142 މީހަކު ޕޮޒިޓިވްވެ، 177 މީހަކު ބަލިން ރަނގަޅުވެއްޖެ

ކޮވިޑް-19ށް އިތުރު 142 މީހަކު ޕޮޒިޓިވްވެ، 177 މީހަކު ބަލިން ރަނގަޅުވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭއިން) އާއްމުކޮށްފައިވާ ތަފާސްހިސާބުތައް ދައްކާ ގޮތުން އަންގާރަ ދުވަހުގެ އިރުއޮއްސި 6:00ން ބުދަ ދުވަހުގެ އިރުއޮއްސި 6:00ށް 3777 ސާމްޕަލެއް ނަގާފައިވާ ކަމަށާއި، 142 މީހަކު ޕޮޒިޓިވްވެފައިވާ ކަމަށެވެ. މީގެ ތެރެއިން މާލެ ސަރަހައްދުން 112 މީހަކު ޕޮޒިޓިވްވެފައިވާއިރު، އަތޮޅުތެރޭގެ ރަށްތަކުން 11 މީހަކު ޕޮޒިޓިވްވެފައިވެއެވެ. އަދި ހިންގަމުންދާ ރިސޯޓުތަކުން 19 މީހަކު ޕޮޒިޓިވްވެފައިވެއެވެ.

އެޗްޕީއޭއިން ބުނީ 2،371 އެކްޓިވް ކޭސް ހިމެނޭ ކަމަށާއި، 118 މީހަކަށް ހޮސްޕިޓަލްގައި ފަރުވާ ދެމުންދާ ކަމަށެވެ.

މިހާތަނަށް 589،866 ސާމްޕަލެއް ނަގާފައިވާއިރު 21،961 މީހަކު ޕޮޒިޓިވްވެފައިވެއެވެ. މީގެ ތެރެއިން 19،519 މީހަކު ބަލިން ވަނީ ރަނގަޅުވެފައެވެ.

މިބަލީގައި 64 މީހަކު ނިޔާވެފައިވެއެވެ.

ކޮވިޑް-19ގެ ތިންވަނަ ރާޅު ކުރިމަތިވީ މިދިޔަ ޖެނުއަރީ މަހުއެވެ. އޭރުން ފެށިގެން ކޮންމެ ދުވަހަކުވެސް ފެންނަ ކޭސްތަކުގެ އަދަދު 100ން މަތީގައި އަދި ގިނަ ދުވަސް ދުވަހު 150ން މަތީގައި ހުރުމަށް ފަހު މިމަހުގެ 13ވީ ހޮނިހިރު ދުވަހު 94 ކޭސް އަދި 14ވީ އާދިއްތަ ދުވަހު ރިޕޯޓު ކުރެވުނީ 96 ކޭސްއެވެ. އެދެ ދުވަހު 100ށް ދަށުން ކޭސްތައް ރިޕޯޓު ކުރެވުނު ކަމުގައިވީ ނަމަވެސް ބަލީގެ ނުރައްކާ ކުޑަ ނުވާ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން ބުނެފައިވެއެވެ.

އެޗްއީއޯސީން ބުނީ ބަލިން ރައްކާތެރިވުމަށް ގިނަ ފިޔަވަޅުތައް އެޅި ނަމަވެސް އާއްމު ރައްޔިތުން އެފިޔަވަޅުތަކަށް އަމަލު ނުކުރާނަމަ އެކަށީގެންވާ ނަތީޖާއެއް ނުފެންނާނެ ކަމަށެވެ. އެހެންކަމުން އަޅާފައިވާ ފިޔަވަޅުތަކަށް އަމަލުކުރުމަށް އެޗްއީއޯސީން ދަނީ އިލްތިމާސްކުރަމުންނެވެ.

ރާއްޖޭގައި ކޮވިޑް-19ގެ ކޭސްތައް އިތުރުވުމާއެކު ރައްކާތެރިކަމުގެ ގިނަ ފިޔަވަޅުތަކެއް ވަނީ އަޅާފައެވެ. އެގޮތުން މާލެ ސަރަހައްދުގައި ރޭގަނޑު 11:00ން 4:30 ދަނީ ކާފިއު ހިންގަމުންނެވެ. އަދި އިރުއޮއްސި ހައެއްގެ ފަހުން އެއްގަމު އުޅަނދުފަހަރު ދުއްވުން މަނާކޮށްފައިވާއިރު، ގްރޭޑް ހަތަކުން ދަށުގެ ދަރިވަރުންނަށް ކިޔަވައިދެމުން އަންނަނީވެސް އޮންލައިންކޮށްނެވެ. މީގެ އިތުރުން ރޭގަނޑު 8:00ގެ ފަހުން ރެސްޓޯރަންޓުތަކުގައި ޑައިން އިން ކުރުން ވެސް ވަނީ މަނާކޮށްފައެވެ.