ގައުމީ ސަލާމަތާއި، ހާރިޖީ ގުޅުންތަކާ ބެހޭ ތޯތޯ އަދި ދޮގު ވާހަކަތައް މީޑިއާތަކުގައި ގެނައުން ބަލައެއް ނުގަނެވޭ: އެމްއެމްސީ
ހަބަރެއްގައި ހިމެނޭ ދެ ފަރާތުގެ ބަސްވެސް ހިމަނައިގެން ހަބަރު ފޯރުކޮށްދިނުމަކީ އެ ކައުންސިލްގެ ގަވާއިދު މީޑިއާތަކަށް ލާޒިމްކުރާ ކަމެއް
އުތުރު ތިލަފަޅު
ގައުމީ ސަލާމަތާއި، މުޖުތަމައުގެ އާންމު މަސްލަހަތާ ދިވެހިރާއްޖެއާއި ދޭދޭ ގައުމުތަކުގެ ގުޅުމުގެ މަސްލަހަތު ހިމެނޭ ކަންކަމުގައި ސާބިތު ނުހިފޭ ދޮގު މައުލޫމާތާއި ތޯތޯ ވާހަކަތަކަށް ބުރަވެ ހަބަރު ފެތުރުމަކީ ބަލައިގަނެވޭ ކަމެއް ނޫން ކަމަށް މޯލްޑިވެސް މީޑިއާ ކައުންސިލް އިން ބުނެފިއެވެ.
މީޑިއާ ކައުންސިލް އިން މިހެން ބުނެފައި މިވަނީ ރާއްޖޭގެ މިނިވަންކަމަށް އަރައިގަންނަން އުޅޭ ކަމަށް ބުނެ އަދި ރާއްޖޭގައި ތިބި އިންޑިއާ ސިފައިންނާ ގުޅިގެންނާއި ޔޫޓީއެފް އެއްބަސްވުމާ ގުޅިގެން ނޫސްތަކުން އެކި ހަބަރުތައް ޝާއިއުކުރަމުންދާ ވަގުތެއްގައެވެ. އެކަމާ ގުޅޭގޮތުން ސޯޝަލް މީޑިއާ އަދި މެއިންސްޓްރީމް މީޑިއާތަކުގައި ވެސް ދައްކަމުންދާ ވާހަކަތައް ގައުމީ ދިފާއީ ބާރުން ވަނީ ދޮގުކޮށްފައެވެ.
މީޑިއާތަކުން ހަބަރު ފެތުރުމުގައި ޒިންމާދާރުވުމަށް ގޮވާލައި މީޑީއާ ކައުންސިލް އިން ނެރުނު ބަޔާނުގައި ބުނީ ހަބަރާއި މައުލޫމާތު ފޯރުކުރުމުގައި އެ ހަބަރެއްގައި ހިމެނޭ ދެ ފަރާތުގެ ބަސްވެސް ހިމަނައިގެން ހަބަރު ފޯރުކޮށްދިނުމަކީ އެ ކައުންސިލްގެ ގަވާއިދު މީޑިއާތަކަށް ލާޒިމްކުރާ ކަމެއް ކަމަށެވެ. އެގޮތުން ވަކިން ހާއްސަކޮށް އާންމު ފަރުދުންގެ އަބުރަށް ނުވަތަ ހައްގަކަށް އުނިކަމެއް އަންނަ މައުލޫމާތަކަށްވާނަމަ އެ މައުލޫމާތުގެ ސައްހަކަން ކަށަވަރުކޮށްފައި ނޫނީ ފެތުރުމަކީ މީޑިއާގެ އާންމު ހަމަތަކާ ހިލާފު ކަމެއް ކަމަށް ބުނެފައިވެއެވެ.
މީޑިއާ ކައުންސިލް އިން ނެރުނު ބަޔާނުގައި ބުނީ މީޑިއާތަކުން އާންމުކުރާ މައުލޫމާތު ތަކަކީ ސައްހަ ތެދު މައުލޫމާތުކަން ކަށަވަރުކުރަން ކުރެވެން ހުރި ހުރިހާ ކަމެއް ކުރަންޖެހޭނެ ކަން ދިވެހި މީޑިއާގެ ހަމަތަކާއި އަހުލާގީ މިންގަނޑުގައި ބަޔާންކޮށްފައިވާނެ ކަމަށެވެ. އަދި އިސްލާމްދީނާއި ހިލާފު މައުލޫމާތު އާންމުކުރުމާއި، ރާއްޖޭގެ މިނިވަންކަން ގެއްލޭފަދަ ގޮތަކަށް ގަސްދުގައި ހަބަރާއި މައުލޫމާތު ދިނުމަށް ބާރު ނުދިނުމަށް ވެސް އެ މިންގަނޑުގައި ބަޔާންކޮށްފައިވާނެ ކަމަށް ބަޔާނުގައިވެއެވެ.
އެ ކައުންސިލް އިން ބުނީ ގާނޫނީ ގޮތުން ހިޔާލުފާޅުކުރުމުގެ މިނިވަންކަން އެންމެނަށް ވެސް ދީފައިވާއިރު، އެ ހައްގަކީ ޒިންމާތަކާއި މައްސޫލިއްޔަތާ އެކު ބޭނުންކުރަން ޖެހޭ ހައްގެއްކަން ވެސް ގާނޫނުގައި ބަޔާނކޮށްފައިވާ ކަމަށެވެ.، އެހެންވެ މައުލޫމާތު ހޯދައި ހިޔާލު ފާޅުކޮށް ފާޑުކިޔުމުނުގެ ތެރޭގައި ނުފޫޒުން އެއްކިބާވެ ނޫސްވެރިކަމާއި މީޑިއާގެ މިނިވަންކަން ހިމާޔަތްކޮށްގެން ތިބެ އެކަމުގައި އޮންނަ އުސޫލުތަކާ އެއްގޮތަށް ހަބަރާއި މައުލޫމާތު ފޯރުކޮށްދިނުމަށް ގޮވާލާ ކަމަށް ބަޔާނުގައި ބުނެފައިވެއެވެ.
