އިތުރު އެއް އަހަރު އޭސީ މިލާންގައި މަޑުކުރުމަށް އިބްރަހިމޮވިޗް ނިންމައިފި

އިތުރު އެއް އަހަރު އޭސީ މިލާންގައި މަޑުކުރުމަށް ޒްލަޓާން އިބްރަހިމޮވިޗް ނިންމައިފިއެވެ.

އިބްރަހިމޮވިޗް އޭސީ މިލާނާއެކު ހަދާފައިވާ އެއްބަސްވުމުގެ މުއްދަތު ނިމުނު ސީޒަނުގެ ނިޔަލަށް ވަނީ ހަމަވެފައެވެ. އެއާއެކު އޭނާ އޭރު ބުނީ ގިނަ ފިޒިކަލް މައްސަލަތަކެއް އެބަހުރި ކަމަށާއި، ނަމަވެސް ކުރިމަގާ މެދު ވަރަށް އަވަހަށް ގޮތެއް ނިންމާނެކަމަށެވެ.

ދާދި ފަހުން އިބްރަހިމޮވިޗް ވަނީ ކަކުލުގެ ސާޖަރީއެއް ވެސް ކޮށްފައެވެ. އެކަން ހާމަކުރަމުން އޭސީ މިލާނުން ބުނީ ކަކުލުގެ ސާޖަރީއެއް ހަދަން ޖެހުމުގެ ސަބަބުން މަދުވެގެން ހަތް މަހާއި އަށް މަހުގެ މުއްދަތަކަށް އިބްރަހިމޮވިޗް ކުޅުމާ ދުރުގައި ހުންނަން ޖެހޭނެކަމަށެވެ. އެއާއެކު އޭނާ އޭސީ މިލާނުގައި މަޑުކުރާނެ ކަމާމެދު އޮތީ ސުވާލު އުފެދިފައެވެ.

އިބްރަހިމޮވިޗް ވަނީ އޭސީ މިލާނާއެކު ކުރިއަށް ދާން ނިންމާފައިކަމަށް ކުޅިވަރު ނޫސްވެރިޔާ ފެބްރީޒިއޯ ރޮމާނޯ ވަނީ ބުނެފައެވެ. ރޮމާނޯ ބުނި ގޮތުގައި އިބްރަހިމޮވިޗް ވަނީ އެއް އަހަރު އެ ޓީމުގައި މަޑުކުރަން ނިންމާފައެވެ. އެހެންކަމުން އަންނަ އަހަރުގެ ޖޫން މަހުގެ ނިޔަލަށް އޭނާ އެ ޓީމުގައި މަޑުކުރާނެއެވެ. ރޮމާނޯ ބުނި ގޮތުގައި ކަކުލުގެ ސާޖަރީގެ ސަބަބުން އޭނާ ރިކަވާވުމަށް ދުވަސް ނަގާނެއެވެ. އެހެންކަމުން އިބްރަހިމޮވިޗް ހުރީ މުސާރަ ކުޑަކުރަން އެއްބަސްވެގެން ކަމަށް ވެސް ރޮމާނޯ ވަނީ ބުނެފައެވެ.

އެންމެ ފަހުން އޭސީ މިލާނަށް ބަދަލުވުމަށްފަހު އިބްރަހިމޮވިޗް ވަނީ އެ ކުލަބާއެކު މޮޅު ކުޅުމެއް ދައްކާފައެވެ. އުމުރުން 40 އަހަރުގެ އިބްރަހިމޮވިޗް ވަނީ އޭގެ ފަހުން އޭސީ މިލާނަށް ކުޅެދިން 74 މެޗުން 33 ލަނޑު ޖަހާފައެވެ. އޭނާ އެންމެ ފުރަތަަމަ އޭސީ މިލާނަށް ކުޅުނީ ލޯނު އެއްބަސްވުމެއްގެ ދަށުން 2010 ވަނަ އަހަރުއެވެ. އޭގެ ފަހުން 2011 ވަނަ އަހަރު އޭނާ ވަނީ އެ ކުލަބާއެކު ދާއިމީ އެއްބަސްވުމެއް ހަދާފައެވެ.