ބެޓިން ކުންފުންޏެއްގައި ސްވިޑެންގެ ތަޖުރިބާކާރު ފޯވާޑް ޒްލަޓާން އިބްރަހިމޮވިޗުގެ ކުންފުންޏެއްގެ ހިއްސާއެއް އޮތުމުން، އިބްރަހިމޮވިޗް ޖޫރިމަނާކުރަން ޔުއެފާއިން ނިންމައިފިއެވެ.

ދާދި ފަހުން ސްވިޑެންގެ މީޑިއާއަކުން ވަނީ ބެޓިން ކުންފުންޏެއް ކަމަށްވާ "ބެޓްހާޑް" ގެ 10 އިންސައްތަ ހިއްސާ އިބްރަހިމޮވިޗުގެ ކުންފުންޏެއް އަތުގައި އޮންނަ ކަމަށް ރިޕޯޓުކޮށްފައެވެ. އަދި އެކަމަށް ބާރުލިބޭ އެއް ހެއްކަކީ 2018 ވަނަ އަހަރު ބެޓްހާޑުން އެ ކުންފުނީގެ އެމްބެސަޑަރެއްގެ ގޮތުގައި އިބްރަހިމޮވިޗް ތައާރަފުކުރުން ކަމަށްވެސް ވަނީ ރިޕޯޓުކޮށްފައެވެ.

ޔުއެފާގެ ގަވާއިދު ބުނާ ގޮތުން މުބާރާތެއްގައި ކުޅޭ ކުޅުންތެރިއަކަށް ބެޓް ކުރާ އެއްވެސް ކުންފުންޏަކުން މާލީ މަންފާ ލިބޭގޮތަށް އެއްބަސްވުމެއް ނެހެދޭނެއެވެ. އެހެންކަމުން އެ މައްސަލަ ތަހުގީގުކުރަން ޔުއެފާއިން އެތިކްސް އެންޑް ޑިސިޕްލިނަރީ އިންސްޕެކްޓަރެއް މީގެ ކުރިން އައްޔަންކުރިއިރު، މީގެ ކުރިން ބެލެވިފައި އޮތީ މި މައްސަލައިގައި ތިން އަހަރުގެ ސަސްޕެންޝަނެއް އިބްރަހިމޮވިޗަށް އައުން ގާތް ކަމަށެވެ.

އެކަމަކު މައްސަލަ ބެލުމަށްފަހު ޔުއެފާއިން ވަނީ 50،000 ޔޫރޯއިން އިބްރަހިމޮވިޗް ޖޫރިމަނާކުރަން ނިންމާފައެވެ. އަދި ހަމަ މި މައްސަލައިގައި އިބްރަހިމޮވިޗް ކުޅެމުން އަންނަ އޭސީ މިލާން ވަނީ 25،000 ޔޫރޯއިން ޖޫރިމަނާކޮށްފައެވެ.

ޔުއެފާއިން އިބްރަހިމޮވިޗް ޖޫރިމަނާކުރިއިރު، ދާދި ފަހުން އޭނާ ވަނީ މިލާނާއެކު ހަދާފައިވާ އެއްބަސްވުން އިތުރު އެއް އަހަރަށް އާކޮށްފައެވެ. މިއީ 2019 ވަނަ އަހަރުގެ ޑިސެމްބަރު މަހުގެ ފަހުކޮޅު އަލުން އަނބުރާ މިލާނަށް ބަދަލުވުމަށްފަހު، އުމުރުން 39 އަހަރުގެ އިބްރަހިމޮވިޗް މިލާނުގެ އެއްބަސްވުން އާކުރި ދެވަނަ ފަހަރެވެ. އެގޮތުން އެންމެ ފުރަތަމަ އިބްރަހިމޮވިޗް މިލާނާ ގުޅުނީ އެއް އަހަރުގެ އެއްބަސްވުމެއްގެ ދަށުންނެވެ. އަދި ފަހުން މިދިޔަ އަހަރުގެ ސެޕްޓެމްބަރު މަހު އިބްރަހިމޮވިޗް ވަނީ މި ސީޒަނުގެ ނިޔަލަށް އެއްބަސްވުން އާކޮށްފައެވެ. އައު އެއްބަސްވުމާއެކު އަންނަ އަހަރުގެ ހޫނު މޫސުމުގެ ނިޔަލަށް އިބްރަހިމޮވިޗް މިލާނުގައި މަޑުކުރާނެއެވެ.

މިލާނުގެ އެއްބަސްވުން އިބްރަހިމޮވިޗް އާކުރިއިރު، އޭނާ އަންނަނީ މިލާނަށް ބަދަލުވުމަށްފަހު ތަފާތު މޮޅު ކުޅުމެއް ދައްކަމުންނެވެ. އެގޮތުން މި ފަހުން މިލާނަށް ބަދަލުވުމަށްފަހު، އޭނާ ވަނީ މިހާތަނަށް މިލާނަށް ކުޅެދިން 47 މެޗުގައި 28 ލަނޑު ޖަހާފައެވެ. އަދި މި ފަހަކަށް އައިސް އިބްރަހިމޮވިޗުގެ ކުޅުން ވަރަށް ބޮޑަށް ފާހަގަވެގެންދިޔައިރު، 2016 ވަނަ އަހަރު ސްވިޑެންގެ ގައުމީ ފުޓްބޯޅަ ޓީމަށް ކުޅުން ހުއްޓާލި ފޯވާޑް ދާދި ފަހުން ވަނީ އެ ނިންމުން ބަދަލުކޮށް އަލުން ގައުމީ ޓީމަށް ކުޅެން ފަށާފައެވެ. އެކަމަކު ކަކުލަށް ލިބުނު އަނިޔާއާ ގުޅިގެން އަންނަ މަހު ފަށާ ޔޫރޯ ފުޓްބޯޅަ މުބާރާތުގައި އިބްރަހިމޮވިޗަށް ނުކުޅެވޭނެއެވެ.