ގިރިފުށި ނޫން ތަނަކަށް އަސްކަރީ ތަމްރީނު ބަދަލުކުރުމަށް ނުފެންނަކަމަށް މަޖިލީހުން ފާސްކޮށްފި

ގިރިފުށި ނޫންތަނަކަށް ސިފައިންގެ އަސްކަރީ ތަމްރީނުތައް ބަދަލުކޮށްފިނަމަ، ތަމްރީނުތަކަށް ބޭނުންވާ ސާމާނާއި، ސިފައިން އެތަނަކަށް ގޮސް އައިސްވުމަށް ދަތިތަކާއި ކުރިމަތިލާން ޖެހޭނެކަމަށް ފާހަގަކުރެވިފައިވާތީ ގިރިފުށި ނޫންތަނަކަށް އަސްކަރީ ތަމްރީނު ބަދަލުކުރުމަށް ނުފެންނަކަމަށް ރައްޔިތުންގެ މަޖިލީހުން ފާސްކޮށްފިއެވެ.

މިމައްސަލައަކީ ތުލުސްދޫ ދާއިރާގެ މެމްބަރ އިބްރާހީމް ނަސީމް ހުށަހަޅުއްވާފައިވާ މައްސަލައެކެވެ. މައްސަލަ ދިރާސާކޮށްފައިވަނީ ސަލާމަތީ ޚިދުމަތްތަކާއި ބެހޭ ކޮމިޓީންނެވެ.

ކޮމިޓީން ދިރާސާކުރުމަށްފަހު އެކުލަވާލި ކޮމިޓީ ރިޕޯޓްގައި ބުނެފައިވަނީ މި މައްސަލައަކީ 2019 ވަނަ އަހަރުގެ ނޮވެމްބަރ މަހުގެ 6 ވަނަ ދުވަހު ކ.ހިންމަފުށީގެ ހުޅަނގު ފަރާތުގައި އޮތް ސަފާރީ ބޯޓެއްގައި ހުރި ފަތުރުވެރިއެއްގެ ހަށިގަނޑަށް ގިރިފުށިން ދޫކޮށްލި ވަޒަނެއް އަރައި އަނިޔާވެފައިވާތީ އާއި އަދި އޭގެކުރިންވެސް ހިންމަފުށީގެ ގެއެއްގެ ދޮރޯއްޓަކަށާއި ގެސްޓް ހައުސްއެއްގެ ކުޑަ ދޮރަކަށް ވަޒަން އަރާފައިވާތީ ގިރިފުށި ނޫން ތަނަކަށް އަސްކަރީ ތަމްރީނުތައް ބަދަލުކޮށްދިނުމަށް އެރަށުގެ ރައްޔިތުން އެދެމުންދާކަމަށް ބަޔާންކޮށް އެކަން ބަލައި ދިނުމަށް އެދި ހުށަހަޅާފައިވާ މައްސަލައެއް ކަމެވެ.

މިމައްސަލަ ބެލުމަށްޓަކައި ބަޔާންކޮށްފައިވާ ހާދިސާތަކުގެ ހަގީގަތްތައް ދެނެގަތުމަށާއި އެހާދިސާތަކުގެ މައުލޫމާތު އޮޅުންފިލުވުމަށާއި އަދި މައްސަލައާ ގުޅިގެން ޑިފެންސް މިނިސްޓްރީ އާއި މޯލްޑިވްސް ނޭޝަނަލް ޑިފެންސް ފޯސް އަށް ލިޔެގެން އަސްކަރީ ތަމްރީނުތައް އެހެން ރަށަކަށް ބަދަލު ކުރެވިދާނެތޯ ކޮމިޓީން ބަލާފައިވާނެކަމަށް ކޮމިޓީ ރިޕޯޓްގައި ބުނެފައިވެއެވެ.

މިގޮތުން މައްސަލަ ދިރާސާކުރިއިރު 10 ހޯދުމެއް ވަނީ ހޯދާފައެވެ. އެގޮތުން ސިފައިންނަށް ތަމްރީނު ދިނުމަށް ބޭނުންކުރާ ގިރިފުއްޓަކީ 1986 ވަނަ އަހަރުން ފެށިގެން ސިފައިންގެ އަސްކަރީ ތަމްރީނުތައް ކުރިޔަށް ގެންދެވޭ ރަށެއްކަމެވެ.

އަދި ސިފައިން ހިންގާ ހުރިހާ އަސްކަރީ ތަމްރީނުތަކަކީ ރައްކާތެރިކަމުގެ ގޮތުން ވަރަށް ޚަރުދަނާ ފިޔަވަޅުތައް އެޅިގެން ކުރިޔަށް ގެންދެވޭ ތަމްރީނުތަކެއް ކަމުގައި ވީނަމަވެސް، ތަމްރީނުތަކުގެ ތެރޭގައި ދިމާވި އެކިއެކި ހާދިސާތަކާއި ގުޅިގެން ސިފައިންގެ އަސްކަރީ ތަމްރީނުތައް ގިރިފުށި ނޫން އެހެން ތަނަކަށް ބަދަލުކުރުމަށް މީގެކުރިންވެސް މަޝްވަރާކޮށްފައިވާކަމަށް ކޮމިޓީން ފާހަގަކޮށްފައިވެއެވެ.

ގިރިފުއްޓަކީ ސިފައިންގެ ތަމްރީނުތައް ހުއްޓުމެއްނެތި އަހަރުގެ ހުރިހާ ދުވަހެއްގައިވެސް ކުރިޔަށް ގެންދެވޭ ރަށަކަށްވުމުގެ އިތުރުން ދުވާލަކު އެތައް ފަހަރަކު ހަތިޔާރުގެ އެކިއެކި ތަމްރީނުތަކަށް ސިފައިން ގޮސް އައިސް ހަދަންޖެހޭ ރަށަކަށްވާތީ، މާލެއާ ދުރު ހިސާބަކަށް ސިފައިންގެ އަސްކަރީ ތަމްރީނުތައް ބަދަލުކޮށްފިނަމަ، ތަމްރީނުތަކަށް ބޭނުންވާ ސާމާނާއި ސިފައިން އެތަނަކަށް ގޮސް އައިސްވުމަށް ދައުލަތުގެ ބަޖެޓުން ބޮޑު ހޭދައެއް ކުރަންޖެހި ތަމްރީނުތައް ކުރިޔަށް ގެންދެވިދާނެކަމަށް ނުފެންނަކަމަށް ކޮމިޓީ ރިޕޯޓްގައި ބުނެފައިވެއެވެ.

ސިފައިންގެ ތަމްރީނުތައް ގިރިފުށީގައި ކުރިޔަށް ގެންދާއިރު، ނުރައްކާތެރި ހާދިސާތައް ހިނގިދިޔަ ނުދިނުމަށްޓަކައި، ހަތިޔާރު ބޭނުންކޮށްގެން ކުރިޔަށްގެންދާ އަސްކަރީ ތަމްރީނުތަކުގެ ސަލާމަތީ ކަންކަން ކަށަވަރުކުރުމަށް ޚާއްސަ ކޮމިޓީއެއް އެކުލަވާލާފައިވާކަމަށް ރިޕޯޓްގައި ބުނެފައިވެއެވެ.

އެހެންކަމުން މިހާރު ގިރިފުށީގައި ގެންދަނީ ވަރަށް ޚަރުދަނާ އުސޫލުތަކެއްގެ ދަށުން ކުރިޔަށް ގެންދެވޭ ލައިވް ފަޔަރިންތައް ކަމުގައިވާތީ ގިރިފުށި ހިމެނޭ ސަރަހައްދުގެ އެއްގަމާއި ކަނޑާއި އަދި ވައިގެ ސަރަހައްދުގެ ސަލާމަތާއި ރައްކާތެރިކަމަށް ނުރައްކަލެއް ކުރިމަތިވުމަކީ ވަރަށް ނާދިރުކަމެއްކަމަށް ކޮމިޓީއަށް ހޯދިފައިވާކަމަށް ރިޕޯޓްގައިވެއެވެ.

އަދި ހުށަހެޅިފައިވާ މައްސަލައިގައި ބަޔާންކޮށްފައިވާ ހާދިސާތައް މިލިޓަރީ ޕޮލިސް މެދުވެރިކޮށް ތަހުގީގު ކުރެވި، އެ މައްސަލަތަކާއި ގުޅިގެން އަޅަންޖެހޭ ފިޔަވަޅުތައް މޯލްޑިވްސް ނޭޝަނަލް ޑިފެންސް ފޯސް އިން އަޅާފައިވާކަމުގެ މައުލޫމާތު ލިބިފައިވާކަމަށްވެސް ކޮމިޓީ ރިޕޯޓްގައި ފާހަގަކޮށްފައިވެއެވެ.

މިކަންކަމުގެ މައްޗަށް ބެލުމަށްފަހު ކޮމިޓީން ހުށަހަޅާފައިވަނީ ސިފައިންގެ ތަމްރީނުތައް ގިރިފުށީގައި ކުރިޔަށް ގެންދާއިރު ހަތިޔާރު ބޭނުންކޮށްގެން ކުރިޔަށް ގެންދާ އަސްކަރީ ތަމްރީނުތައް ހަމައެކަނި ފަޔަރިންގ ރޭންޖުގައި ކުރިޔަށް ގެންދިޔުމަށާއި، ފަޔަރިންގ ރޭންޖުން ބޭރަށް ވަޒަން ދަތުރުކޮށް ހިނގާފައިވާފަދަ ނުރައްކާތެރި ހާދިސާތައް ހިނގިޔަ ނުދިނުމަށްޓަކައި ރޭންޖުން ބޭރަށް ވަޒަން ނުދާނެކަން ކަށަވަރުކުރުމާއެކު އެފިޔަވަޅުތައް ތަންފީޒުކުރެވޭކަން ކަށަވަރުކުރުމަށް ވަނީ ހުށަހަޅާފައެވެ.

މިރިޕޯޓް ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 48 މެމްބަރުންގެ އިއްތިފާގުންނެވެ.