ކޮވިޑް19ގެ ވެކްސިން ދެމުންދާއިރު އެހެން ބައްޔެއްގެ ސަބަބުން ވެސް ސިއްހީ ހާލަތު ގޯސްވެދާނެ: ޑރ. ނަޒްލާ މުސްތަފާ

ކޮވިޑް19ގެ ވެކްސިން ދެމުންދާއިރު އެހެން ބައްޔެއްގެ ސަބަބުން ވެސް ސިއްހީ ހާލަތު ގޯސްވެދާނެ ކަމަށާއި، އާއްމުންގެ ހިތްތަކުގައި ސުވާލު އުފެދޭ ގޮތަށް މައުލޫމާތު ނުފެތުރުމަށް ޓެކްނިކަލް އެޑްވައިޒަރީ ގްރޫޕް (ޓެގް)ގައި ހިމެނިވަޑައިގަންނަވާ، ޕީޑިއޮޓްރިކް އިންފެކްޝަންސް އެކްސްޕާޓް، ޑރ. ނަޒްލާ މުސްތަފާ އިލްތިމާސްކުރައްވައިފިއެވެ.

ބުދަ ދުވަހު ރޭގެ ފަލަސުރުހީ ޕްރޮގްރާމްގައި ވާހަކަދައްކަވަމުން ޑރ. ނަޒްލާ ވިދާޅުވީ ވެކްސިން ނެރިފައިވަނީ ވަރަށް ގިނަ ދިރާސާތައް ހެދުމަށްފަހު ކަމަށެވެ. އަދި ރާއްޖޭގައި ކޮވިޝީލްޑް ވެކްސިން ޖެހުމުގެ މަސައްކަތް ފަށާފައިވަނީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ގެ ހުއްދައާއެކު ކަމަށާއި، މިހާރު ދުނިޔޭގެ ސިއްހަތު ޖަމުޢިއްޔާ (ޑަބްލިޔުއެޗްއޯ)އިން ވެސް މިވެކްސިންއަށް ހުއްދަ ދީފައިވާ ކަަމަށެވެ.

ޑރ. ނަޒްލާ ވިދާޅުވީ ވެކްސިން ޖެހުމަށްފަހު ސިއްހީ ގޮތުން ކުރިމަތިވާ ހުރިހާ މައްސަލައެއް ވެސް ރިޕޯޓުކުރާނެ ކަމަށާއި، ރާއްޖޭގައި ރިޕޯޓު ކުރެވޭ މައްސަލަތައް ނިސްބަތުން މަދު ކަމަށެވެ. އަދި ބޮޑަށް ސިއްހީ ހާލަތު ގޯސްވި ކޭސްތައް އިތުރަށް ބަލަމުންދާ ކަމަށް ޑރ. ނަޒްލާ ވިދާޅުވިއެވެ. އަދި ވިދާޅުވީ އެއީ ވެކްސިން ޖެހުމުގެ ސަބަބުން ކުރިމަތިވި މައްސަލަތޯ ކަށަވަރު ކުރާނެ ކަމަށެވެ.

ޑރ. ނަޒްލާ ވިދާޅުވީ މުޅި ދުނިޔެ ކޮވިޑް-19 ކޮންޓްރޯލް ކުރުމަށް މަސައްކަތް ކުރަމުންދާއިރު، ވެކްސިން ދެމުން ދަނީ އެބައްޔަށް ކަމަށެވެ. އެހެންކަމުން މުޖުތަމައުގައި އުޅޭ އެހެނިހެން ބަލިތައް އުޅޭނެ ކަމަށާއި، ވެކްސިން ޖެހި އެހެން ބަޔަކަށް މީހާ ހުށަހެޅިގެން ގޮސްދާނެ ކަމަށް ޑރ. ނަޒްލާ ވިދާޅުވިއެވެ. އަދި ވިދާޅުވީ އެފަދަ ހާލަތެއްގައި އެއީ ވެކްސިންގެ ސަބަބުން ކުރިމަތިވި ކަމެއްކަމަށް ނުނިންމޭނެ ކަމަށެވެ.

ޑރ. ނަޒްލާ ވިދާޅުވީ ވެކްސިން ދިނުމަށްފަހު ހަށިގަނޑުގައި ދީފާއީ ބާރު އުފެދުމަށް ނުވަތަ އެންޓި ބޮޑީ އުފެދެން ގާތްގަނޑަކަށް ދެހަފްތާ ނަގާ ކަމަށާއި، ބަލި ކޮންޓްރޯލް ކުރުމަށް އާބާދީގެ ބޮޑު ބަޔަކަށް ވެކްސިން ދޭން ޖެހޭ ކަމަށެވެ. ޑރ. ނަޒްލާ ވިދާޅުވީ މިހާރު ވެކްސިންގެ ފުރަތަމަ ޑޯޒް ދެވިފައިވަނީ ގާތްގަނޑަށް 46 އިންސައްތައަށް ކަމަށްވާއިރު، ބަލި ކޮންޓްރޯލް ކުރުމަށް ގާތްގަނޑަށް އާބާދީގެ 70 އިންސައްތައަށް ވެކްސިން ދޭން ޖެހޭ ކަމަށެވެ. އަދި ވެކްސިންގެ ސަބަބުން ކުރާ އަސަރު ދެނެގަތުމަށް އަދި ދުވަސް ނަގާނެކަން ޑރ. ނަޒްލާ ފާހަގަކުރެއްވިއެވެ.