ފައިގެ ފުއްނާބަށް ލިބުނު އަނިޔާއެއްގެ ސަބަބުން ޔުއެފާ ޗެމްޕިއަންސް ލީގުގެ ގްރޫޕް ބީގައި ލިވަޕޫލާ ދެކޮޅަށް އޭސީ މިލާނުން ކުޅޭ މެޗުގައި ތަޖުރިބާކާރު ފޯވާޑް ޒްލަޓާން އިބްރަހިމޮވިޗަށް ނުކުޅެވޭނެކަން ޔަގީންވެއްޖެއެވެ.

ކަކުލަށް ލިބުނު ސީރިއަސް އަނިޔާއަކުން ރަނގަޅުވެ އިޓާލިއަން ލީގުގައި މިދިޔަ އާދީއްތަ ދުވަހުގެރޭ ލާޒިއޯ އަތުން މިލާން މޮޅުވި މެޗުގައި އުމުރުން 39 އަހަރުގެ އިބްރަހިމޮވިޗް ވަނީ ކުޅެފައެވެ. އެ މެޗުގައި އިބްރަހިމޮވިޗް ކުޅުނުއިރު، މީގެ ކުރިން ކަކުލަށް ލިބުނު އަނިޔާއާ ގުޅިގެން އޭނާއަށް މި އަހަރުގެ ހޫނު މޫސުމުގައި ބޭއްވި ޔޫރޯ ފުޓްބޯޅަ މުބާރާތްވެސް ގެއްލުނެވެ.

ނަމަވެސް އަނިޔާއިން ރަނގަޅުވެ އައިސް ކުޅުނު ފުރަތަމަ މެޗުގައި އިބްރަހިމޮވިޗް ވަނީ ލަނޑު ޖަހާފައެވެ. އެއާއެކު އިބްރަހިމޮވިޗް ވެފައިވަނީ އިޓާލިއަން ލީގުގައި ލަނޑު ޖެހި، އިޓަލީ ނޫން އެހެން ގައުމެއްގެ އެންމެ އުމުރުން ދޮށި ކުޅުންތެރިޔާއަށެވެ. އަދި އެ ލަނޑާއެކު އިބްރަހިމޮވިޗް ވަނީ ފާއިތުވި 24 އަހަރު އޭނާ ކުޅުނު ކޮންމެ ކުލަބެއް ވާދަކުރާ ލީގުގައިވެސް ލަނޑު ޖަހާފައެވެ.

އެކަމަކު މި ސީޒަނުގެ ޗެމްޕިއަންސް ލީގުގައި މިލާނުން ކުޅޭ ފުރަތަމަ މެޗުގައި އިބްރަހިމޮވިޗަށް ނުކުޅެވޭނެ ކަމަށް އެ ޓީމުގެ ކޯޗު ސްޓެފާނޯ ޕިއޯލީ ވަނީ ބުނެފައެވެ. މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ޕިއޯލީ ބުނީ ލާޒިއޯ މެޗަށްފަހު އިބްރަހިމޮވިޗުގެ ފަޔަށް ކޮންމެވެސް ވަރެއްގެ އަނިޔާއެއްވި ކަމަށާއި، އެކަމަކު ލިވަޕޫލް މެޗަށް އެ އަނިޔާ ރަނގަޅުވާނެ ކަމަށް މީގެ ކުރިން ބެލެވުނު ކަމަށެވެ. ނަމަވެސް އިބްރަހިމޮވިޗް އަދިވެސް އުޅެނީ ތަދުވާތީ ކަމަށާއި، އެހެންކަމުން އިތުރު ރިސްކެއް ނުނަގަން ލިވަޕޫލް މެޗުގައި އޭނާ ބޭނުން ނުކުރަން ނިންމާފައިވާ ކަމަށްވެސް ބުންޏެޗެ.

މި ސީޒަނުގެ ޗެމްޕިއަންސް ލީގުގައި މިލާން ވާދަކުރާއިރު، އެ ޓީމުން އެންމެ ފަހުން ޗެމްޕިއަންސް ލީގުގައި ވާދަކޮށްފައިވަނީ 2013-2014 ވަނަ އަހަރުގެ ސީޒަނުގައެވެ. އޭގެ ފަހުން މެދުކެނޑުމަކަށްފަހު މިލާން އަލުން ޗެމްޕިއަންސް ލީގުގައި ވާދަކުރާއިރު، ލިވަޕޫލާއި މިލާނުގެ ކުރިމަތިލުންތަކަކީ ތާރީޚީ ކުރިމަތިލުންތަކެކެވެ. އެގޮތުން ލިވަޕޫލުން ވަނީ 2005 ވަނަ އަހަރާއި 2007 ވަނަ އަހަރުގެ ޗެމްޕިއަންސް ލީގު ފައިނަލުގައި މިލާނާ ދެކޮޅަށް ކުޅެފައެވެ. އެ ގޮތުން 2005 ވަނަ އަހަރު ލިވަޕޫލް މޮޅުވި ނަމަވެސް، 2007 ވަނަ އަހަރު މޮޅުވީ މިލާނެވެ.

މި ފަހަރުގެ ޗެމްޕިއަންސް ލީގުގެ މަރުގެ ގްރޫޕް ގޮތުގައި މިލާނާއި ލިވަޕޫލް ހިމެނޭ ގްރޫޕް ބީ ފާހަގަކޮށްލެވޭއިރު، ދެން މި ގްރޫޕުގައި ހިމެނެނީ ސްޕެއިނުގެ އެތުލެޓިކޯ މެޑްރިޑާއި ޕޯޗުގަލުގެ ޕޯޓޯއެވެ.

ޗެމްޕިއަންސް ލީގުގެ ގްރޫޕް ސްތޭޖުގައި ލިވަޕޫލާއި މިލާން ބައްދަލުކުރާ މެޗު ފަށާނީ ބުދަ ދުވަހުގެރޭ ރާއްޖެ ގަޑިން 00:00 ގައެވެ. މި މެޗު ކުޅޭނީ ލިވަޕޫލުގެ ދަނޑުގައެވެ.