ޒުވާނުންގެ ކްރިއޭޓިވިޓީ ތަރައްގީކޮށް ކުރިއަރުވާނެ ބަޖެޓެއް ރާއްޖޭގައި ނެތް: މިނިސްޓަރ މައުސޫމް
17 މާރިޗު 2021 | ބުދަ 02:00ބޭރު ފަރާތްތަކަށް 49 ޕަސަންޓާ ހަމައަށް ޝެއާ ވިއްކައިގެން ވިޔަފާރި ފެށޭނެ
ޓޫރިޒަމް މިނިސްޓަރ ޑރ. އަބްދުﷲ މައުސޫމް
ދިވެހިންނަކީ ވަރަށް ކްރިއޭޓިވް ބައެއް ކަމަށާއި، އެކަން ފުޅާކޮށް ތަރައްގީކުރަން އިންވެސްޓްކުރާއިރު ދިމާވާ އެންމެ ބޮޑު ގޮންޖެހުމަކީ ރާއްޖޭގެ ޒުވާނުންގެ ކްރިއޭޓިވް ވިސްނުންތައް ކުރިއަރުވަން ބޭނުންވާ ބަޖެޓު ދެވެން ނެތުން ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެ ޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން މިނިސްޓަރ މައުސޫމް ވިދާޅުވީ ދިވެހި ޒުވާނުންގެ ވަރަށް ރަނގަޅު ވިސްނުންތަކާއި މޮޅެތި ހިޔާލުތައް އެބަހުރި ކަމަށެވެ. އެކަމަކު އެ ހިޔާލުތަކުން ރަނގަޅު އައުޓްޕުޓްއެއް ނެރެން ބޭނުންވާ ފައިނޭންސް ފޯރުކޮށްދޭނެ ފަންޑެއް ނެތް ކަމަށާއި އޭގެ ސަބަބުން އެކަންކަމަށް ބޭރުގެ ގައުމުތަކާ ގުޅިގެން މަސައްކަތްކުރަން މަޖުބޫރުވެފައިވާ ކަމަށެވެ.
މިނިސްޓަރ ވިދާޅުވީ ސަރުކާރުގެ އަމާޒަކީ މި ދާއިރާގައި ދިވެހި ޒުވާނުން ކުރިއެރުވުން ކަމަށާއި، ބޭރު ފަރާތްތަކާ ގުޅޭނީ ވެސް ދިވެހިންނަށް އޮތް ފުރުސަތުތައް ނުގެއްލޭ ގޮތަށް ކަމަށެވެ. ބޭރުގެ ބަޔަކާ ގުޅިގެން ވިޔަފާރިއެއް ފެށުން އެއީ މައްސަލައެއް ނޫން ކަމަށާއި، އަމިއްލައަށް އެކަން ވާން ނެތުމުން ބަޔަކާ ގުޅިގެން ފަށަން ޖެހޭނެ ކަމަށް މިނިސްޓަރ ވިދާޅުވިއެވެ. އަދި ކުރިއަރާނީ އެގޮތަށް ކަމަށް ވެސް ވިދާޅުވިއެވެ.
މިނިސްޓަރ ވިދާޅުވީ ފަތުރުވެރިކަމުގެ ދާއިރާގައި ހޮޓާ ތަކާއި ޑައިވިން ސެންޓަރ ކަހަލަ ކުދި ވިޔަފާރިތައް ހިންގުމުގައި ޒުވާނުންނަށް ފަސޭހައިން އެމަގު ފަހިވާނެ ގޮތަށް ބަދަލުތައް ގެންނަން ނިންމާފައިވާ ކަމަށެވެ. އެގޮތުން ކޮންމެ ވިޔަފާރިއެއްގެ ވެސް މެޖޯރިޓީ ޝެއާ ދިވެހިންނަށް ނުގެއްލޭ ވަރަށް 49 ޕަސަންޓާ ހަމައަށް ބޭރު ފަރާތްތަކަށް ވިޔަފާރިތަކުގެ ޝެއާ ނެގޭ ގޮތަށް ބަދަލުކުރައްވާނެ ކަމަށް ވިދާޅުވިއެވެ.
މިނިސްޓަރ ވިދާޅުވީ މިހާރު ވިޔަފާރިތައް ފަށައިގެން ހިންގަނީ ބެންކު މެދުވެރިކޮށް ނަގާ ލޯނުތަކާއި އެފަދަ އެހީތަކުގައި ކަމަށެވެ. މިގޮތަށް ފުރުސަތު ފަހިކޮށްދިނުމުން ވިޔަފާރި ހިންގާނެ އިތުރު މަގެއް ލިބެނީ ކަމަށާއި އެ ބަދަލާއެކު ބެންކަކަށް 15 ޕަސަންޓު އިންޓްރަސްޓް ފައިސާ ދެއްކުމާއި، ވިޔަފާރިން ލިބޭ ފައިދާގެ ފަސް ވަރަކަށް ޕަސަންޓު ޝެއާ ހޯލްޑަރަށް ދިނުމާ މެދު ގޮތް ނިންމުމުގެ ފުރުސަތު ވިޔަފާރުވެރިޔާއަށް އޮންނާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ސަރުކާރުގެ ވިސްނުމާ އެއްގޮތަށް މި ދާއިރާގައި ޒުވާނުން ކުރިއަރުވަން މަސައްކަތްކުރަމުން އަންނަ ކަމަށެވެ. އެގޮތުން ޒުވާނުން ބޭނުންވާ މަގުފަހިކޮށްދިނުމަށް ހަމައެކަނި ހޮޓާ ގެސްޓް ހައުސް ވިޔަފާރީގެ ބަދަލުގައި އެއާ ގުޅިގެން އަންނަ ޑައިވް ސެންޓަރ ތަކާއި އެފަދަ އެކު ކުޅިވަރުތަކުގެ ވިޔަފާރިތަކަށް ވެސް މަގުފަހިކޮށްދޭން މަސައްކަތްކުރަމުން އަންނަ ކަމަށް ވިދާޅުވިއެވެ.
