ދައުލަތަށް ގެއްލުންވާގޮތަށް 2016 ވަނަ އަހަރު އެސް.ޓީ.އޯ އިން ބޭހެއް އެތެރެކުރި މައްސަލާގައި ދަޢުވާކުރުމަށް އެދި ޕީޖީ އޮފީހަށް ހުށަހަޅައިފި
18 މާރިޗު 2021 | ބުރާސްފަތި 08:56ދައުލަތަށް ދެ މިލިއަނަށްވުރެ ގިނަ ރުފިޔާގެ ގެއްލުން
އެސްޓީއޯ
ދައުލަތަށް ގެއްލުންވާގޮތަށް 2016 ވަނަ އަހަރު ސްޓޭޓް ޓްރޭޑިންގ އޯގަނައިޒޭޝަން ޕލކ. (އެސް.ޓީ.އޯ) އިން އެތެރެކޮށްފައިވާ އެޓޮކޯ ބޭހާގުޅޭ މައްސަލަ ތަހުގީގުކޮށް ދައުވާކުރުމަށް އެދި ޕީޖީ އޮފީހަށް ބުދަދުވަހު ހުށަހަޅާފައިވާކަމަށް އެންޓިކޮރަޕްޝަން ކޮމިޝަނުން ބުނެފިއެވެ.
މި މައްސަލައަކީ 27 މެއި 2016 ގައި އެސްޓީއޯއިން އިމްޕޯޓްކުރި އެޓޮކޯ ބޭހުގެ ބެޗް ނަންބަރު C602700ގެ ބޮޑު ބައެއް 2018 ވަނަ އަހަރުގެ މާޗު މަހުގެ ނިޔަލަށް މުއްދަތު ހަމަވެފައިވާއިރު، އެ ކުންފުނިން އެ ބޭހުގެ އިތުރު ބެޗެއް އެއަހަރުގެ ޑިސެމްބަރު 2018 ގައި އޯޑަރުކޮށްފައިވާކަމަށް ބުނާ މައްސަލައެކެވެ.
މި މައްސަލައިގައި ދައުވާކުރުމަށްޓަކައި ފޮނުވާފައިވަނީ، އެސްޓީއޯގެ މެޑިކަލް ސަރވިސް ޑިޕާޓްމަންޓްގެ ހެޑްގެ މަގާމުގައި ހުރި ސ.ހިތަދޫ، ގުލްޒާރުގޭ ހުސައިން ޞަބާހާއި އެ ޑިޕާޓްމަންޓްގެ ޕްލޭނިންގ މެނޭޖަރ، ޏ. ފުވައްމުލައް، ޖިއްދާ ހަމްދޫން ފާއިޒް ގެ މައްޗަށެވެ. މި ދެމީހުންގެ މައްޗަށް ދައުވާކުރުމަށްޓަކައި ފޮނުވާފައިވަނީ، ޤާނޫނު ނަންބަރު 2/2000 (ކޮރަޕްޝަން ހުއްޓުވުމާއި މަނާކުރުމުގެ ޤާނޫނު) ގެ 13 ވަނަ މާއްދާގެ (ހ) ގެ ދަށުން، ދައުލަތަށް ފައިދާވާން އޮތް ކަމެއްގައި އެނޫންގޮތަކަށް އަމަލުކުރުމުގެ ކުށުގެ ދައުވާއެވެ.
އޭސީސީއިން މައުލޫމާތުދޭ ގޮތުގައި، އެސްޓީއޯއިން، އިތުރު ބޭސް ހިމެނޭގޮތަށް، އެޓޮވަސްޓެޓިން ގެ ބްރޭންޑެއްކަމަށްވާ އެޓޮކޯ ގެ 40މގ. އަލަށް ރާއްޖެ ގެނައުމަށް، ބޭރުގެ ބޭސް އުފައްދާ ކުންފުންޏަކާއެކު 2015 ގައި ލައިސަންސް އެންޑް ސަޕްލައި އެގްރިމެންޓެއްގައި ސޮއިކޮށްފައިވާކަން އެ ކޮމިޝަނުގެ ތަހުގީގަށް އެނގިފައިވެއެވެ. އަދި އެ ބޭހުގެ 40މގ. ގެ ޑޯސޭޖަކީ އައު ޑޯސޭޖަކަށްވާއިރު، ރާއްޖޭގެ މާކެޓުގައި އެ ބޭހުގެ ބޭނުން އޮތް މިންވަރު ބަލާފައިވާކަން ލިޔުމުން އެނގެން ނެތްކަމަށް ވެސް އޭސީސީގެ ތަހުގީގަށް ހާމަވެފައިވާކަމަށް ވެސް އޭސީސިންބުނެއެވެ.
އަދި މި އެގްރިމެންޓްގައި އެސް.ޓީ.އޯއިން އެ ބޭހަށް ފޯކާސްޓްކޮށްފައިވާ އަދަދާއި މެޑިކަލް ސަރވިސް ޑިޕާޓްމަންޓުން ފޯކާސްޓްކޮށްފައިވާ އަދަދަށްވުރެ އިތުރަށް 2016 ވަނައަހަރު ބޭސް އޯޑަރުކޮށް ގެނެސްފައިވާކަން އެނގިފައިވާކަމަށް ވެސް އޭސީސީން ބުނެއެވެ. އަދި އޯޑަރުކުރި 40މގ. ގެ ބެޗުން ވިކުނީ ގެނައި އަދަދުގެ ފަސް ޕަސެންޓަށްވުރެ ކުޑަ އަދަދެއްކަމަށާއި ބޭހުގެ މުއްދަތު 2018 ވަނަ އަހަރުގެ މާޗު މަހު ހަމަވެފައިވާކަމަށް ވެސް އޭސީސީން ބުނެއެވެ. އޭސީސީން ބުނީ، އެތެރެކޮށްފައިވާ ގިނަ އަދަދެއްގެ ބޭސް މާކެޓިންގެ ބޭނުމަކަށް ކަމަބުނެ ރިޒަރވްކޮށްފައިވާއިރު، އެ ބެޗްގެ ބޮޑު ބައެއް ނުވިކި އެސް.ޓީ.އޯއަށް 2,787,457.13ރ. (ދެމިލިއަން ހަތްސަތޭކައައްޑިހަ ހަތްހާސް ހަތަރުސަތޭކަ ފަންސާސްހަތް ރުފިޔާ ތޭރަ ލާރި) ގެ ގެއްލުންވެފައިވާކަމަށެވެ.
ތަހުގީގަށް ހާމަވި ކަންކަމާ ގުޅޭގޮތުން އޭސީސީއިން އިތުރަށް ބުނީ 2018 އިން ފެށިގެން ގެނައި އެ ބޭހުގެ އެއްވެސް ބައެއް ނައްތާލަން ނުޖެހޭކަމަށާއި 2016 ގެ ބެޗުން ވިކުނު ޢަދަދުތަކަށާއި 2018 އިން ފެށިގެން ގެނެސް ވިކުނު އެ ބޭހުގެ އަދަދުތަކަށް ބެލުމުން، 2018 އިން ފެށިގެން އެސް.ޓީ.އޯއިން ގެނެސްފައިވާ އެ ބޭހުގެ އަދަދުތަކަކީ ރާއްޖޭގެ މާކެޓްގައި އެ ބޭހުގެ ޑިމާންޑް އޮތްވަރުކަން އެނގޭ ކަމެއް ކަމަށެވެ. އެހެންކަމުން، 2016 ގައި އެ ބޭސް ގެނެސްފައިވަނީ ރާއްޖޭގައި އެ ބޭހުގެ ޑިމާންޑް އޮތްވަރާ އަޅާބަލާއިރު އެތައް ގުނައެއް އިތުރަށްކަމަށާއި، މި މައްސަލައިގައި އަމަލުކޮށްފައިވާ ގޮތުގެ ސަބަބުން ދައުލަތަށް ދެ މިލިއަނަށްވުރެ ގިނަ ރުފިޔާގެ ގެއްލުންވެފައި ވާކަމަށްވެސް އޭސީސީން ބުނެއެވެ.
