ނޫސްވެރިން ތަމްރީނު ކުރުމަށް ޖަޕާންގެ އެހީ ހޯދުމަށް މަޝްވަރާކޮށްފި
ޖަޕާނުގެ އެމްބަސެޑަރ ވަނީ ދިވެހި ނޫސްވެރިންނަށް ތަމްރީނު ފުރުސަތުތައް ފަހިކޮށްދެއްވުމަށް މަސައްކަތްކޮށްދެއްވާނެކަމުގެ ޔަގީންކަން ދެއްވާފައި
އެމްއެމްސީ އިން ޖަޕާނުގެ އެމްބަސެޑަރ އާއިއެކު ބޭއްވި ބައްދަލުވުމުގެ ތެރެއިން
ދިވެހި ނޫސްވެރިން ތަމުރީނުކުރުމަށް މޯލްޑިވްސް މީޑިޔާ ކައުންސިލު (އެމްއެމްސީ)އިން ކުރަމުން ގެންދާ މަސައްކަތުގެ ތެރެއިން ޖަޕާނުގައި ތައުމީލީ ޚިދުމަތްދޭ މުއައްސަސާތަށް މެދުވެރިކޮށް ނޫސްވެރިންނަށް ތަމްރީނު ފުރުސަތުތަކެއް ހޯދައި ދިނުމަށް އެމްއެމްސީން ޖަޕާން އެމްބަސީ އާއިއެކު މަޝްވަރާކޮށްފިއެވެ.
މިބައްދަލުވުމުގައި މައިގަނޑު ގޮތެއްގައި މަޝްވަރާކޮށްފައިވަނީ ޖަޕާނަށް ދިވެހި ނޫސްވެރިން ފީލްޑް ޓްރިޕް ފޮނުވުމަށާއި އެމް.އީ.އެކްސް.ޓީ ސްކޮލާޝިޕް ޕްރޮގްރާމްތަކެއް ނޫސްވެރިންނަށް ހޯދައިދިނުމާ އަދި ކުރިޔަށް އޮތް ދުވަސްތަކުގައި ގުޅިގެން ކުރެވިދާނެ ކަންކަމާބެހޭ ގޮތުންނެވެ.
ރާއްޖޭގައި ހުންނަވާ ޖަޕާނުގެ އެމްބަސެޑަރ އެކްސްޓްރާ އޯޑިނަރީ އެންޑް ޕްލެނިޕޮޓެންޝަރީ ހަރ އެކްސެލެންސީ މިސް ޓަކެއުޗީ މިޑޯރީ ވަނީ ދިވެހި ނޫސްވެރިންނަށް ތަމްރީނު ފުރުސަތުތައް ފަހިކޮށްދެއްވުމަށް މަސައްކަތް ކޮށްދެއްވާނެކަމުގެ ޔަގީންކަން ދެއްވާފައިކަމަށް އެމްއެމްސީން ބުނެއެވެ.
އެމްއެމްސީ އާއި ޖަޕާނު އެމްބަސީ އާއިއެކު ކުރިޔަށްދިޔަ ބައްދަލުވުމުގައި އެމްއެމްސީގެ ފަރާތުން ކައުންސިލްގެ ރައީސް މުހައްމަދު ޝަފާއު ހަސަން އާއި މެމްބަރ އަލީ ހުސައިން އާއި މެމްބަރ އިބްރާހީމް ފައުޒީ އަދި ކައުންސިލުގެ ސެކެރެޓަރީ ޖެނެރަލް ޑރ އިބްރާހީމް ސަމީރު އެވެ. ޖަޕާނު އެމްބަސީގެ ފަރާތުން ބައިވެރިވެވަޑައިގަތީ އެމްބަސެޑަރ އެކްސްޓްރާ އޯޑިނަރީ އެންޑް ޕްލެނިޕޮޓެންޝަރީ ހަރ އެކްސެލެންސީ މިސް ޓަކެއުޗީ މިޑޯރީ އަދި ރިސާޗަރ އެޑްވައިޒަރ މިސްޓަރ އޯޓާ ޔޮޝޫ އެވެ.
