖެހޭނެއެވެ.

ލާމަރުކަޒުކުރުން އޭގެ ފުރިހަމަ މާނައިގައި ކުރެވޭނީ، މުޅި ރާއްޖެ, ފުރިހަމަ ދަތުރުފަތުރުގެ ނިޒާމަކުން ގުޅާލެވިގެންނެވެ. މިއީ މިނިސްޓަރ އަސްލަމް މިކަމުގެ ގަބޫލުކުރައްވާ ގޮތެވެ. އެހެން ނޫނީ ލާމަރުކަޒުކޮށްގެން ނެރެން ބޭނުންވާ ނަތީޖާ ނުނެރެވޭނެއެވެ. މިނިސްޓަރ ވިދާޅުވީ، މީހުން އެއްފަސްކުރުމަށްޓަކައި އެންމެން އެއްތަނަކަށް ގެނައުމަކީ އެއީ ކުރެވޭނެ ކަމެއްނޫން ކަމަށެވެ. އެކަމުގެ ސަބަބުން އުފުލަންޖެހޭ ބުރަ މާ ބޮޑުކަމަށެވެ. ގުދުރަތީގޮތުން ރާއްޖެ އުފެދިފައި އޮންނަނީ ވެސް މިފަދަ ފުރިހަމަ ދަތުރުފަތުރުގެ ނިޒާމެއްގެ ބޭނުން ޖެހޭ ގޮތަށެވެ. ކުދި ޖަޒީރާ ރަށްތަކެއްގެ މައްޗަށެވެ.

ލާމަރުކަޒުކުރުމުގައި މިނިސްޓަރ ގެންގުޅުއްވާ މި ވިސްނުމާއެކު 'އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވާރކް' ތައާރަފްކުރިއެވެ. 6 ޒޯނަކަށް ބަހާލައިގެން މުޅި ރާއްޖެ ހައި ސްޕީޑް ފެރީ ނެޓްވާރކަކުން ގުޅާލަނީއެވެ. ފުރަތަމަ ޒޯންގެ މަސައްކަތް އެމްޓީސީސީއާ ހަވާލުކުރުމާއެކު، ބާރު ސްޕީޑުގައި މަސައްކަތް ކުރިއަށް ގެންގޮސްފައިވެއެވެ. ނޮވެމްބަރު މަހު އާންމުންނަށް މި ފެރީތަކުގައި ދަތުރުކުރަން ފެށޭނެއެވެ. ފުރަތަމަ ޒޯންގައި ދަތުރުކުރާނެ ރޫޓުތައް ކަނޑައެޅި، ރަށްރަށުގެ ފެރީ ގިމަތަ ހެދުމަށް ބިން ވެސް މިހާރުވަނީ ކަނޑައަޅާފައެވެ.

ދެ އޮތީ މި ނެޓްވާރކް ފަރުމާކޮށްފައިވާ ގޮތެވެ. މި ނެޓްވާރކް ފަރުމާކޮށްފައިވަނީ މީގެ ކުރީގެ ތަޖުރިބާތަކުގެ މައްޗަށް ބިނާކޮށެވެ. އެގޮތުން ބޭނުންކުރާނީ މުޅިން އަލަށް މިކަމަށް ޚާއްސަކޮށްގެން ފަރުމާ ކޮށްފައިވާ އުޅަނދުފަހަރެވެ. މުޅި ނިޒާމް ބައްޓަން ކުރަނީ، ދަތުރުކުރާ މީހުންނަށް އަރާމުގައި ފަސޭހަކަމާއެކުގައި ދަތުރު ކުރެވޭ ގޮތަށެވެ.

2023 ގައި މުޅި މަޝްރޫއު ނިމޭއިރު ރާއްޖޭގެ އެކޮޅުން އަނެއްކޮޅަށް ފެރީގެ ނިޒާމުން ގުޅާލާނެއެވެ.

ފެރީ ނެޓްވޯކުން ހަ ޒޯންގައި ހިމެނޭ ހުރިހާ ރަށްތަކެއް ގުޅައިލެވޭއިރު، އެއް ޒޯން އަނެއްޒޯނާ ވެސް ގުޅިގެންދާނެއެވެ. މި ގޮތަށް ފަސިންޖަރުން އުފުލާ ފެރީ ގުޅުވައިލާނީ ތަފާތު ތިން ގޮތަކަށެވެ. އެއީ "ކޮމިއުޓް ލިންކް،" "ނަން-ކޮމިއުޓް ލިންކް،" އަދި "ހައިވޭ ލިންކް" މެދުވެރިކޮށެވެ.

ކޮމިއުޓް ލިންކްއަކީ އެ ޒޯނެއްގައި ހިމެނޭ ރަށްތައް ގުޅުވައިދޭ، އާންމުކޮށް ކުރަންޖެހޭ މަސައްކަތް ނުވަތަ ޒަރޫރީ ބޭނުންތަކަށް ކުރާ ކުރު ދަތުރުތަކަށް ޚާއްސަކުރެވިފައިވާ ލިންކެވެ. ނަން-ކޮމިއުޓް ލިންކްއަކީ ދެ ރަށެއްގެ ދެމެދުގައި ކުރާ، ދިގު ދަތުރުތަކަށް ހާއްސަކޮށްފައިވާ ލިންކްއެވެ. އަދި ހައިވޭ ލިންކްއަކީ އެއް ޒޯން އަނެއް ޒޯނާ ގުޅުވައިދޭ މައި ދަތުރުފަތުރުގެ ހަބެވެ. އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވަރކްގައި ހިމެނޭ ދެވަނަ ޚިދުމަތަކީ ކާގޯ ނުވަތަ މުދާ އުފުލާ ފެރީގެ ޚިދުމަތެވެ. މި ޚިދުމަތަކީ، އެ ރީޖަންއެއްގައި ހިމެނޭ ހުރިހާ ރަށްތަކާ އެންމެ ކައިރީގައި އޮންނަ ކޮމަރޝަލް ހަބްއާ ގުޅުވައިދޭނެ ހިދުމަތެކެވެ.

ކޮންމެއަކަސް ވަރަށް ފުރިހަމައަށް ފަރުމާކޮށްފައިވާ ނިޒާމެކެވެ. މި ނިޒާމު ދެމިއޮތުމާމެދު އުފެދޭ ސުވާލުތަކުގެ ޖަވާބު ހޯދަން ކުޑަ އިންތިޒާރެއް ކުރަންޖެހެއެވެ. ގަބޫލުކުރަންޖެހޭ ހަގީގަތަކީ ދަތުރުފަތުރުގެ ނިޒާމަކަށް ބޭނުންްޖެހިފައިތިބި ރައްޔިތުންނަށް މިކަމުން ފަސޭހަވެގެންދާނެކަމެވެ. ކުރު ދަތުރުތައް ކުރަން އަތުން ހޭދަކުރަންޖެހޭ މިންވަރު މަދުވެގެންދާނެކަމެވެ.