ކަކުލަށް ލިބުނު އަނިޔާއާ ގުޅިގެން އަންނަ މަހު ފަށާ ޔޫރޯ ފުޓްބޯޅަ މުބާރާތުގައި ސްވިޑެންގެ ތަޖުރިބާކާރު ފޯވާޑް ޒްލަޓާން އިބްރަހިމޮވިޗަށް ކުޅެވިދާނެ ކަމާމެދު ސުވާލު އުފެދިއްޖެއެވެ.

އުމުރުން 39 އަހަރުގެ އިބްރަހިމޮވިޗަށް އަނިޔާވީ އިޓާލިއަން ލީގުގައި އާދީއްތަ ދުވަހުގެރޭ ޔުވެންޓަސް އަތުން 3-0 ގެ ނަތީޖާއަކުން އޭސީ މިލާން މޮޅުވި މެޗުގައެވެ. އެ މެޗުގެ 66 ވަނަ މިނެޓުގައި ކަކުލަށް ލިބުނު އަނިޔާއެއްގެ ސަބަބުން އިބްރަހިމޮވިޗް ވަނީ ބަދަލުކޮށްފައެވެ.

އެ މެޗަށްފަހު މިލާނުގެ ކޯޗު ސްޓެފާނޯ ޕިއޯލީ ބުނީ މެޗުގެ ކުރިންވެސް އިބްރަހިމޮވިޗް ހުރީ މުޅިން ފިޓްކޮށެއް ނޫން ކަމަށާއި، އަދި މި މެޗުގައި އޭނާގެ ކަކުލަށް ލިބުނު އަނިޔާ ސީރިއަސް ނުވާނެ ކަމަށް އުއްމީދުކުރާ ކަމަށެވެ. އިބްރަހިމޮވިޗުގެ ކަކުލަށް ލިބުނު އަނިޔާގެ ތަފުސީލު އަދި މިހާތަނަށް ހާމަކޮށްފައި ނުވި ނަމަވެސް، ލީގުގައި ބާކީ އޮތް ތިން މެޗުގައި އޭނާއަށް ނުކުޅެވޭނެކަން ޔަގީންވެފައިވާ ކަމަށް ރިޕޯޓުތައް ބުނެއެވެ. އަދި އަންނަ މަހު ބާއްވާ ޔޫރޯގައި އިބްރަހިމޮވިޗަށް ކުޅެވިދާނެ ކަމާމެދު ސުވާލު އުފެދިފައިވާ ކަމަށްވެސް ރިޕޯޓުތައް ބުނެއެވެ.

އިބްރަހިމޮވިޗަށް އަނިޔާވިއިރު، މި ސީޒަނުގައި އޭނާއަށް ވަނީ އަނިޔާގެ ގިނަ މައްސަލަތަކެއް ކުރިމަތިވެފައެވެ. އެގޮތުން މިހާތަނަށް މި ސީޒަނުގައި އިބްރަހިމޮވިޗަށް ވަނީ އަނިޔާގެ ސަބަަބުން 16 މެޗު ގެއްލިފައެވެ.

އިބްރަހިމޮވިޗަށް ޔޫރޯގައި ނުކުޅެވިދާނެ ކަމަށް ރިޕޯޓުތައް ބުނިއިރު، މީގެ ކުރިން 2016 ވަނަ އަހަރު ސްވިޑެންގެ ގައުމީ ފުޓްބޯޅަ ޓީމަށް ކުޅުން ހުއްޓާލި ފޯވާޑް ދާދި ފަހުން ވަނީ އެ ނިންމުން ބަދަލުކޮށް އަލުން ގައުމީ ޓީމަށް ކުޅެން ފަށާފައެވެ. އެގޮތުން ފީފާ ވޯލްޑް ކަޕުގެ ޔޫރަޕް ކޮލިފައިންގައި މި ފަހުން ސްވިޑެން ކުޅުނު މެޗުތަކުގައި އޭނާ ވަނީ ކުޅެފައެވެ.

މި ސީޒަނުގައި އިބްރަހިމޮވިޗަށް އަނިޔާގެ ގިނަ މައްސަލަތަކެއް ކުރިމަތިވި ނަމަވެސް، އޭނާ އަންނަނީ އަލުން އަނބުރާ މިލާނަށް ބަދަލުވުމަށްފަހު ތަފާތު މޮޅު ކުޅުމެއް ދައްކަމުންނެވެ. އެގޮތުން މި ފަހުން މިލާނަށް ބަދަލުވުމަށްފަހު، އިބްރަހިމޮވިޗް ވަނީ މިހާތަނަށް މިލާނަށް ކުޅެދިން 47 މެޗުގައި 28 ލަނޑު ޖަހާފައެވެ. އަދި ދާދި ފަހުން އޭނާ ވަނީ މިލާނާއެކު ހަދާފައިވާ އެއްބަސްވުން އިތުރު އެއް އަހަރަށް އާކޮށްފައެވެ.