ކަކުލަށް ލިބުނު އަނިޔާއާ ގުޅިގެން އަންނަ މަހު ފަށާ ޔޫރޯ ފުޓްބޯޅަ މުބާރާތުގައި ސްވިޑެންގެ ތަޖުރިބާކާރު ފޯވާޑް ޒްލަޓާން އިބްރަހިމޮވިޗަށް ނުކުޅެވޭނެކަން ކަށަވަރުވެއްޖެއެވެ.
އުމުރުން 39 އަހަރުގެ އިބްރަހިމޮވިޗަށް އަނިޔާވީ އިޓާލިއަން ލީގުގައި މިދިޔަ ހަފުތާގައި ޔުވެންޓަސް އަތުން 3-0 ގެ ނަތީޖާއަކުން އޭސީ މިލާން މޮޅުވި މެޗުގައެވެ. އެ މެޗުގެ 66 ވަނަ މިނެޓުގައި ކަކުލަށް ލިބުނު އަނިޔާއެއްގެ ސަބަބުން އިބްރަހިމޮވިޗް ވަނީ ބަދަލުކޮށްފައެވެ.
އެ މެޗަށްފަހު މިލާނުގެ ކޯޗު ސްޓެފާނޯ ޕިއޯލީ ވަނީ މެޗުގެ ކުރިންވެސް އިބްރަހިމޮވިޗް ހުރީ މުޅިން ފިޓްކޮށެއް ނޫން ކަމަށް ބުނެފައެވެ. އެ އަނިޔާއާ ގުޅިގެން މި ސީޒަނުގެ ބާކީބައިގައި އިބްރަހިމޮވިޗަށް ނުކުޅެވޭނެކަން މީގެ ކުރިން ޔަގީންވިއިރު، ހޮނިހިރު ދުވަހުގެރޭ އިބްރަހިމޮވިޗް ވަނީ އޭނާއަށް ޔޫރޯގައި ނުކުޅެވޭކަން ސްވިޑެންގެ ކޯޗު ޔޭން އެންޑަސަންއަށް އަންގާފައެވެ.
އަނިޔާގެ ސަބަބުން އިބްރަހިމޮވިޗަށް ޔޫރޯގައި ނުކުޅެވޭނެކަން ޔަގީންވިއިރު، މީގެ ކުރިން 2016 ވަނަ އަހަރު ސްވިޑެންގެ ގައުމީ ފުޓްބޯޅަ ޓީމަށް ކުޅުން ހުއްޓާލި ފޯވާޑް ދާދި ފަހުން ވަނީ އެ ނިންމުން ބަދަލުކޮށް އަލުން ގައުމީ ޓީމަށް ކުޅެން ފަށާފައެވެ. އެގޮތުން ފީފާ ވޯލްޑް ކަޕުގެ ޔޫރަޕް ކޮލިފައިންގައި މި ފަހުން ސްވިޑެން ކުޅުނު މެޗުތަކުގައި އޭނާ ވަނީ ކުޅެފައެވެ.
އަންނަ ޖޫން މަހުގެ 11 ވަނަ ދުވަހުން ފެށިގެން ޖުލައި މަހުގެ 11 ވަނަ ދުވަހުގެ ނިޔަލަށް ޔޫރޯ ބޭއްވުމަށް ތާވަލުކޮށްފައިވާއިރު، ސްވިޑެން ހިމެނެނީ ގްރޫޕް އީގައެވެ. މި ގްރޫޕުގައި ދެން ހިމެނޭ ގައުމުތަކަކީ ސްޕެއިން، ޕޮލެންޑް އަދި ސްލޮވާކިއާއެވެ.
އިބްރަހިމޮވިޗުގެ ކަކުލަށް އަނިޔާވިއިރު، މި ސީޒަނުގައި އޭނާއަށް ވަނީ އަނިޔާގެ ގިނަ މައްސަލަތަކެއް ކުރިމަތިވެފައެވެ. އެގޮތުން މިހާތަނަށް މި ސީޒަނުގައި އިބްރަހިމޮވިޗަށް ވަނީ އަނިޔާގެ ސަބަަބުން 17 މެޗު ގެއްލިފައެވެ.
މި ސީޒަނުގައި އިބްރަހިމޮވިޗަށް އަނިޔާގެ ގިނަ މައްސަލަތަކެއް ކުރިމަތިވި ނަމަވެސް، އޭނާ އަންނަނީ އަލުން އަނބުރާ މިލާނަށް ބަދަލުވުމަށްފަހު ތަފާތު މޮޅު ކުޅުމެއް ދައްކަމުންނެވެ. އެގޮތުން މި ފަހުން މިލާނަށް ބަދަލުވުމަށްފަހު، އިބްރަހިމޮވިޗް ވަނީ މިހާތަނަށް މިލާނަށް ކުޅެދިން 47 މެޗުގައި 28 ލަނޑު ޖަހާފައެވެ. އަދި ދާދި ފަހުން އޭނާ ވަނީ މިލާނާއެކު ހަދާފައިވާ އެއްބަސްވުން އިތުރު އެއް އަހަރަށް އާކޮށްފައެވެ.
