އިބްރަހިމޮވިޗް އަލުން ސްވިޑެންގެ ޤައުމީ ޓީމަށް

ސްވިޑެންގެ ޤައުމީ ފުޓްބޯޅަ ޓީމަށް ކުޅުން ހުއްޓާލި ތަޖުރިބާކާރު ފޯވާޑް ޒްލަޓާން އިބްރަހިމޮވިޗް، އެ ނިންމުން ބަދަލުކޮށް އަލުން ޤައުމީ ޓީމަށް ކުޅެން ނިންމައިފިއެވެ.

ސްވިޑެންގެ ކެޕްޓަންކަން އަދާކުރި އިބްރަހިމޮވިޗް ޤައުމީ ޓީމަށް ކުޅުން ހުއްޓާލީ 2016 ވަނަ އަހަރުގެ ޔޫރޯ ފުޓްބޯޅަ މުބާރާތުގައި ގްރޫޕް ސްޓޭޖުގެ ފަހު މެޗުގައި ބެލްޖިއަމާ ދެކޮޅަށް ކުޅުނު މެޗަށްފަހުއެވެ. އެއަށްފަހު 2018 ވަނަ އަހަރުގެ ފީފާ ވޯލްޑް ކަޕުގައި ސްވިޑެންގެ ޤައުމީ ޓީމަށް އިބްރަހިމޮވިޗް އަލުން ކުޅުވަން އެ ޤައުމުގެ ކޯޗު ޖޭން އެންޑަސަން މަސައްކަތްކުރި ނަމަވެސް، އެކަން ކާމިޔާބުވެފައެއް ނުވެއެވެ.

އެމެރިކާގެ އެލްއޭ ގެލެކްސީ ދޫކޮށް 2019 ވަނަ އަހަރުގެ ޑިސެމްބަރު މަހުގެ ފަހުކޮޅު އިބްރަހިމޮޗިވް އޭސީ މިލާނަށް އަލުން ބަދަލުވިއިރު، އޭގެ ފަހުން އޭނާ އަންނަނީ ތަފާތު މޮޅު ކުޅުމެއް ދައްކަމުންނެވެ. އެގޮތުން މި ސީޒަނުގެ އިޓާލިއަން ލީގުގައި އިބްރަހިމޮވިޗް ވަނީ ކުޅުނު 14 މެޗުގައި ޖުމްލަ 14 ލަނޑު ޖަހާފައެވެ. އެއާއެކު ސްވިޑެންގެ ޤައުމީ ޓީމުގައި އިބްރަހިމޮވިޗް އަލުން ހިމެނުމަށް އެ ޤައުމުގެ ފުޓްބޯޅަ އެސޯސިއޭޝަނުން މަސައްކަތްކުރިއިރު، ކުރިއަށް އޮތް ވޯލްޑް ކަޕް ކޮލިފައިން މެޗުތަކަށް ސްވިޑެނުން އެކުލަވާލި ސްކޮޑުގައި އުމުރުން 39 އަހަރުގެ އިބްރަހިމޮޗިވް ވަނީ ހިމަނާފައެވެ.

ސްވިޑެންގެ ޤައުމީ ޓީމުގައި އިބްރަހިމޮވިޗް އަލުން ހިމެނިއިރު، އޭނާ އެންމެ ފުރަތަމަ ޤައުމީ ޓީމަށް މެޗެއް ކުޅެދީފައިވަނީ 2001 ވަނަ އަހަރުއެވެ. އޭނާ އޭރު ސްވިޑެންނަށް ކުޅެން ނިންމީ ބޮސްނިއާ އާއި ކްރޮއޭޝިއާގެ ޤައުމީ ޓީމަށް ކުޅެން ލިބުނު ފުރުސަތު ދޫކޮށްލުމަށްފަހުއެވެ. މީގެ ކުރިން 2016 ވަނަ އަހަރު ޤައުމީ ޓީމަށް ކުޅުން އިބްރަހިމޮވިޗް ހުއްޓާލިއިރު، އޭނާއަކީ އެ ޤައުމަށް އެންމެ ގިނަ ލަނޑު ޖަހައިދީފައިވާ ކުޅުންތެރިޔާއެވެ. އެގޮތުން އިބްރަހިމޮވިޗް ވަނީ ސްވިޑެންގެ ޤައުމީ ޓީމަށް 116 މެޗު ކުޅެދީ، 62 ލަނޑު ޖަހައިދީފައެވެ.އަދި އޭނާ ވަނީ އެ ޤައުމުގެ އެންމެ މޮޅު ފުޓްބޯޅަ ކުޅުންތެރިޔާގެ އެވޯޑު 12 ފަހަރު ހޯދާފައެވެ.