ޚަބަރާއި މައުލޫމާތު ފޯރުކޮށްދޭއިރު އަޚުލާގީ މިންގަނޑު ހިފަހައްޓަން އިލްތިމާސްކޮށްފި
ސައްހަ މައުލޫމާތު ފޯރުކޮށްދިނުމަށް މީޑިއާ ކައުންސިލުން އިލްތިމާސްކުރޭ
މޯލްޑިވްސް މީޑިއާ ކައުންސިލްގެ މެމްބަރުން
ޚަބަރާއި މައުލޫމާތު ފޯރުކޮށްދޭއިރު ދިވެހި މީޑިއާގެ ހަމަތަކާއި އަހުލާގީ މިންގަނޑާއި އެއްގޮތަށް ފޯރުކޮށްދިނުމަށް ހާއްސަ ސަމާލުކަމެއް ދިނުމަށް މޯލްޑިވްސް މީޑިއާ ކައުންސިލުން އިލްތިމާސްކޮށްފިއެވެ.
މީޑިއާ ކައުންސިލުން އާދިއްތަ ދުވަހު ނެރުނު ބަޔާނެއްގައި ބުނީ ޚިޔާލުފާޅުކުރުމުގެ މިނިވަންކަން ކޮންމެ މީހަކަށްމެ ޤާނޫނު އަސާސީން ލިބިދީފައިވީހިނދު، އެ މިނިވަންކަމުގެ ހައްގަކީ ވަކި ޒިންމާތަކަކާއި މަސްއޫލިއްޔަތުތަކަކާއެކު ބޭނުންކުރަންޖެހޭނެ ހައްގެއް ކަމަށް ޤާނޫނު އަސާސީގައި ބަޔާންކޮށްފައިވާކަމަށެވެ. އެހެންވެ، ނޫސްވެރިންނާއި މީޑިއާތަކުން އެ ހައްގު ބޭނުންކުރުމުގައި މޯލްޑިވްސް މީޑިއާ ކައުންސިލްގެ ޤާނޫނާއި ގަވާއިދަށާއި އަދި ދިވެހި މީޑިއާގެ ހަމަތަކާއި އަހުލާގީ މިންގަޑާއި އެއްގޮތަށް ޚަބަރާއި މައުލޫމާތު ފޯރުކޮށްދިނުމަށް ހާއްސަ ސަމާލުކަމެއް ދިނުމަށް ނޫސްވެރިންނާއި މީޑިއާތަކަށް ވަނީ އިލްތިމާސްކޮށްފައެވެ.
މީޑިއާ ކައުންސިލުން ބުނީ ހާއްސަ ގޮތެއްގައި އާންމު ފަރުދުންގެ އަބުރަށް ނުވަތަ ހައްގަކަށް އުނިކަމެއް އަތުވެދާނެފަދަ މައުލޫމާތަކަށްވާނަމަ އެ މައުލޫމާތެއްގެ ސައްހަކަން ކަށަވަރުކުރުމަށްފަހު ނޫނީ އެ މައުލޫމާތެއް ފެތުރުމަކީ މީޑިއާ ކައުންސިލްގެ ޤާނޫނާއި ދިވެހި މީޑިއާގެ އާންމު ހަމަތަކާވެސް ޚިލާފުކަމެއްކަމަށެވެ. އަދި ޚަބަރު ފެތުރުމުގައި އެކަމެއްގައި ޝާމިލުވާ ހުރިހާ ފަރާތްތަކެއްގެވެސް ބަސް ހިމަނައިގެން ޙަބަރާއި މައުލޫމާތު ޝާއިއުކުރުމަށް ވަނީ ބުނެފައެވެ.
މީގެ އިތުރުން މީޑިއާގެ ވަސީލަތްތަކުގައި ޝާއިއުކުރާ ޙަބަރާއި މައުލޫމާތަކީ ސައްހަ ތެދު މައުލޫމާތުކަން ކަށަވަރުކުރަން ކުރެވެންހުރި ހުރިހާ މަސައްކަތެއްކުރުމަށް މީޑިއާ ކައުންސިލުން ވަނީ އިލްތިމާސް ކޮށްފައެވެ. އަދި އިސްލާމްދީނާއި ޚިލާފު ޚަބަރާއި މައުލޫމާތުތާއި، މުޖުތަމައުގެ އާންމު އަހުލާގީ މިންގަނޑާ ޚިލާފު މައުލޫމާތާއި ޚަބަރު ނުފެތުރުމަށާއި، ސައްހަ މަސްދަރުތަކުން ހޯދާ މައުލޫމާތާއި ޚަބަރު ނޫނީ ނުފެތުރުމަށްވެސް މީޑިއާ ކައުންސިލުން ވަނީ އިލްތިމާސްކޮށްފައެވެ.
